De griechischa Nomen von daut Bibelbuak Openboarunk es Apokáliepsis un bediet “aufdakjen” ooda “opdakjen”. Dis Nomen jeft auntovestonen, om waut daut en dit Bibelbuak jeit: daut moakt openboa, waut vestoaken wia un waut noch mol passieren wudd, lang nodäm aus daut oppjeschräwen wort. Väl von dee Profezeiungen haben sikj nu noch nich erfelt.

Von waut de Openboarunk sikj haundelt

•   Aunfangswieed (Openboarunk 1:1-9)

•   Jesus siene Norechten fa de säwen Vesaumlungen (Openboarunk 1:10 bat 3:22)

•   Eene Vision von Gott, woo hee em Himmel opp sienen Troon sett (Openboarunk 4:1-11)

•   Miere Visionen, wua emma eene waut met de näakjste to doonen haft:

  •   Säwen Säajlen (Openboarunk 5:1 bat 8:6)

  •   Säwen Trompeeten; no jieda eent von de latste dree Trompeeten kjemt een Wee (Openboarunk 8:7 bat 14:20)

  •   Säwen Kommen; jieda Komm voll stalt eent von Gott siene Jerechtsuadeelen väa, waut äwa de Ieed jegoten woat (Openboarunk 15:1 bat 16:21)

  •   Visionen, waut doa wiesen, woo Gott siene Fiend venicht woaren (Openboarunk 17:1 bat 20:10)

  •   Visionen, wua Gott siene Säajnungen fa dän Himmel un de Ieed to seenen sent (Openboarunk 20:11 bat 22:5)

•   Schluss (Openboarunk 22:6-21)

Waut doa fält to weeten toom de Openboarunk vestonen

1.   De Openboarunk es toom Gott siene Deena Moot moaken un nich dee engrulen ooda enenjsten. Väle denkjen aun grootet Ojjlekj, wan dee daut Wuat “Openboarunk”, ooda “Apokalypse”, hieren. Oba aum Aunfank un opp Enj von de Openboarunk sajcht daut, daut deejanje jlekjlich sent, waut doa bennen läsen, daut vestonen un doonen, waut daut sajcht (Openboarunk 1:3; 22:7).

2.   En de Openboarunk es väl en “Tieekjen”, aulsoo en Bildasproak, jeschräwen; doawäajen mott eena nich aules krakjt soo nämen, aus daut doa steit (Openboarunk 1:1, JHF).

3.   Väl Persoonen un Jlikjnisen, waut en de Openboarunk väakomen, sent ea aul en aundre Bibelbieekja to finjen. Biejlikj:

   •   Jehova: Daut es de “Gott em Himmel” un Schepfa, waut aules jemoakt haft (5. Mose 4:39, PB; Psalm 103:19; Openboarunk 4:11; 15:3)

   •   Jesus Christus: Daut es “Gott sien Laum” (Johanes 1:29, PB; Openboarunk 5:6; 14:1)

   •   Soton, de beesa Fient: Daut es Gott sien Jäajna (1. Mose 3:14-15; Johanes 8:44; Openboarunk 12:9)

   •   Daut groote Babel: Daut es een Fient von Gott un von Gott sien Volkj, waut faulsche Glooweslieren vespreet, krakjt soo aus de ieeschtemmasche Staut Babel (1. Mose 11:2-9; Jesaja 13:1, 11; Openboarunk 17:4-6; 18:4, 20)

   •   Daut “Mäa”: Daut sent de schlajchte Menschen, waut Gott nich jehorchen (Jesaja 57:20, PB; Openboarunk 13:1; 21:1)

   •   Sachen, waut ieeschtemma bie daut Aunbädungszelt wieren, soo aus de Bundeskjist, daut Glaussmäa (de Wauschkomm), Lichta (Laumpen), Weiruak un een Opfadesch (Aultoa) (2. Mose 25:10, 17-18; 40:24-32; Openboarunk 4:5-6; 5:8; 8:3; 11:19)

   •   Wille Tieren: Daut es een Bilt fa Rejierungen, waut Menschen oppjestalt haben (Daniel 7:1-8, 17-26; Openboarunk 13:2, 11; 17:3)

   •   Nummasch haben eene besondre Bediedunk un sent foaken nich wuatlich ooda buakstäwlich to nämen (Openboarunk 1:20; 8:13; 13:18; 21:16)

4.   De Visionen haundlen sikj von dän Harn sienen Dach; dis Dach funk aun, aus Gott sien Kjennichrikj aune 1914 oppjestalt wort un Jesus aunfunk, aus Kjennich to harschen (Openboarunk 1:10). Daut mieeschte ut de Openboarunk woat sikj aulsoo en onse Tiet erfellen.

5.   Toom de Openboarunk vestonen, fält eenem krakjt daut, waut eenem uk fält, om aulet aundre enne Schreft to vestonen: daut es Gott siene Weisheit un de Help von soone, waut de Schreft aul vestonen kjennen (Aposteljeschicht 8:26-39; Jakobus 1:5).