Vo Jehova family layva kshteaht hott, hott eah havva vella es eldra di vann’s sinn es acht gevva uf iahra kinnah. (Kolosser 3:20) ’Sis in eiyah blatz fa eiyah kinnah lanna fa leevi havva fa Jehova, so’s si ufvaxa kenna un vissa vass recht un letz is. (2 Timotheus 1:5; 3:15) Diah misset aw lanna vass in eiyah kind sei hatz is. Eiyah ayknah example is aw reeli importand. Da besht vayk fa eiyah kinnah lanna veyyich di Bivvel is vann’s seahsht uf eiyah aykna hatz is.​—Psalm 40:8.

VASS DI BIVVEL SAWKT: “Loss alli mann kshvind sei fa heahra, shloh fa shvetza.” (Jakobus 1:19) Diah vellet havva es eiyah kinnah shpiahra es si kenna shvetza zu eich ennichi zeit. Si missa vissa es diah reddi sind fa abheicha vann si shvetza vella. Machet’s so comfortable es diah kennet, so’s eiyah kinnah’s eesi finna fa eich sawwa vi si feela. (Jakobus 3:18) Vann si denka es diah kshvind upset vaddet adda shvetza zaylet unni ab heicha, dann mechta si fleicht nett alles sherra mitt eich. Seind geduldich mitt eiyah kinnah un sawwet si oft vi feel leevi es diah hend fa si.​—Matthäus 3:17; 1 Korinther 8:1.

VASS DU KANSHT:

• Seind selayva nett zu bissi vann eiyah kinnah shvetza vella zu eich

• Nemmet oft zeit fa aekshli shvetza mitt eiyah kinnah, nett yusht vann problems ufkumma

VASS DI BIVVEL SAWKT: “Deich veisheit is en haus gebaut, un deich goodah fashtand is es shteik gmacht.” (Shpricha 24:3) Daylmohls misset diah veidah gukka es yusht iahra vadda, so’s diah fashtay kennet vi si reeli feela. ’Sis nix neiyes vann yungi shtoft shtrekka adda even shtoft sawwa es si nett reeli mayna. “Ebbah es andvat gebt eb eah abheicht, is unksheit.” (Shpricha 18:13) Vaddet nett kshvind upset.​—Shpricha 19:11.

VASS DU KANSHT:

• ’S macht nix aus vass eiyah kinnah am sawwa sinn, vaddet nett kshvind upset un doond nett innarobda

• Fagesset nett vi diah kshpiaht hend in iahra eld un vass importand voah zu eich

VASS DI BIVVEL SAWKT: “Mei kind, heich ab vass dei daett dich land, un faloss nett di sacha es dei maemm dich gland hott.” (Shpricha 1:8) Jehova hott maemm un daett awl zvay’s recht gevva fa rools macha fa iahra kinnah. Diah misset eiyah kinnah lanna fa eich heicha un respekta. (Epheser 6:1-3) Eldra, seind “gans aynich in meind un gedanka.” Vann diah nett sind, kenna eiyah kinnah sell shpiahra. (1 Korinther 1:10) Vann diah nett agreeyet uf ebbes, boviahret nett’s du fannich eiyah kinnah, koss sell kend macha es si nimmi so feel respekt henn fa eich.

VASS DU KANSHT:

• Shvetzet diveyya un agreeyet uf vi diah eiyah kinnah uf zeeya zaylet

• Vann dich un dei partner nett saym feelet uf vi fa eiyah kinnah uf zeeya, boviah fashtay favass dei partner so feeld

VASS DI BIVVEL SAWKT: “Lann en kind vi eah gay soll.” (Shpricha 22:6) Fa eiyah kinnah fa goot aus drayya, zayld nett yusht haebna. Diah misset en plan havva vi fa eiyah kinnah uf zeeya, un sell maynd aw si macha heicha un even shtrohfa vann’s nohtvendich is. (Psalm 127:4; Shpricha 29:17) ’S maynd nett yusht shtrohfa, avvah es maynd aw eiyah kinnah helfa di reesins fashtay favass di rools gmacht voahra. (Shpricha 28:7) Un, lannet si aw fa leevi havva fa di Bivvel, un si helfa fashtay vi Jehova feeld veyyich sacha. (Psalm 1:2) Dess zayld si helfa so’s si selvaht vissa kenna vass recht un letz is.​—Hebräer 5:14.

VASS DU KANSHT:

• Lannet eiyah kinnah es Gott is iahra friend, un si kenna een trosta

• Helf si, so’s si sayna kenna vass fa sacha es si shawda dutt un vi si vekk bleiva kenna difunn, so vi sacha es ma finna kann uf da Internet un social networks. Lann si vi fa vekk bleiva funn sexual predators