Beibel no ta un simpel buki. E ta kontené konseho di nos Kreador. (2 Timoteo 3:16) E mensahe di Beibel por tin un gran influensia riba nos. De echo, Beibel ta bisa: “E palabra di Dios ta bibu i poderoso.” (Hebreonan 4:12) E tin poder pa mehorá nos bida den dos manera klave. E ta duna nos guia pa nos bida di tur dia i ta yuda nos konosé Dios i su promesanan.—1 Timoteo 4:8; Santiago 4:8.

Beibel por yuda bo mehorá bo bida awor. E por yuda ku asuntunan hopi personal. E ta duna konseho práktiko tokante lo siguiente:

• Relashon ku otro hende.—Efesionan 4:31, 32; 5:22, 25, 28, 33.

• Salú emoshonal i físiko.—Salmo 37:8; Proverbionan 17:22.

•   Norma- i balornan moral.—1 Korintionan 6:9, 10.

• Kon pa perkurá pa e nesesidatnan material di bo famia.—Proverbionan 10:4; 28:19; Efesionan 4:28. *

Un pareha yòn na Asia a balorá e konsehonan di Beibel mashá. Meskos ku hopi pareha resien kasá, nan tabatin problema pa ahustá na otro su personalidat i pa papia habrí ku otro. Pero nan a kuminsá apliká loke nan tabata lesa den Beibel. Ku ki resultado? E esposo, Vicent, a bisa: “Loke mi tabata lesa den Beibel a yuda mi dil ku e retonan den nos matrimonio ku amor. Aplikashon di e prinsipionan di Beibel a hasi nos bida huntu felis.” Su esposa, Annalou, a konfirmá esei, bisando: “E ehèmpelnan di Beibel a yuda nos mashá. Awor mi ta sinti mi kontentu ku nos matrimonio i nos metanan den bida.”

Beibel por yuda bo siña konosé Dios. Banda di e komentarionan ku Vicent a duna tokante matrimonio, el a bisa: “Awor mas ku nunka, ora mi lesa Beibel, mi ta sinti mi hopi mas serka di Yehova.” Loke Vicent a bisa ta resaltá un punto importante: Beibel por yuda bo siña konosé Dios. Ora bo hasi esaki, lo bo benefisiá di su konseho pero lo bo haña sa tambe ku bo por konos’é i bira su amigu. I lo bo haña sa ku e ta revelá detayenan tokante un mihó futuro, esta, un tempu den kua lo bo por disfrutá di bida pa semper, “loke realmente ta bida.” (1 Timoteo 6:19) Esei ta algu ku ningun otro buki no por ofresé nos.

Si bo pone meta pa lesa Beibel i tene bo mes na dje, bo tambe por haña e benefisionan ei. Bo por mehorá bo bida awor i siña konosé Dios. Pero, ora bo lesa Beibel, kisas vários pregunta ta lanta. I ora esei sosodé, tene na mente e bon ehèmpel di un ofisial di Etiopia ku a biba mas o ménos 2.000 aña pasá. E tabatin hopi pregunta tokante Beibel. Ora Felipe, a puntr’é si el a komprondé loke e tabata lesa, el a kontestá: “Kon mi por komprondé si ningun hende no guia mi?” * Anto mesora el a aseptá yudansa serka Felipe, un di e promé disipelnan di Hesus, kende ya tabata un maestro kualifiká pa siña hende tokante Beibel. (Echonan 8:30, 31, 34) Meskos tambe, si bo ke sa mas tokante Beibel, nos ta invitá bo pa yena bo datonan den e formulario pa pidi un kurso di Beibel riba www.dan124.com òf skohe un adrès menshoná den e revista akí i manda bo petishon. Ademas, bo por tuma kontakto ku Testigunan di Yehova òf bishitá un Salòn di Reino den bo área. Pues, dikon no kuminsá lesa Beibel awe i lag’é guia bo i yuda bo mehorá bo bida?