Mosuub er a Tekingel a Dios

Ngera Mo Duubech er a Sils er a Kerrekeriil?

Tia el suobel a mesaod a ker el locha mla ta el moker e dirrek el ocholt a nger er ngii er a chelsel a Biblia. A Resioning er a Jehovah a kmal dmeu a rengrir el mo mesaod aika el nger el obengkem.

1. Ngerang a Sils er a Kerrekeriil?

El ua lemocholt er tia el siasing el ngar er a klisiched, e a ruumesingd el chad a omdasu el kmo sel Sils er a Kerrekeriil, e a rebiliol el chad a mo er medal a Dios el mo mukerrekeriil el kirel aike el lurruul er a ngar a mong. A rebebil a mo mukngeltengat er a klengar er a eanged, e a rekuk bebil a mukringel el ngar a beluu er a ngau. Me nguaisei, engdi a Biblia a olecholt el kmo a moktek er a Sils er a Kerrekeriil a mo olsobel er a rechad er a chelebirukel el omeruul. (Psalm 96:13) A Dios a mla tutkii a Jesus el mo Chad er a Kerrekeriil, e ngii a mo olutii a llemalt el mo er a klechad.​—Monguiu er a Isaia 11:1-5; Rellir 17:31.

2. Ngmekerang a Sils er a Kerrekeriil e olutii a llemalt?

A kot el chad el Adam a ulemtok er a Dios, me a rengelekel a mlo chederedall er a klengit, me a ringel, me a kodall. (Rom 5:12) A Jesus a mo omeklemalt a chelebirukel el oeak a lolluut a klengar me a lechub e lolekiis er a rebiliol el chad er a kodall. A babier er a Ocholt a ochotii el kmo tiang a mo duubech er a chelsel a ta el telael el rak el longedereder a Kristus Jesus.​—Monguiu er a Ocholt 20:4, 11, 12.

A remilekiis a mo mukerrekeriil el diak lokiu aike el lurruul er a uchei er a lemad, e ngbai okiu aike el loruul sel lemocholt aike el tekoi el ngar er a iluil el babier, el losaod er ngii a Ocholt er a 20 el bliongel. (Rom 6:7) A apostol el Paulus a millekoi el kmo a “rokui el chad, el ungil ma re mekngit” a mo mekiis er a kodall e mo er ngii a techellir el mo mesuub el kirel a Dios.​—Monguiu er a Rellir 24:15.

  3. Ngerang mo kutmeklii a Sils er a Kerrekeriil?

Tirke el mlad e dimlak a techellir el mo medengelii a Jehovah el Dios e losiou er ngii a mo sebechir el melodech a blekerdelir e mo meruul a ungil. A loruul el uaisei, e te “mo mekiis el mo nguu a klengar.” A rebebil el mo mekiis a mo diak el sorir el mo mesuub el kirel a rolel a Jehovah, me te “mo mekiis el mo medebeakl.”​—Monguiu er a Johanes 5:28, 29; Isaia 26:10; 65:20.

Sel ullebengelel a ta el telael el rak er a Sils er a Kerrekeriil, e a Jehovah a mla ngosuterir a rebekongesenges el chad el mo cherrungel. (1 Korinth 15:24-​28) Tiang a kmal klou el techall! Ngar sel ulebongel el omelasem, e a Dios a mo otebedii a Satan el Diabelong er a diak a btil deliobech, el ble lekelebus er ngii el ta el telael el rak. Seikid e a Satan a lmuut el mo melasem el mengeroid er a rechad er a Jehovah, engdi tirke el chad el mo oltngakl er a Satan a mo oldeu a rengrir el ngar er a chutem el mo cherechar.​—Monguiu er a Isaia 25:8; Ocholt 20:7-9.

4. Ngera kuk ta er a sils er a kerrekeriil el mo uchul a klungiolir a rechad?

A Biblia a dirrek el ousbech er a tekoi el “sils er a kerrekeriil” el mesaod el kirel sel taem el bo lemokngemed tia el mekngit el blekeradel er a beluulechad. Tia el sils er a kerrekeriil a di kiul mo er ngii el di uai a Ieleb er a taem er a Noah, el ulekngemedii a mekngit el telecheroll. Ngkmal ungil e le a merekung el telemellir “tirke el diak lomekerreu er a Dios” a mo uchul e ngsebechel mo er ngii a beches el beluulechad el “rokui tekoi er ngii a llemalt.”​—Monguiu er a 2 Petrus 3:6, 7, 13.

A lsoam a lmuut el omesodel, e momes er a 244-246 el llel tia el babier, el mirruul er Resioning er a Jehovah.

[Siasing el ngar er a 16 el llel]

“The Last Judgement,” by Gustave Doré, 1832-1883

[Credit Line]

Engravings by Doré