AUNHANK
Woo en daut Buak Daniel verutjesajcht wia, wanea de Messias komen wudd
DE Profeet Daniel läwd mea aus 500 Joa ea Jesus jebuaren wort. Un doch haud Jehova Daniel don aul openboat, wanea Jesus wudd met heiljen Jeist toom Messias (Christus) jesaulft woaren. Dän Profeet wort jesajcht: “Du sust weeten un vestonen, daut von dan, wan daut Wuat jejäft woat, daut Jerusalem saul wada häajestalt un oppjebut woaren, bat dän Messias, dän Leida, woaren 7 Wäakj mea 62 Wäakj sennen” (Daniel 9:25, NW).
Wanea wudd de Messias no dit no komen? Doatoo mott wie ieescht weeten, von wua de “7 Wäakj mea 62 Wäakj” aunfangen to talen. Daniel wort jesajcht, daut wudd von dan sennen, “wan daut Wuat jejäft woat, daut Jerusalem saul wada häajestalt un oppjebut woaren”. Wanea wia daut? En daut Bibelbuak Nehemia kjenn wie läsen, daut daut “en däm Kjennich Artahsasta sien 20. Rejierungsjoa” wia. En dit Joa wort daut Wuat jejäft, de Mia rom de Staut Jerusalem wada opptobuen (Nehemia 2:1, 5-8). De Kjennich Artahsasta funk aune 475 v. o. T. aun to rejieren; daut sajen uk Jeschichtsforscha. Dän sien 20. Rejierungsjoa wia dan aulsoo en daut Joa 455 v. o. T. De Tiet, waut bat dän Messias vegonen sull, funk en dit Joa aun to talen.
Soo aus Daniel säd, sullen “7 Wäakj, mea 62 Wäakj” vegonen, bat de “Messias, de Leida” komen wudd. Toopjeräakjent sent daut 69 Wäakj. En veschiedne Bibeläwasatungen woat jewäsen, daut sikj daut hia nich om jeweenelje Wäakjen haundelt, oba om Wäakjen von Joaren. Daut meent, jieda Wäakj sent säwen Joa. De Juden ieeschtemma kjanden daut goot. Biejlikj wia bie dee jieda säwendet Joa een Sabat Joa (2. Mose 23:10-11). De 69 Wäakj, waut verutjesajcht wieren, sent aulsoo 69 mol 7 Joa. Dit jeft 483 Joa.
Von daut Joa 455 v. o. T. aun sullen aulsoo 483 Joa vegonen. Soo kjemt eena bat daut Joa 29 e. o. T. Krakjt en dit Joa wort Jesus jedeept un wort de Messias! * (Lukas 3:1-2, 21-22). Es daut nich toom bewundren, woo sikj daut aules krakjt soo romjenomen haft, aus daut verutjesajcht wia?
^ Varsch 2 Von aune 455 v. o. T. bat daut Joa 1 v. o. T. wieren daut 454 Joa. Von daut Joa 1 v. o. T. bat daut Joa 1 e. o. T. es mau een eensjet Joa vegonen, wiels daut kjeen Joa 0 jeef. Un von daut Joa 1 e. o. T. bat aune 29 e. o. T. wieren daut 28 Joa. Wan wie dise Joaren nu aula tooptalen (454+1+28) jeft daut 483 Joa. Aune 33 e. o. T. wort Jesus dootjemoakt; daut wia en de 70. Wäakj von Joaren (Daniel 9:24, 26, NW). En daut 11. Kapitel en daut Buak Die Prophezeiung Daniels – Achte darauf! un opp de Sieden 919-921 en daut 2. Buak von Einsichten über die Heilige Schrift jeit noch mea doaräwa notoläsen. Beid Bieekja sent bie Jehova siene Zeijen to haben.
