Smita, * un señora di 35 aña na Dhaka, Bangladèsh, tabatin e reputashon di ta un persona amoroso i bondadoso. Tur hende tabata konosé komo un esposa diligente i alegre ku kier a yuda otronan sa loke el a siña tokante Dios. Ora ku Smita a bira malu diripiente i muri den ménos ku un siman, su famia i amigunan a haña e shòk di nan bida.

James i su esposa, un pareha yòn di 30 i piku aña ku tabata biba na New York, tambe tabatin un reputashon similar. Un biaha, den lènte, nan a bai bishitá nan amigunan na kosta wèst di Merka, pero nan no a bolbe kas bèk nunka mas. Durante nan biahe, nan a haña nan mes enbolbí den un aksidente fatal di outo, lagando nan sernan kerí i koleganan di trabou ku un bashí inmenso.

Bo no tin nodi di bai muchu leu pa bo ripará ku maldat i sufrimentu ta reina tur kaminda awe. Guera ta mata hopi hende, tantu sivil komo sòldá. Hende inosente ta bira víktima di krímen i violensia. Aksidente mortal i enfermedat króniko ta kita bida di hende di tur edat òf nivel sosial. Desasternan natural ta kaba ku komunidatnan kompleto. Prehuisio i inhustisia a bira masha komun. Kisas abo mes a yega di bira víktima den un òf otro manera.

Ta na su lugá anto pa nos puntra nos mes:

• Dikon kos malu ta pasa ku bon hende?

• Nos por kulpa Dios pa e kosnan ei?

• Ta pa kasualidat e kosnan ei ta pasa òf ta hende ta kousa nan?

• Ta lei di karma? Es desir, ta loke un hende a hasi den su bida anterior ta pone ku e ta sufri awor?

• Si ta eksistí un Dios todopoderoso, dikon e no ta protehá bon hende di kosnan malu?

• Maldat i sufrimentu lo kaba un dia?

Pa haña kontesta riba e preguntanan akí, nos tin ku kontestá dos pregunta básiko: Dikon kos malu ta sosodé i kiko Dios ta bai hasi ku nan?