Bo ta kere ku ta Dios a krea tur kos? Si ta asina, bo no ta e úniko; hopi hende (hóben i adulto) ta kere esei. Pero, otronan ta bisa ku bida i e universo a yega na eksistensia pa medio di evolushon, sin yudansa di un “Ser Supremo.”

 Bo tabata sa? Hopi biaha tantu hende ku ta kere den evolushon komo hende ku ta kere den kreashon ta lihé pa bisa kiko nan ta kere sin sa dikon nan ta kere esei.

•   Tin hende ta kere den kreashon djis pasobra nan a siña esei na misa.

•   Hopi hende ta kere den evolushon djis pasobra nan a siña esei na skol.

 E seri di artíkulonan akí ta bai yuda bo fortalesé bo fe den kreashon i hasié mas fásil pa bo splika otronan pakiko bo ta kere den dje. Pero promé, puntra bo mes esaki:

 Dikon e pregunta ei ta importante? Pasobra Beibel ta bisa ku nos mester usa nos mente, nos “kapasidat di pensa.” (Romanonan 12:1) Esaki ta nifiká ku nos fe den Dios no mester ta djis basá riba

•  emoshon (Mi ta sinti ku mester tin algu mas)

•  influensia di otro hende (Hende rònt di mi ta kere den Dios)

•  preshon (Mi a lanta den un kas kaminda mi mester a kere den Dios)

 Na lugá di esei, bo mes mester ta konvensí ku Dios ta eksistí i bo mester tin bon motibu pa kere esei.

 Kiko ta konvensé abo ku Dios ta eksistí? E blachi di tarea “Pakiko Mi Ta Kere Den Dios?” lo yuda bo hasi bo fe mas fuerte. Ademas, e komentarionan di e siguiente hóbennan por yuda.

 “Ora mi skucha mi dosente splika kon nos kurpa ta hinká den otro, mi no ta duda niun ratu so ku Dios ta eksistí. Kada parti di nos kurpa tin su propio funshon, asta e detayenan di mas chikitu. I hopi biaha e funshonnan akí ta tuma lugá sin ku nos sa. En bèrdat e kurpa humano ta hopi fasinante!”​—Teresa.

 “Ora mi mira edifisionan haltu, barku krusero, òf un outo, mi ta puntra mi mes ‘Ken por a traha tur e kosnan akí?’ Por ehèmpel, pa traha un outo mester di hende inteligente pasobra tur e komponentenan chikitu tin ku funshoná bon pa asina henter e outo por traha bon. Pues, si un outo mester di un diseñadó, ta mas ku klaru ku hende tambe mester di un diseñadó.”​—Richard.

 “Si e hendenan di mas inteligente a tuma sientos di aña pa komprondé te asta e frakshonnan di mas chikitu di universo, kon un hende por pensa anto ku e universo a bin na eksistensia sin un mente inteligente?”—Karen.

 “Mas mi a studia siensia, ménos real e idea di evolushon a bira. Por ehèmpel, mi a pensa tokante naturalesa i kon presis tur kos ta hinká den otro i tambe mi a reflekshoná riba e karakterístikanan ku ta diferensiá un ser humano for di otro, manera e nesesidat di sa ken nos ta, di unda nos a bini i unda nos ta bai. Evolushonistanan a purba di splika esaki ku un teoria ku ta basá riba komportashon di bestia, pero nan no a logra splika dikon ser humano ta asina diferente. Ami ta pensa ku bo mester di mas ‘fe’ pa kere den evolushon ku pa kere den un Kreador.”​—Anthony.

 Kiko si bo kompañeronan di skol ta hasi bofon di bo pasobra bo ta kere den algu ku bo no por mira? Kiko si nan ta bisa ku siensia a “proba” ku e siñansa di evolushon ta korekto?

 Pa kuminsá, bo mester ta konvensí di loke bo ta kere. Bo no mester tin bèrgwensa, i bo no mester laga nan intimidá bo. (Romanonan 1:16) Pensa riba lo siguiente:

1.   Bo no ta bo so, tin hopi hende ku ainda ta kere den Dios. Tin hopi hende inteligente i bon eduká ku ta kere den Dios. Por ehèmpel, tin sientífiko ku ta kere ku Dios ta eksistí.

2.   Ora hende bisa ku nan no ta kere den Dios, loke tin bes nan kier men ta ku nan no ta komprondé Dios. En bes di buska prueba pa loke nan ta kere, nan ta hasi preguntanan manera, “Si Dios ta eksistí, dikon e ta permití sufrimentu?” E tipo di rasonamentu akí no ta defendé e siñansa di evolushon, sino e ta mustra e sintimentu di e persona, ku tin algu ta molesti’é.

3.   Tur ser humano tin un “nesesidat spiritual.” (Mateo 5:3) Esaki ta enserá un nesesidat pa kere den Dios. Pues, si un persona ta bisa ku no tin un Dios, e, i no abo, tin e responsabilidat di splika dikon e ta pensa asina.​—Romanonan 1:18-20.

4.   Ta totalmente lógiko pa kere den Dios. Ta un echo ku bida no por a yega na eksistensia riba su mes. No tin niun prueba ku ta mustra ku bida por originá di un materia ku no tin bida.

 Awor, ora bo mester splika un hende pakiko bo ta kere den Dios, kon lo bo hasi esei? Wak e siguiente ideanan.

 Si un hende ta bisa: “Ta hende bobo so ta kere den Dios.”

 Bo por bisa: “Bo no ta haña ku bo ta generalisá? Den un enkuesta ku 1.600 profesor di siensia di vários di e mihó universidatnan, un terser parti di nan a bisa ku nan no ta ateista òf agnóstiko. a Lo bo yama e profesornan ei bobo djis pasobra nan ta kere den Dios?”

 Si un hende ta bisa: “Si Dios ta eksistí, dikon tin asina tantu sufrimentu den mundu?”

 Bo por bisa: “Bo ke men ku bo no ta komprondé dikon Dios no ta aktua? [Permití e persona kontestá] Loke a yuda ami komprondé dikon Dios ta permití tantu kos malu sosodé, ta un estudio di Beibel. Lo mi tin gana di mustra bo kiko mi a siña. Kiko bo ta pensa?”

 E siguiente artíkulo den e seri akí lo trata dikon e teoria di evolushon no ta duna nos un splikashon satisfaktorio pa nos eksistensia.