OMESODEL A SUOBEL ER A MEDAL TIA EL BABIER | NGUA NGERA ULDESUEL A DIOS EL KIREL A MEKEMAD?

A Uldesuel a Dios el Kirel a Mekemad er a Irechar

A rechad a kmal mle chuarm. Me te di mle blechoel el meluluuch el olengit a ngeso er a Dios, engdi ngdimlak a ngeso el mei er seikid el taem. Tirkang a chad er a Israel el tir a mle chedal a Dios er a irechar. E a mesisiich el renged er a Ekipten a ulemekcharm er tir. (Exodus 1:13, 14) Me ngkmal mle betok el rak el rechad er a Israel a milengiil er a taem el Dios a mo olsobel er tir. E sola e ngmocha temel a Dios el kutmeklii tia el tekoi. (Exodus 3:7-10) A Biblia a mesaod el kmo ngii el Dios a uluumekemad er a rechad er a Ekipten. Nguldurokl a betok el ringel me a chelebuul el mo er a belurir, e ulekngemedii a king er a Ekipten me a resoldau er ngii er a Bekerkard el Daob. (Psalm 136:15) Me ngulebeketakl el kmo a Jehovah el Dios a mesisiich el “chad er a mekemad” el oumekemad el kirir a rechedal.​—Exodus 15:3, 4.

 Me a omerellel a Dios el uluumekemad er a rechad er a Ekipten a ochotii el kmo ngdiak el chetil a rokui el mekemad. A lebebil er a taem e nguleldurech er a rechedal el chad er a Israel el mo oumekemad. El ua tiang, ngulderecheterir el mo oumekemad er a rechad er a Kanaan el tir a kmal mle mekngit a blekerdelir. (Duteronomi 9:5; 20:17, 18) Ngdirrek el dilu er a King er a Israel el David me ngmo oumekemad er a rechad er a Filistia el tir a di ulemecheracheb er tir. E a Dios a dirrek el ngilsuir a David er a betok el mekemad el leblo er ngii, me ngdi mlo mesisiich er ngii el rokui.​—2 Samuel 5:17-25.

Aika el cheldecheduch er a Biblia a meketeklii el kmo, sel lebo er ngii a uldikel me a odechelakl el mo er a rechad er a Israel e a Dios a kutmokl a mekemad el mo omekerreu er a rechedal e mengeluolu er a mera el omengull me lak leriid. Engdi ngungil a bo dekerekikl el omtab a edei el meklou a ultutelel el tekoi el kirel a mekemad el lekengei a Dios.

1. NGDI TA EL DIOS A MELILT ER A REMO OUMEKEMAD. A ta el taem e a Dios a dilu er a rechad er a Israel el kmo: “Ng kmal diak bo moumekemad er tial mekemad.” E ngera uchul? E le ngii el Dios a mo oumekemad el kirir a rechedal. (2 Kronika 20:17; 32:7, 8) Ngmle betok el taem el loruul el uaisei, el ua dulsaod er a uchelel tia el suobel. A lebebil er a taem e ngoldurech er a rechedal el chad er a Israel el mo oumekemad aike el mekemad el lekengei, el uldimukl er aike el mekemad el mo uchul a osebechakl me a ulekerreu er a belurir el Beluu er a Nglat.​—Duteronomi 7:1, 2; Josua 10:40.

2. NGDI TA EL DIOS A MELILT EL KMO NGOINGERANG E NGMO ER NGII A MEKEMAD. A rechedal a Dios a mle kirir el oba kllourreng e mengiil er a temel a Dios e mochu oumekemad er tirke el ulemekcharm er tir. Me ngdiak di el tir el omuchel a mekemad, e le sel loruul el uaisei, e te di blechoel el mo mechitechut e le ngdimlak lenguu a kengei er a Dios. Me a Biblia a meketeklii el kmo, a lsekum a rechad er a Israel a di tir el muchelii a mekemad el dimlak lenguu a kengei er a Dios, e ngdi blechoel el mo uchul a klou el chelebulir. *

3. A DIOS A CHETIL A LEMAD A RECHAD EL ULDIMUKL ER A REMEKNGIT EL CHAD. A Jehovah el Dios a Ngike el Uchul a klengar e ngike el Ulemeob er a rechad. (Psalm 36:9) Tiaikid a uchul me ngdiak el soal a lemad a rechad. Engdi ngklengiterreng e le te ngar er ngii a remekngit a blekerdelir el chad el sorir el omekcharm e omekoad er a rebebil. (Psalm 37:12, 14) Me a Dios a mla oterekeklii a temel el mo olekngemed er chouaitirka el mekngit el chad. Me nguaisei, engdi ngar er aike el taem el lekilengei me te mo oumekemad a rechad er a Israel, e ngdi mle blechoel el olecholt a “klechubechub” me a kllourreng el mo er tirke el chad el ulemekcharm er a rechedal el chad er a Israel. (Psalm 86:15) El ua tiang, sera ledu er a rechad er a Israel el mo oumekemad e ngdilu er tir me le besterir a recherrouir “a techall er a budech,” me lebo er ngii a techellir el melodech a uldesuir me lak bo loumekemad er tir. (Duteronomi 20:10-13) Me tiang a ochotii el kmo a Dios a kmal chetil ‘el mesa tal mekngit el chad el mad. Ng bai soal el mesang el mo diak le ngar a klengit me ng diak le mad.’​—Esekiel 33:11, 14-16. *

Me sel domtab aika el tekoi el bla desaod e ngmeketeklii a uldesuel a Dios el kmo ngdi soal el oumekemad el olekngemed aike el tekoi el mo uchul a ringel me a chelebirukel e merekong. Engdi ngdiak el chad e ngbai Dios a ngike el ngar er ngii a llemeltel el melilt el kmo ngoingerang e ngmo er ngii a mekemad e melilt er a remo oumekemad. Me tiang belkul a kmo a Dios a kmal dmeu a rengul el omekoad er a rechad? Ngkmal diak leuaisei, ngbai kmal ouketui a uldikel. (Psalm 11:5) Me a uldesuel a Dios el kirel a mekemad, ngmlengodech er sel taem er a lomuchel a Ngelekel el Jesus Kristus el meruul er a omesiungel?

[Aike el footnote]

[Blurb el ngar er a 4 el llel]

Alta e a Dios a kilengei er a mekemad el kirir a rechad er a Kanaan, engdi ngulsebelterir a rebebil el ua Rahab me a telungalek er ngii