KAPITEL 25

Woo kaun ekj opphieren, mie selfst jeschlajchtlich tofrädtostalen?

“Ekj funk aun, mie selfst jeschlajchtlich tofrädtostalen, aus ekj acht Joa wia. Lota lieed ekj daut dan, woo Gott äwa soont denkjt. Un jiedatsmol, wan ekj daut wada fresch deed, jinkj mie daut sea schlajcht. Ekj docht soo: ‘Woo kaun Gott soonen Mensch aus mie noch leewen’” (Luiz).

EN DEE Tiet, wan een Mensch von Kjint no jugentlich endat, kaun daut Sex-Velangen sea stoakj woaren. Dit kaun daut bat doa brinjen, daut eena sikj daut aunwant, sikj selfst jeschlajchtlich tofrädtostalen. * Väle sajen, daut soont nuscht baudat. Dee meenen: “Kjeenem schot daut waut.” Oba daut jeft goode Uasoak, wuarom eena soont nich doonen saul. De Apostel Paulus schreef: “Moakt aules en junt doot waut von june sintliche Natua kjemt, de Huararie” (Kolossa 3:5, PB). Sikj selfst jeschlajchtlich tofrädstalen, deit daut Sex-Velangen nich dootmoaken, daut Jäajendeel: Daut moakt daut bloos stoakja. Un denkj uk mol aun dit hia:

● Wan een Mensch sikj selfst jeschlajchtlich tofrädstalt, dan brinjt dän daut bat doa, daut dee bloos noch aun sikj selfst denkjt. Wan dee daut deit, dan es dee soo voll doavon, daut dee bloos noch well sienen Kjarpa tofrädstalen.

● Wan een Mensch sikj selfst tofrädstalt, dan kaun daut soo wiet komen, daut deejanja een Maun ooda eene Fru bloos noch soo aus een Dinkj sitt, wua dee sien Sex-Velangen kaun tofrädstalen.

● Soon denkjen, waut doavon kjemt, wan een Mensch sikj selfst jeschlajchtlich tofrädstalt, kaun daut veuasoaken, daut Sex haben tweschen een Poa Lied uk nich scheen es.

Enne Städ die selfst tofrädtostalen, proow dien Velangen leewa selfst to kontrollen (1. Tessalonicha 4:4-5). Waut kaun eenem halpen, daut to doonen? De Schreft rot ons too, daut wie soone Städen sellen utem Stich gonen, wua eena kunn soon Sex-Velangen kjrieen (Spricha 5:8-9). Oba waut, wan du die daut aul aunjewant hast, die selfst tofrädtostalen? Veleicht hast du aul jeprooft, doamet opptohieren, oba du hast daut nich kunt. Dan wudd eena leicht kjennen denkjen, daut eena daut kjeenmol wudd kjennen; daut eena aulsoo kjeenmol wudd kjennen soo läwen, aus Gott daut fa rajcht talt. Daut es, woo een Jung äwa sikj docht, waut Pedro heet. Hee sajcht: “Wan ekj wada trigjfoll, dan jinkj mie daut sea schlajcht. Ekj docht soo, daut Gott mie kjeenmol wudd kjennen vejäwen. Un mie wia daut schwoa to bäden.”

Wan die daut soo jeit, dan fot Moot. Doa es Hopninj fa die. Väl jungen Menschen un mau rajcht Elre haben kunt opphieren met sikj selfst tofrädtostalen. Un du kaust daut uk!

Waut kaun ekj doonen, wan ekj mie schuldich feel?

Soo aus wie aul jeseenen haben, kjennen soone sikj sea schuldich feelen, waut de Jewanheit haben, sikj selfst tofrädtostalen. Un daut es secha uk goot, wan eena “no Gottes Wellen betriebt” es, wiels daut kaun eenem halpen, met dise Jewanheit opptohieren (2. Korinta 7:11, JHF). Oba wan eena sikj äwamotich sea schuldich feelt, dan kaun daut krakjt daut Jäajendeel doonen. Eena kaun soo ommootich woaren, daut eena bloos noch well opphieren, doajäajen to schaufen (Spricha 24:10).

Woo iernst es daut, sikj selfst jeschlajchtlich tofrädtostalen? Sikj selfst tofrädstalen, es waut schwienschet. Un eena kaun doaderch “aun veschiedne Lost un Vejnieejen veskloft” woaren, un daut woat soon schlajchtet denkjen bloos oaja moaken (Titus 3:3, PB). Oba eena mott uk nich denkjen, daut sikj selfst tofrädstalen mank de growe Sinden jetalt woat soo aus Huararie (Judas 7). Wan du Trubbel hast met die selfst tofrädstalen, dan denkj nich, daut et eene Sind es, waut nich to vejäwen jeit. Waut doa wichtich es, daut du aunhoolent blifst un kjeenmol opphieescht, doajäajen to schaufen!

Eena kaun sikj sea leicht dolfeelen, wan eena bieaun mol wada trigjfelt. Wan die daut soo jeit, dan hool em Denkj, waut Spricha 24:16 (PB) sajcht: “Wan een jerajchta uk säwen mol felt, steit dee emma wada opp, oba de gottloose ranen sikj en de Grunt.” Bieaun mol trigjfaulen, moakt eenem nich to eenen schlajchten Mensch. Doawäajen jäw bloos nich opp. Enne Städ daut unjasto die daut, waut daut bat doa brocht, daut du trigjfolsd, un dan go daut daut näakjste Mol utem Stich.

Nemm die Tiet toom äwa Gott siene Leew un Metleet nodenkjen. De Psalmenschriewa David haud uk eenjemol sea schlajchtet jedonen un hee säd: “Soo aus een Voda Metleet haft met siene Kjinja, soo haft de HAR Metleet met dee, dee am ferchten. Hee weet von waut wie jemoakt sent; hee denkjt doaraun, daut wie bloos Stoff sent” (Psalm 103:13-14, PB). Jehova denkjt doaraun, daut wie Fäla haben un hee es “reed to vejäwen” (Psalm 86:5, PB). Oba Gott well uk, daut wie ons aunstrenjen un ons vebätren. Waut kaust du dan doonen toom von diene Jewanheit looskomen?

See mol, waut von Tietvedrief du hast. Kjikjst du Films ooda Tellewizhen ooda jeist du opp Internet-Sieden nopp, waut dien Sex-Velangen stoakja moakt? De Psalmenschriewa deed waut goodet. Hee bäd to Gott: “Lenkj miene Uagen auf von nuzloose Dinja” (Psalm 119:37, PB). *

Bemott die, aun waut aundret to denkjen. Een Christ, waut William heet, jeft disen Rot. Hee sajcht: “Ea du schlopen jeist, läs irjentwaut, waut met de Schreft to doonen haft. Daut es wichtich, daut daut latste, waut eena verem schlopen gonen denkjt, waut jeisteljet es” (Filippa 4:8).

Räd met wäm äwa dienen Trubbel. Veleicht schämt sikj die daut, to wäm doaräwa to räden. Oba wan du daut deist, dan woat die daut halpen, von diene Jewanheit loostokomen! Daut es, woo eenen Christ daut jinkj, waut David heet. Hee sajcht: “Ekj räd met mienen Voda äwa dee Sach – bloos wie beid. Ekj woa daut kjeenmol vejäten, waut hee säd. Gaunz ruich un frintlich säd hee: ‘Ekj sie sea brow met die.’ Hee wist daut, daut et nich leicht wia fa mie, am von dit auntoräden. Oba daut, waut hee säd, wia krakjt daut, waut mie sea jeholpen haft.

Mien Voda wees mie een poa Bibelvarzhen, waut mie holpen to vestonen, daut ekj nich een schlajchta Mensch wia. Oba hee wees mie uk waut Varzhen, daut mie daut dietlich wort, woo iernst daut wia, waut ekj jedonen haud. Hee säd, daut ekj mien bastet doonen sull toom daut nich mea doonen un dan wudd wie lota noch mol wada fresch räden. Un hee säd uk, daut wan ekj mol wada trigjfoll, dan sull ekj mie bloos eefach wieda väanämen, daut näakjste Mol lenja uttohoolen, onen daut fresch to doonen. Ekj sull mie uk nich too schlajcht doaräwa feelen.” Woo haft David dit jeholpen? Hee sajcht: “Bloos to weeten, daut aundre om mienen Trubbel omwisten, wia de jratste Help.” *

[Footnooten]

WICHTJA BIBELVARSCH

“Go de Jugentlost ut däm Wajch, un sträw no Jerajchtichkjeit, Gloowen, Leew un Fräd met dee, dee dän Harn ut een reinet Hoat aunroopen” (2. Timotäus 2:22, PB).

IEDEE

Bäd, ea daut Velangen stoakj woat. Froag Jehova Gott, aus hee die woat de “jeistliche Krauft” jäwen, daut du kaust met de Vesieekjunk foadich woaren (2. Korinta 4:7, PB).

HAST DU DAUT JEWIST . . .?

Wan een Mensch sien Sex-Velangen nojeit, dan wiest daut, daut dee schwak es. Oba soon Mensch, waut sikj selfst unja Kontroll helt, wan dee uk auleen es, dee es stoakj.

WAUT EKJ DOONEN WELL!

Ekj kaun miene Jedanken reinhoolen, wan ekj ․․․․․

Enne Städ nojäwen, woa ekj ․․․․․

Waut ekj miene Elren äwa dise Sach well froagen, es ․․․․․

WAUT JLEEFST DU?

● Wuarom es daut wichtich, dit em Denkj to hoolen: Jehova es “reed to vejäwen”? (Psalm 86:5, PB).

● Wan Gott ons met daut Sex-Velangen jemoakt haft un hee sajcht, daut wie ons sellen kontrollen, äwa waut es hee sikj dan secha?

[Takjst]

Nu, daut ekj mienen Trubbel äwastonen hab, hab ekj een reinet Jewessen ver Jehova un daut wudd ekj met nuscht vetuschen!’’ (Sarah).

[Bilt]

Wan een Mensch, waut doa rant, hanfelt, dan doaf dee nich wada gaunz vom freschen aunfangen. Krakjt soo es daut uk, wan doa wäa mol trigjfelt: Daut meent nich, daut dee wada mott gaunz vom freschen aunfangen. Dee kaun bloos wieda doajäajen schaufen