A rechad er chelechang a di meleketek a klemedengei er tir er a tekoi er a science. Engdi ngsebechir el di tir el rulleterir a rokui el chad el mo kaubltikerreng? Ngdiak, e le rechad er chelechang a di merechorech e nguibes a rengrir. Me nguaisei, engdi a Dios a mla kutmeklii a moktek er ngii el mo uchul a klungiolir a rechad.​—Monguiu er a 2 Petrus 3:13.

A Tekingel a Dios a mesaod el kmo ngmo er ngii a taem el rokui el chad a mo kaubltikerreng. A rechad a mo kiei el selebechakl e diak a mo melemall er tir.​—Monguiu er a Mika 4:3, 4.

A Dios a milebii a kot el chad el dimlak a rechorecherreng er a uldesuel. Engdi ngikang a ngileltii el mo diak lolengesenges er a Dios, me ngmlo diak el cherrungel. Me kede mlo oudiukes er a rechorecherreng el okiu ngii. Me nguaisei, engdi a Dios a mo ousbech er a Jesus el olutii a klechad me nglmuut el mo cherrungel.​—Monguiu er a Rom 7:21, 24, 25.

A Dios a uldureklii a Jesus el me tongetengii a klengar er ngii el kired e mengkad er sel tekoi el lurridii ngike el kot el chad. (Rom 5:19) Me tia el omerellel a Jesus a meskid a omelatk el mo kiei er sel taem el mo diak a chad el merechorech a rengul.​—Monguiu er a Psalm 37:9-11.