Tur hende den nos famia tin nòmber. Asta nos bestianan di kas tin nòmber. Lo no ta lógiko ku Dios tambe tin un nòmber? Den Beibel, Dios tin vários título, manera Dios Todopoderoso, Señor Dios, Soberano Señor i Kreador. Pero tambe e tin un nòmber.—Lesa Salmo 148:13.

Hopi tradukshon di Beibel tin e nòmber di Dios na Salmo 83:18. Por ehèmpel, den e Tradukshon di Mundu Nobo di e Santu Skritura, bo ta lesa: “Abo, kende su nòmber ta Yehova, abo so ta e Haltísimo riba henter tera.”

Dios ke pa nos usa su nòmber. Ora nos ta papia ku un hende ku nos ta stima, por ehèmpel, un bon amigu, nos ta yam’é na su nòmber—foral si el a pidi nos esei, no ta bèrdat? Dikon no usa anto e nòmber di Dios ora nos ta papia kuné? Ademas, Hesukristu a animá su siguidónan pa usa e nòmber di Dios.—Lesa Mateo 6:9; Huan 17:26.

Sinembargo, pa nos bira amigu di Dios, nos mester sa mas ku djis su nòmber. Por ehèmpel, kon Dios ta? Ta posibel pa hala serka Dios? Bo por haña kontesta riba e preguntanan ei den Beibel.