Den desèmber, hopi hende rònt mundu ta mira plachi òf pòpchi di Hesus komo bebi. E ta den un pesebre: esei ta un baki grandi kaminda nan ta pone yerba pa bestia kome. Pero Hesus ta un bebi ainda? Ta asina nos tin ku kòrda riba dje?— * Un kos ku a pasa riba un anochi ku un grupo di kriadó di karné serka di Bètlehèm ta siña nos un manera mas importante pa kòrda riba dje. Laga nos papia di esei.

Diripiente e hòmbernan akí a mira un angel. E angel a bisa nan: “A nase esun ku lo ta boso Salbador, kende ta Kristu, e Señor.” Tambe e angel a bisa nan ku nan lo haña Hesus “lorá den paña i drumí den un pesebre.” Mesora, hopi otro angel a yega i kuminsá “alabá Dios.”

Kon lo bo sinti bo si bo tende angel alabá Dios?— E hòmbernan a keda masha kontentu mes! Nan a bisa: “Laga nos ban Bètlehèm pa mira kiko a pasa einan.” Nan a haña “Maria ku Hose, i e yu chikitu drumí den e pesebre.”

E hòmbernan a bisa otro hende kiko a pasa i nan tur a keda boka habrí. Abo ta kontentu di sa tur e kosnan bunita akí di Hesus?— Nos tur ku ta stima Dios ta kontentu. Laga nos wak awor dikon hende a bira asina felis ora Hesus a nase. Nos ta bai bèk na e tempu promé ku Maria a kasa.

Riba un dia, un angel ku yama Gabriel a bini serka Maria. El a primintí Maria ku Maria lo haña un bebi i ku “lo e ta grandi i lo ser yamá Yu di e Haltísimo.” Gabriel a bisa: “Lo e reina komo Rei . . . i lo no tin fin na su Reino.”

Maria kier a sa kon esaki por a pasa, pasobra e no a yega di drumi ku un hòmber. P’esei Gabriel a bis’é: “Poder di e Haltísimo lo tapa bo,” i “e yu ku nase lo ser yamá santu i Yu di Dios.” Ke men,  Dios tabata bai tuma e bida di su Yu for di shelu i pon’é den barika di Maria, pa e nase komo un bebi. Esei tabata un milager!

Bo a yega di mira plachi òf pesebre ku “tres rei” ku ta bishitá e bebi Hesus huntu ku kriadó di karné?— Den tempu di Pasku bo por mira e pesebrenan ei trahá. Pero nan no ta bon. E ‘tres reinan’ tabata astrólogo: hende ku ta wak strea pa purba haña sa futuro. Dios no ta gusta esei. Laga nos wak kiko a pasa ora nan a yega. Beibel ta bisa: “Ora nan a drenta den e kas, nan a mira e mucha huntu ku su mama, Maria.” Pues Hesus no tabata un bebi mas den un pesebre; e tabata un mucha ku tabata biba huntu ku Hose ku Maria den un kas!

Kon e astrólogonan a logra haña Hesus?— Un “strea” a mustra nan e kaminda, no pa Bètlehèm, sino pa bai promé serka Rei Heródes na Herúsalèm. Beibel ta bisa ku Heródes kier a haña Hesus pa mat’é. Pensa riba esaki. Ken bo ta kere a pone e strea pa e hòmbernan sa kon pa yega na Heródes?— Esei no tabata Yehova, e Dios berdadero, sino su enemigu, Satanas e Diabel!

Awe, Satanas ta purba di laga hende kere ku Hesus ta djis un bebi ainda, ku no por yuda su mes. Ma angel Gabriel a bisa Maria: “Lo e reina komo Rei . . . i lo no tin fin na su Reino.” Awe Hesus ta Rei den shelu, i pronto lo e kaba ku tur enemigu di Dios. Esei ta loke nos tin ku kòrda di Hesus, i nos tin ku bisa otro hende di esei.