En aule Gloowes ooda Relijionen jeft daut opprechtje Menschen. De goode Norecht es, daut Gott dee sitt un om dee bekjemmat es. Oba foaken es em Nomen von de Relijion uk schlajchtet jedonen worden (2. Korinta 4:3-4; 11:13-15). Un eena hieet ooda läst emma wada, daut eenje Relijionen Grausomkjeit, Mort un Kjrich unjastetten un daut Gloowesleidasch Kjinja mesbrucken. De opprechtje Menschen sent wäajen aul dit sea enteischt. Läs Matäus 24:3-5, 11-12.

De woara Gloowen ieet Gott; de faulsche Gloowes sent dän een Aufschu. Dee lieren Sachen, waut nich met de Schreft stemmen, un vebreeden Läajes äwa Gott ooda doaräwa, waut nom Doot passieet. Oba Jehova well, daut de Menschen de Woarheit äwa am weeten. Läs Liera 9:5, 10; 1. Timotäus 2:3-5.

Gott lat sikj nich teischen von Relijionen, waut väajäwen, am to leewen, oba en Werkjlichkjeit dän Soton siene Welt leewen (Jakobus 4:4). De Schreft nant de faulsche Relijionen “daut groote Babel”. Babel wia de Staut, wua daut no de Sintflut met dän faulschen Gloowen aunfunk. Boolt woat Gott met aule Relijionen, waut de Menschen teischen un unjadrekjen, haustich een Enj moaken. Läs Openboarunk 17:1-2, 5, 16-17; 18:8.

Oba Jehova vejat nich von de opprechtje Menschen, waut noch aulawäajen en de faulsche Relijionen sent. Hee halpt an, de Woarheit to vestonen, un saumelt dee toop. Es daut nich eene goode Norecht? Läs Micha 4:2, 5.

Jehova es om dee bekjemmat, waut de Woarheit leewen un daut rajchte doonen wellen. Hee sajcht an, daut see de faulsche Relijion veloten sellen. Wäa Gott leeft, woat reed sennen, sien Läwen to endren, om am to jefaulen. Läs Openboarunk 18:4.

Opprechtje Menschen em ieeschten Joahundat freiden sikj, aus de Apostel an de goode Norecht brochten. See lieeden, waut Gott noch mol doonen wudd, un woo see kunnen een nieet, tofrädnet Läwen aunfangen, waut werkjlich waut enhilt. Nodäm see de goode Norecht aunneemen, wia Jehova en äa Läwen emma daut ieeschte. Daut es een goodet Biespel fa ons. Läs 1. Tessalonicha 1:8-9; 2:13.

Jehova freit sikj äwa aule, waut ut dän faulschen Gloowen rutgonen un am deenen wellen. Wäa daut deit, kaun sien Frint sennen, eene leeftolje Famielje von Gloowesbreeda kjrieen un noch mol eewich läwen. Läs Markus 10:29-30; 2. Korinta 6:17-18.

Woo scheen woat daut sennen, wan Gott met de faulsche Relijionen ieescht woat een Enj moaken! Dee woaren dan kjeenmol mea kjennen wäm veleiden ooda Oneenichkjeit veuasoaken. Aule woaren veeent dän woaren Gott aunbäden. Es daut nich eene goode Norecht? Läs Openboarunk 18:20-21; 21:3-4.