Ngar tia el bades e a tekoi er a Grik el moiuid el “ungil” a dirrek el mesaod el kirel a llemalt me a lechub e ngungil el omeruul.

Me a Rekristiano a kirir el melatk er tia el mlukrael el tekingel a apostol el Paulus el kmo: “Ele ng somam el di blechoel el meruul a ungil.” Me kede mekerang e mo meruul el uaisei?

A ruumesingd el chad a omes er tir er a dirk er a bek el tutau er a uchei er a letobed el merael. E ngera uchul? E le ngkmal sorir el mo ungil el kltmokl. Engdi ngar er ngii a lmuut el klou a ultutelel el tekoi el kired el rullii, el diak el ungil el klimdeled me a lechub e ngklebokel el biled. A mera el blekerdelel a chad a sebechel el kobekelii me a lechub e ngkikingelii a klebekelel a chad er a ikrel.

Ngkmal bleketakl a Tekingel a Dios el kmo ngblechoel el soad el meruul a mekngit. A Genesis 8:21 a kmo: “A uldesuel [a chad] a di mekngit el omuchel er a dirk le kekerei.” Me ngkired el mo blak a rengud el omtok a mekngit el uldesued me bo el sebeched el meruul a llemalt. A Paulus a milsaod er tia el tekoi er a ledu el kmo: “Ngak a dmeu a renguk er a llechul a Dios er sel kmal chelsel a renguk. E ngdi kmetik er a kuk tar a blekeradel el ngar ngak el oureor, el ngii el blekeradel a omtok er sel llach el ungil er a renguk. Me ng rullak mak kelebus er a llach er a klengit el oureor el ngar a bedengek.”​—Rom 7:22, 23.

El ua tiang, a lsekum a rengud a mo oureng el meruul a mekngit me ngmo soad el omulak, e ngdiak el kired el di mo oltirakl er tia el uldesued. Ngar er ngii a techelled el melilt a tekoi el doruul. Me a lsekum kede oltngakl aika el mekngit el uldesued, e ngsebeched el melemolem el meruul a llemalt alta e kede kiei el iliuekl er a rechad el di mengeblad.

A lsekum ngsoad el blechoel el meruul a llemalt e ngkirel el mo ulterekokl a rengud el kmo ngera melemalt el tekoi. Engdi ngklengiterreng, e le rebetok el chad a mengoit er a klou el temir el di omesiich er tir er a bai lolatk el kirel a llemalt. Tiaikid a uchul me a rebetok a omulak e omdasu el kmo ng llemeltir el meruul el uaisei. Me a babier el The (Honest) Truth About Dishonesty a kmo: “Ngar er ngii a telkelel a blulak el ousbech er ngii a chad e dirk omdasu el kmo ngmelemalt a omerellel.” Me ngmo duubech a ker el kmo, ngar er ngii a ulekrael el sebechel el ngosukid el mo medengei el kmo ngera melemalt el tekoi, alta e a rebetok a omdasu el kmo a telkib el blulak a di ungilbesul? Ngkmal ngar er ngii.

A rebetok el miliol a mla metik el kmo a Biblia a meskid a kot el ungil el ulekrael el kirel tia el tekoi, el diak a ngii di el babier el mo mekesiur. (Psalm 19:7) Ngmeskid a melemalt el ulekrael el kirel a telungalek me a ureor me a klikiid el omeruul me a omengull er kid el mo er a Dios. Ngar er aika el mereko el betok el rak, e ngmla obeketakl el kmo a llach me a omellach er ngii a ungil el kirir a rechad er a bek el beluu, me a kebliil, me a bek el bedengir a rechad. Me sel dosuub er a Biblia e dolatk aike el dosuub e doltaut er a klengar er kid, e kede meksongid el mo blechoel el meruul a llemalt.

 Me nguaisei, engdi a lsekum ngsoad el mo mesisiich er a mekngit el uldesued, e ngkired el meruul a lmuut el betok el tekoi el diak di dosuub er a Biblia e lemerekong. Kid el kiei er a chelsel tia el mekngit el beluulechad, el di orrimel er kid el mo ua uldesuir a rechad er ngii, a uchul me ngkired el meluluuch el olengit a ngeso er a Dios. (Filipi 4:6, 7) Me a doruul el uaisei, e ngmo sebeched el bekeu el dechor el meruul a llemalt er a bek el taem.

A melemalt el omerellel a Hitoshi el dulsaod er ngii er sel kot el suobel a mlo uchul a klungiolel er a uriul. Chelechang e ngoureor el mo er a chad el kmal soal tia el melemalt el omerellel, me ngdmu el kmo: “Ngkmal ungil a renguk e le ngmlo sebechek el metik er a urerek el kuruul er ngii e ngdiak lemetemall a ukltkek.”

A rebebil a dirrek el kongei el kmo tiang a klemerang. Me bo dosaod a tekingir a rechad el ngilai a klungiolir er a loltaut a omellach er a Biblia el kirel a melemalt el omeruul.

• Ngmo Ungil a Ukltked

  “Sera bo el 13 a rekik e ngmlo chetik el ngar er a skuul e mlo oureor el obengterir a remerechorech el chad. Me ngmle bekord el 95% er a kerrekerengek a di mle rrechorech el udoud. E a uriul e ak mlo bechiil e ulemuchel el mesuub er a Biblia ngak me a bechik el obengterir a Resioning er a Jehovah. Aki silubii el kmo a Jehovah * el Dios a ouketui a blulak el omeruul, me aki tilbir el mo melodech a klengar er kemam. Me sera 1990 e aki mlo tuib a rengmam el mo mesiou er a Jehovah e mlo metecholb el Sioning er Ngii.​—Osisechakl 6:16-19.

  “Me a uchei e a blik a di mle mui er a rrechorech el klalo, engdi chelechang e ak mla chemoit el rokui el uchul me ngkmal ungil a ukltkek. Me sel kulatk aike el betok el rak el di kulengeblad e ak kmal mo oba omereng el saul el kirel a klechubechub er a Jehovah. Ngkmal diak a mo mekesiur tia el uldesuek sel bo kmechiuaiu er a bek el klebesei el medengei el kmo a Jehovah a kmal dmeu a rengul el kirek.”​—Cheryl, Ireland.

  “Sel taem er a bo lodengei a merrederek el kmo ngdimlak kengei er a chad el milengeluch er ngak, e ngdilu el kmo: ‘A Dios er kau a uchul me ngsebeched el ultuil er kau! Me tia el kombalii a kmal ngeltengat el ousbech er kau.’ Me sel lemelemalt a omerellek er a bek el taem e ngrullak me ngklikiid a ukltkek er medal a Jehovah el Dios. Ngdirrek el mo sebechek el ngosuir a telungalek er ngak me a relmuut el bebil el mo meruul a llemalt.”​—Sonny, Hong Kong.

• Ngmo er Ngii a Budech er a Uldesued

  “Ngak a oureor el executive assistant er a ta el klou el bank. Me ngar tia el urerek e ngbai klou a ultutelel el bo demerau er a bai doruul a llemalt. Me ngkmal mesisiich a uldasu el kmo: ‘Ngera telemellel a telkib el blulak a lsekum e ngsebechel el mo uchul a ilteet me a ungil el keizai er a beluu?’ Engdi ngmo er ngii a budech er a uldesuek sel kulemolem el meruul a llemalt. Ak mla tibir er a renguk el di melemolem el meruul a llemalt alta e ak mo chelebangel a ultok er a uriul. Me a rechad er a urerek a ungil el medengei el kmo ngdiak el sebechek el omulak er tir me a lechub a kumulak el kirir.”​—Tom, Merikel.

• Ngmo Ungil a Uldesued el Di Kired

  “A merrederek a mle soal a kungeblad el kirel a bebil el klekedall er a ureor el mlo dibus, engdi ngdimlak kengei er ngii. Me sera lebetik er tirke el rirechorech a klalo, e ngika el merrederek a mirreng a sulek el kirel a melemalt el omerellek. A melemalt el omeruul er a chelsel a chebirukel el beluulechad a ousbech er a blekeu, engdi a uriul e ngsebechem el nguu a klaumerang me a omengull er a rechad el kirem.”​—Kaori, Siabal.

A ungil el ukltked me a budech er a rengud me a ungil el uldesued el kired a ochotii el kmo ngmo uchul a klungioled a deblechoel el meruul a llemalt. Me kau, ke kongei er tia el uldasu?