FA JUNGE MENSCHEN
9: Sikj selfst kjanen
WAUT BEDIET DAUT?
Sikj selfst kjanen es väl mea aus bloos eenem sienen Nomen un woo eenem von buten lat. Doa es aules met en: waut du fa rajcht un orrajcht talst, waut du jleefst un woo du best.
WUAROM ES DAUT WICHTICH?
Wan du die doa secha äwa best, waut du jleefst un denkjst, dan woascht du doaropp stonen bliewen un du woascht nich tooloten, daut diene Frind die väasajen.
Adrian sajcht: “Väle sent soo aus de oppjestalde Menschen em Kjleedastua, waut sikj de Kjleeda nich selfst wälen, waut see aunhaben. Aundre entscheiden daut fa dee.”
Courtney sajcht: “Ekj hab jelieet, fa daut rajchte entostonen, uk wan daut schwoa es. Ekj acht doaropp, woo de Menschen sikj oppstalen, wan wie toop sent un woo ekj mie dan oppstal. Un soo kaun ekj enwoaren, woont opp iernst miene Frind sent.”
WAUT DE SCHREFT SAJCHT: “Stalt junt nich soo han aus dise Welt deit. Jie sellen derch june niee Jesennunk veendat woaren” (Reema 12:2).
WAUT KAUN EENA DOONEN?
Denkj doaräwa no, waut fa een Mensch du nu krakjt best un en waut fa Stekjen du die west vebätren. Daut kaust du, wan du die daut unjasieekjst, woont diene schwake Sieden sent un woont de stoakje sent un en woone Stekjen du die gaunz secha best. Moak die mol Jedanken äwa dit:
Stoakje Sieden: Waut vesto ekj fein? Waut doo ekj goot? (Biejlikj: Sie ekj emma enne Tiet? Doo ekj mie beoabeiden? Doo ekj sea schaufen? Hab ekj väl toom äwajen?) Waut vonne goode Sachen doo ekj?
EEN ROT: Felt die daut schwoa, diene goode Sieden to seenen? Dan froag diene Elren ooda eenen gooden Frint, waut fa goode Sieden dee bie die seenen.
WAUT DE SCHREFT SAJCHT: “Lot eenem jiedren sien ieejnet Woakj unjasieekjen, un seenen, auf hee doa waut finjt sikj to lowen, un sikj nich aun sienen Noba mäten” (Galata 6:4).
Schwake Sieden: En waut fa Stekjen fält mie daut daut needichste, mie to vebätren? Wanea felt mie daut besonda schwoa, Vesieekjungen wadastonen? En waut fa Stekjen wudd ekj mie sellen dolla beoabeiden?
WAUT DE SCHREFT SAJCHT: “Wan wie sajen, wie haben kjeene Sind, dan lieej wie ons selfst waut väa” (1. Johanes 1:8).
En woone Stekjen ekj mie secha sie: No waut recht ekj mie em Läwen un wuarom? Jleew ekj aun Gott? Waut fa eenen Bewies hab ekj, daut daut eenen Gott jeft? Waut tal ekj fa orrajcht un wuarom? Äwa waut sie ekj mie secha, waut noch komen woat?
WAUT DE SCHREFT SAJCHT: “De Väasecht [woat] die bewoaren, un dien Vestaunt woat die doabie hoolen” (Spricha 2:11).
Veleicht jleichst du uk dit
10 SACHEN, WAUT JUNGE MENSCHEN WEETEN WELLEN
Wäa sie ekj soo rajcht?
Wan du weetst, waut du jleefst un waut diene stoakje un schwake Sieden sent un waut fa Zielen du hast, dan kaust du daut rajchte doonen, wan aundre die uk bemotten wellen.
