Segun ku tempu ta pasa, algun pareha kasá ta demostrá kada bes ménos kariño na otro. Bo mester ta preokupá si esaki ta pasando den bo matrimonio?

•  Loke ta bon pa bo sa

•  Loke bo por hasi

 Pa un matrimonio ta fuerte, ta esensial pa e pareha mustra kariño na otro. Meskos ku pa bo mantené bo kurpa fuerte i salú ta importante pa bo kome y bebe awa, asina tambe pa bo tin un matrimonio fuerte ta importante pa bo demostrá kariño. Asta despues ku un pareha tin vários dékada kasá, ta importante pa esposo i esposa sigui demostrá ku nan ta stima otro.

 Amor berdadero no ta egoista. E ta motivá bo pa hasi e otro persona felis. P’esei, un kasá amoroso lo no demostrá kariño solamente ora e sinti pa hasi esei. Mas bien, e ta purba di diserní ki ora su kasá tin mester di esei i e ta hasi esfuerso pa kumpli ku e nesesidat ei.

 Mayoria di bes e esposa tin mas nesesidat pa haña kariño ku nan esposo. Ta posibel ku un hòmber ta stima su esposa masha hopi mes. Pero si e ta demostrá kariño solamente na prinsipio i final di dia òf promé ku nan tene relashon seksual, kisas su esposa por duda si e ta stim’é di bèrdat. Pues, ta mihó pa demostrá kariño henter dia.

 Ekspresá bo kariño ku palabra. Ekspreshonnan manera “Mi stima bo” òf “Bo ta tur kos pa mi,” ta laga bo kasá sinti ku bo ta stim’é.

 Prinsipio di Beibel: “Loke kurason ta yen di dje, boka ta papia.”​—Mateo 12:34.

 Sugerensia: No limitá bo ekspreshonnan di kariño na palabra so. Skirbi un nota p’e, mand’é un e-mail òf mensahe.

 Demostrá bo kariño ku echonan. Tene man di bo kasá òf dun’é un brasa òf sunchi ta algun manera pa bo demostrá ku bo ta sinsero ora bo bis’é “mi ta stima bo.” Bo por demostrá bo amor tambe ku un karisia, un mirada òf, de bes en kuando, un regalo. Tambe bo por yuda bo esposa ku kosnan manera karga saku pisá, habri porta p’e, laba tayó, laba paña òf kushiná. Hopi esposa no ta mira e kosnan ei komo djis un yudansa práktiko, sino komo amor den akshon.

 Prinsipio di Beibel: “Nos no mester stima ku palabra òf ku boka so, ma ku echo.”​—1 Huan 3:18.

 Sugerensia: Trata bo kasá amorosamente meskos ku tempu ku boso tabata namorá.

 Traha tempu pa otro. Ora boso pasa tempu huntu ku otro, esei ta fortalesé boso matrimonio i ta laga bo kasá sinti ku bo ta disfrutá di su kompania. Ta klaru ku esei no ta fásil ora bo tin yu òf si bo tin hopi kos di hasi tur dia. Kisas boso por plania pa, riba un base regular, hasi algu simpel manera kana huntu.

 Prinsipio di Beibel: “Hasi sigur kiko ta e kosnan mas importante.”​—Filipensenan 1:10.

 Sugerensia: Algun pareha ku ta hopi drùk ta plania pa regularmente reservá un anochi pa ‘date’ òf pa pasa un wikènt huntu.

 Siña konosé bo kasá mihó. Kada persona su nesesidat pa kariño ta diferente. Bisa otro kon lo bo preferá di haña kariño i si bo ta sinti e nesesidat di haña mas kariño. Despues, hasi esfuerso pa kumpli ku e nesesidat di bo kasá. Kòrda ku kariño ta esensial pa un bon matrimonio.

 Prinsipio di Beibel: “Amor . . . no ta buska su mes interes.”​—1 Korintionan 13:4, 5.

 Sugerensia: No eksigí kariño di bo kasá, pero puntra bo mes: ‘Kiko mi por hasi pa motivá mi kasá pa duna mi mas kariño?’