1. Ngera omekrael a blekerdeled?

 KID el rokui a kmal soad el lodeuir a rengul a Jehovah, a bla demetecholb el kemanget el taem me a lechub e kede dirk miltecholb. Ngkired el lomtebechel er a uldesued a lsoad el mo odeuir a rengul. E ngera uchul? A uldesued a omekrael a blekerdeled. A lsekum e kede blechoel melatk a tekoi el ngii a oltirakl a ngelbesel a klechad e kede mo melekoi e meruul a diak lungil. (Efe. 4:17-19) A domekeek er a uldesued er a ungil e kede mo melekoi e meruul a tekoi lodeuir a rengul a Demad el Jehovah.​—Gal. 5:16.

2. Ngera el ker a bo dosaod er tia el suobel?

² Ngua dulsaod er sel uleak uchei el suobel, ngkmal diak el sebeched el torob a rokui el diak lungil uldasu el mei er a bdelud. Engdi ngsebeched el ngiltii el diak bo doruul. A uchei er a demetecholb e ngkired el mo diak dongedecheduch e doruul a tekoi el Jehovah ouketui. Tiakid a kot el kired el meruul er ngii el mo omedobed er ngike el mechut el chad. Me nguaisei engdi a lsoad el cherrungel lodeuir a rengul a Jehovah e ngkired el loltirakl er tia el llechul: “Bilemiu er ngike el beches el chad.” (Kol. 3:10, NW) Ngar tia el suobel e kede monger aika el ker: Ngngera “ngike el beches el chad”? E mekera debilid er ngii e dolemolem el loubail er ngii?

3. Ngngera “ngike el beches el chad,” e mekera chad e milii er ngii? (Galatia 5:22, 23)

³ A chad loubail er “ngike el beches el chad” a omdasu e meruul a tekoi el ua Jehovah. Ngolecholt a rodech er a chedaol reng, e mecherei a chedaol reng me ngomekrael er a uldesuel, rengul, me a omerellel. (Monguiu er a Galatia 5:22, 23.) El ua tiang, ngbetik a rengul er a Jehovah me a rechedal. (Mt.  22:36-39) Ngmelemolem el oba deurreng alta ngchelebangel a ringel. (Jak. 1:2-4) Ngchad er omeruul el budech. (Mt. 5:9) Ngolecholt er a kllourreng me a delemedemek el mora rechad. (Kol. 3:13) Ngkmal soal a ungil e dirrek el meruul a ungil. (Lk. 6:35) Ngochotii loeak omerellel el kmo ngmesisiich a klaumerang er ngii er a Jehovah. (Jak. 2:18) Ngmelemolem loba chelellakl el reng sel bo lekesib a rengul e oba ulserechakl el reng sel lemekesuseu.​—1 Ko. 9:25, 27; Tit. 3:2.

4. A bo doubail er ngike el beches el chad e ngsebeched el ouderta lolecholt aike el blekeradel el ngar er a Galatia 5:22, 23? Mosaod.

⁴ A lsoad el milid er ngike el beches el chad e ngkired el mekeroul aike el rokui el blekeradel el lolekoi a Galatia 5:22, 23 me a dirrek el bebil er a bades. * Aika el blekeradel a diak leua kakerous el bail el dou derta loubail. A betok er aika el blekeradel a kmeed losisiu ngii me a lmuut el bebil er a blekeradel. El ua tiang a lsekum e ngmera el betik a rengum er a ngar bita er kau, e ke moba kllourreng me a delemedemek el bedul ngii. E a lsekum e ngmera el soam el mo ungil e ngkirem loba chelellakl el reng me a ulserechakl el reng.

5. Ngera belkul a bo ‘doba chomelebedebekel a Kristus,’ e ngera uchul me ngkired el mesuub er a klengar er a Jesus? (1 Korinth 2:16, BT)

⁵ Monguiu er a 1 Korinth 2:16, BT. * A lsoad el milid er ngike el beches el chad e ngkired el mo “choba chomelebedebekel a Kristus.” Tia belkul a kmo ngkired el suubii a rolel a lomdasu a Jesus e mo oukerebai er ngii. A Jesus a mle cherrungel lolecholt a rodech er a reng. Ngika cherrungel lochotel a rokui el blekerdelel a Jehovah. (Heb. 1:3) Sel bo doba uldesuel a Jesus e kede mo meruul a tekoi el uai ngii e mo sebeched lolecholt a blekerdelel.​—Fil. 2:5.

6. Ngera el tekoi a kired el melatk sel dolasem lomekbail er kid er ngike el beches el chad?

⁶ Ngmera el sebeched el mo oltirakl er a kerebil a Jesus? Kede locha mo melatk: ‘A Jesus a cherrungel. Ngkmal diak el sebechek el mo cherrungel el uai ngii!’ A lsekum e nguaisei a uldesuem e molatk aikang. A kot, e kau a ulebeob el okesiul a Jehovah me a Jesus. Me ngsebechem el ngiltii el mo oukerebai er tir, e sebechem el mo uai tir. (Gen. 1:26) Ongerung, a chedaol reng a kot el mesisiich el klisiich el ngar ngii. Ngoeak a ngelsuil e ngsebechem el  remuul a tekoi el diak el sebechem el di kau el remuul. Ongedei, a Jehovah a kmal diak longerechir er kau er chelechang el mo cherrungel lolecholt a rodech er a reng. A betik a rengul Demad a bai mla kutmeklii a 1,000 el rak el kirir tirke el oba omelatk el di kiei er tia el chutem el mo mengerrungel a blekerdelir. (Och. 20:1-3) A longerechir er ngii a Jehovah er kid er chelechang a mo melasem el mora tkurrebab el sebeched e mo ultuil er ngii el kirel a ngeso.

7. Ngera kede mo mesaod er chelechang?

⁷ Ngera ileakl el rolel e ngsebeched loukerebai er a Jesus? Me dosaod a eua el rodech er a reng. Kede mo omes er a rolel e a Jesus a ullecholt a derta er aika el blekeradel me a klubeled er ngii. Kede dirrek el mo omes a bebil ker el ngii a mo ngosukid el olengeriakl er a rolel a domekbail er kid er ngika el beches el chad.

8. Ngmilekera Jesus e ochotii a bltkil a rengul?

⁸ A klou el bltkil a rengul a Jesus el mora Jehovah a uchul me ngmilengoit a tekoi el kirel a Demal me kid. (Jn. 14:31; 15:13) Ngulechotii a klou el bltkil a rengul mora rechad loeak a klengar el ngileltii er a lengar tia el chutem. Ngbek el sils lullecholt er a bltikerreng me a klechubechub el mo lmuut er aike el taem el luluuketui er ngii. A klou a ultutelel rolel e ngulechotii a bltkil a rengul el mora rechad a sera lolisechakl er tir el kirel a Rengedel a Dios. (Lk. 4:43, 44) Ngdirrek lulechotii a bltkil a rengul el mora Dios me a rechad er a lekengei el mo chuarm er a meringel kodall er a chimorir a rengar er a klengit. E tia uchul me ngngar ngii a techelled el mo nguu a diak a ulebengelel klengar.

9. Ngmekera sebeched loukerebai er a Jesus lolecholt er a bltikerreng?

⁹ Kede tilengetengii a klengar er kid el mora Jehovah e miltecholb le ngbetik a rengud er ngii. Me bo deua Jesus e dochotii a bltkil a rengud el mora Jehovah loeak omerelled el mora rechad. A apostol Johanes a milluches el kmo: “A le ngar ngii a chad el kmo ng betik a rengul er a Dios e ouketui er a tar ngii, e ng bulak. Ele ng diak el sebechel el betik a rengul er a Dios el dirkak lesang a lak le betik a rengul er a tar ngii el bla lesang.” (1 Jn. 4:20) Ngsebeched el di kid loker: ‘Ngak, ak mla mekurulii a mesisiich el bltikerreng er ngak el mora rechad? Ngak, a kulecholt er a klechubechub el mora rechad el mo lmuut me a lemekngit omerellir el mei er ngak? A bltikerreng, ngodbechak el mo ousbech a temek me aike el ngar ngii er ngak el lolengeseu er a rechad el mo medengelii a Jehovah? Ak kongei el meruul er tiang alta ruumesingd el chad a diak loba omereng el saul me a lechub e te omtok er ngak el kirel? Ngsebechek losiik a lmuut el bebil er a rolel e ak mengoit a taem el meruul er tia el ureor er a omeruul el disaiplo?’​—Efe. 5:15, 16.

10. Ngmilekera Jesus e meruul a budech?

¹⁰ A Jesus a mle chad er a budech. A rechad er a lemekngit omerellir el mo er ngii e ngdimlak lomtechei a mekngit er a mekngit. Ngdirrek el mirruul a lmuut el betok. Ngulsiik a rolel e meruul a budech e millisiich er a rechad el mo mesmechokl a mlo mekngit er a delongelir. El ua tiang, ngullisechakl el kmo ngkirir el meruul a budech lobengkel a odam er tir a lsekum e ngsorir a Jehovah lekengei omengull er tir. (Mt. 5:9, 23, 24) E ullengeseu er a rechapostol el di mle kakngit el kirel a kmo ngtecha kot el ngarbab er a delongelir.​—Lk. 9:46-48; 22:24-27.

11. Kede mekera meruul a budech?

¹¹ A bo dechad er a budech ngdiak di lebelkul a kmo kede mengeroid er kid er aike el mo uchul a mondai. Ngdirrek el kired el osiik a rolel a meruul a budech lobengterir a rechad e melisiich er a rudam me a rudos er kid el mo mesmechokl a mlo mekngit er a delongelir. (Fil. 4:2, 3; Jak. 3:17, 18) Ngsebeched el di kid loker: ‘Ngak, ngngera kkongei el mengoit me  bo lsebechek lomudech er a delongelek ngak me a rechad? A odam me a odos a letemellii a renguk, e ak orreked a kngtil a renguk? Ngak ak mengiil er a chad el me meruul er a budech ada ngngak a mo osiik a rolel alta ngngii a ulemuchel er a mondai? Sel lsebechel, e ngak ak melisiich er tirke el kakngit el mo meruul er a budech?’

12. Ngmilekera Jesus e ochotii a blekokuii?

¹² A Jesus a kmal mle bekokuii. (Mt. 11:28-30) Ngmle medemedemek e kilengei a uldesuir a rechad a lsebechel, mo lmuut er a chelsel a kmal meringel el blekeradel. El ua tiang, a redil er a Kanaan er a lolengit er ngii el mo omekungil er a ngelekel e ngmle kotouar engdi sera lochotii a mesisiich el klaumerang, e a Jesus a rirellii a ngelekel el mo ungil. (Mt. 15:22-28) Me alta Jesus a mle ungil a rengul engdi ngdimlak lolemolem a mekngit. A lebebil e ngulechotii a blekokuii loeak a mesisiich el tekingel el mora rebetik er a rengul. El ua tiang, a Petrus er a longitechut er a Jesus me ngmo diak loruul er a soal a Jehovah, e ngsilmecheklii er mederir tirke el bebil er a redisaiplo. (Mk. 8:32, 33) Ngdimlak loruul er tiang lomekrur er ngii ngbai mle train er a Petrus e dirrek el olachidnger el mo er tirke el kuk bebil er a redisaiplo el kmo, lak loruul a tekoi el diak a llemeltir er ngii. Nguaisei el Petrus a locha mlo merur engdi tia mlo uchul a klungiolel.

13. Ngmekera dochotii el kmo ngmera el soad el mo bekokuii?

¹³ A lsekum e ngmera el soad el mo bekokuii el mora rebetik er a rengud e a lebebil e nglocha mo kired el di bleketakl el mengedecheduch er tir. Sel doruul er tiang e bo doukerebai er a Jesus el lomesmechokl er kid a mengai a uchetemel er a Bades. Kede medemedemek el mengedecheduch. E melatk a ungil el kirel a chad, e oumerang el kmo tirke el betik a rengrir er a Jehovah me kau a mo ungil ngmai omesmechokl er kau. Di lekau loker: ‘Ngak ngngar er ngii a blekengek el mo mengedecheduch er a betik er a renguk a lsekum ak mesa el kmo ngmeruul er a diak lungil? A lsekum e ngkirek el mesmechokl er a chad, e ngak a kungil mengedecheduch me a lechub e ngdiak? Ngera moktek er ngak el mesmechokl er ngii? Ngak ak mesmechokl er ngii le ngchecherd a renguk er ngii, me a lechub e ak melatk er a ungil el kirel?’

14. Ngmilekera Jesus e ochotii a ungilreng?

¹⁴ A Jesus a diak di lodengelii a ungil ngdirrek el meruul a ungil. Ngbetik a rengul er a Demal me ngblechoel el meruul a llemalt e melemalt a moktek er ngii el meruul. A ungil a omerellel el chad a blechoel el osiik a rolel e ngolengeseu er a rebebil e dirrek el meruul a ungil kirir. Me nguaisei engdi ngdiak el sebeched el di mo medenge melemalt el tekoi el kired el meruul. Ngkmal kired el mo remuul e dirrek el meruul el melemalt a moktek er kid. Kede locha mo melatk, ‘Ngsebechel a chad el meruul a llemalt engdi ngdiak el melemalt a moktek er ngii?’ Chochoi, ngsebechel. El ua tiang, a Jesus a milsaod el kirir a remirruul a ungil el mora rebebil engdi te ulterekeklii el kmo a rechad a mo medengei el kirel. Aika el omerellir alta ngmle ungil engdi a Jehovah kmal dimlak lekengei.​—Mt. 6:1-4.

15. Ngmekera e mera el mo ungil a omerelled el chad?

¹⁵ A lemera el ungil a omerelled el chad e ngdiak doruul a tekoi el melatk er a mo uchul a klungioled. Me ngsebechem el di kau loker: ‘Ngak sel kudengelii a melemalt el tekoi el kirek el meruul er ngii e ak mo rullii? Ngera moktek er ngak el meruul a ungil?’

16. Ngera kired el meruul er ngii er a bek el sils, e ngera uchul?

¹⁶ Lak domdasu el kmo, sel demetecholb e kede mla milid er a beches el chad me kede  ungiang. Ngike el beches el chad a di ua beches el bail el kired el omekerreu er ngii me ngmelemolem el beches. A ta er a rolel e kede meruul er tiang a sel dosiik a techall er a bek el sils el mo olecholt a rodech er a reng. E ngera uchul? A Jehovah a Dios er omeruul e a chedaol reng er ngii a oureor el klisichel. (Gen. 1:2, NW) Me a bek el rodech er a reng a sebechel, e dirrek el kirel el otbechid el mo er omeruul. El ua tiang, a disaiplo el Jakobus a milluches el kmo: “A kloumera el diak chomerellel a ulekoad.” (Jak. 2:26, BT) Tia sebeched el dirrek el melekoi er ngii el kirel aike el lmuut el bebil er a rodech er a reng. Bek el taem el dolecholt a rodech er a reng e kede ochotii el kmo a chedaol reng er a Dios oureor er a chelsed.

17. Kede mo mekerang sel bo lak dolecholt a rodech er a reng?

¹⁷ Mo lmuut er a Rekristiano el mla metecholb el betok el rak me a lebebil e te mo diak lolecholt a rodech er a reng. Engdi sel klou a ultutelel a kmo ngdiak demeterob el melasem. Molatk er tia el okesiu. A lsekum e ke sodelii sel kot el soam el bail, e ke di mereched el mo choitii? Ngdiak. Ke locha mo melasem el rosmii me nglmuut el mo ungil. E a uriul e ke mo mekekokau lousbech er ngii. Ngdi osisiu, a lsekum e ngmo diak mochotii a blekokuii, kllourreng, me a lechub e ngbltikerreng el mora chad, e lak bo el mechitechut a rengum. A lenga er a rengum lolengit a klausubes e ngsebechem el rullii el lmuut el mo ungil e mo sebechem el sumechii a deleuill er kau me a chad. E mrellii er a rengum el mo meruul er a ungil er a ngar medam.

18. Ngera sebechel mo ulterekokl a rengum el kirel?

¹⁸ Kede kmal oba omereng el saul el kirel a kerebai el lebilecherei a Jesus! Sel bo doltirakl er a rolel a lomdasu e ngmo beot er kid a oukerebai er ngii. E sel debo deua Jesus e ngmo sebeched lungil milid er ngike el beches el chad. Ngar tia el suobel e kede mla smaod eua el rodech er a reng. Ngmo klungiolem omongoit a taem el mesuub aike el lmuut el bebil er a rodech er a reng e molatk er a rolel e ke olecholt aika el blekeradel. Ngsebechem el metik a suobel el mesaod aikang sel obora Research Guide for Jehovah’s Witnesses e bo er cheungel a “Christian Life” e momes er cheungel a “Fruitage of the Spirit.” Ngkmal sebechel mo ulterekokl a rengum el kmo, sel omrellii a ngerechelem e a Jehovah mo ngosukau el milau er ngike el beches el chad e melemolem el oubail er ngii.