Segun Beibel ta normal i asta nesesario pa bo stima bo mes te na un sierto grado. E amor ei ta enserá kuida, respetá i balorá bo mes. (Mateo 10:31) Ademas, Beibel ta bisa ku nos mester pone amor propio na su debido lugá i no pensa solamente riba nos mes.

Ken nos mester stima mas?

1.   Amor pa Dios mester ta na promé lugá den nos kurason. Beibel ta bisa ku e mandamentu di mas grandi ta: “Bo tin ku stima Yehova bo Dios ku henter bo kurason.”—Marko 12:28-30; Deuteronomio 6:5.

2.   E di dos mandamentu ta: “Stima bo próhimo meskos ku bo mes.”—Marko 12:31; Levítiko 19:18.

3.   Aunke Beibel no tin un mandamentu spesífiko ku ta bisa ku bo mester stima bo mes, e mandamentu pa “stima bo próhimo meskos ku bo mes” ta mustra ku ta normal i bon pa bo tin un grado rasonabel di amor i rèspèt propio.

Ken Hesus a stima mas?

 Hesus a mustra kon nos por stima Dios, nos próhimo i nos mes na un manera balansá. Ademas, el a siña su disipelnan pa sigui su ehèmpel.​—Huan 13:34, 35.

1.   El a stima Yehova Dios promé i a biba pa hasi Su boluntat. El a bisa: “Mi ta hasi presis manera e Tata a manda mi hasi, pa mundu por sa ku mi ta stima e Tata.”—Huan 14:31.

2.   Hesus a stima su próhimo. El a mustra esei ora el a yuda otro hende i asta a duna su bida pa nan.​—Mateo 20:28.

3.   Hesus a mustra ku e ta stima su mes na manera balansá ora el a apartá tempu pa deskansá, kome i disfrutá di pasa tempu huntu ku su disipelnan i otro hende ku tabata interesá den su mensahe.​—Marko 6:31, 32; Lukas 5:29; Huan 2:1, 2; 12:2.

Si mi stima otro hende mas ku mi mes, esei lo hasi mi ménos felis òf kita mi balor propio?

 Nò, pasobra nos tur a ser kreá den imágen di Dios i su kualidat di mas importante ta amor sin egoismo. (Génesis 1:27; 1 Huan 4:8) Esei ta nifiká ku nos a ser diseñá pa mustra amor na otro hende. Aunke ta bon pa stima nos mes, nos lo ta realmente felis si nos stima Yehova mas i focus riba yuda otro hende. P’esei Beibel ta bisa: “Tin mas felisidat den duna ku den risibí.”—Echonan 20:35.

 Hopi hende awe ta pretendé ku pa bo ta felis bo mester pone bo mes na promé lugá. Nan a remplasá “stima bo próhimo” pa “stima bo mes.” Sin embargo, realidat ta mustra ku nos salú ta mehorá i nos lo ta felis si nos sigui e konseho sabí akí di Beibel: “Laga kada hende sigui buska, no su mes benefisio, sino esun di e otro persona.”—1 Korintionan 10:24.