Waut de Schreft lieet
Waut woat aun dän Jerechtsdach passieren?
Dis Artikjel rät von Sachen, wua du veleicht aul foaken äwa nojedocht hast un waut de Schreft doatoo sajcht. Jehova siene Zeijen wudden die wellich halpen, dee kloara to vestonen.
1. Waut es de Jerechtsdach?
Väl Menschen stalen sikj dän Jerechtsdach soo väa, aus wan doa wudden dusende Millionen Seelen ver Gott sienen Troon jebrocht woaren un dan no daut no jerecht woaren, waut see ea jedonen haben. Un soo aus daut Bilt oppe rajchte Sied wiest, jleewen dee – woaren eenje äare Beloonunk em Himmel kjrieen un eenje woaren enne Hal jekjwält woaren. Oba no de Schreft no es de Jerechtsdach toom de Menschen Jerajchtichkjeit brinjen (Psalm 96:13). Gott haft Jesus aunjestalt toom de Menschheit Jerajchtichkjeit veschaufen (läs Jesaja 11:1-5; Aposteljeschicht 17:31).
2. Woo woat de Jerechtsdach Jerajchtichkjeit brinjen?
Wäajen de ieeschta Mensch Adam, sikj jäajen Gott stald, haben aul siene Nokomen de Sind un daut Lieden un dän Doot metjeorwen (Reema 5:12). Jesus woat daut aula fiksen, wan hee dusende Millionen Menschen woat vom Doot oppwakjen. Daut Buak Openboarunk wiest, daut dit to dee Tiet passieren woat, wan Jesus Christus woat fa dusent Joa rejieren (läs Openboarunk 20:4, 11-12).
Wan de Doodes ieescht woaren oppstonen, dan woat dee nich no daut no jerecht woaren, waut see verem Doot jedonen haben. Enne Städ daut, woat dee no daut no jerecht woaren, waut see doonen, wan see ieescht vom Doot oppjestonen sent. Dan woaren dee motten daut jehuarsom sennen, waut daut en dee Bieekja sajcht, wua Openboarunk, Kapitel 20 von rät (Reema 6:7). Soo aus de Apostel Paulus säd, woaren doa “de jerajchte uk de ojjerajchte vom Doot oppstonen” un de Jeläajenheit kjrieen, von Gott to lieren (läs Aposteljeschicht 24:15, PB).
3. Waut woat de Jerechtsdach aules volbrinjen?
Dee, waut jestorwen sent un kjeenmol Jehova jekjant un jedeent haben, woaren dan de Jeläajenheit kjrieen toom äa Läwen endren un goodet doonen. Wan dee daut soo doonen woaren, dan sent dee oppjestonen “toom Läwen”. Eenje, waut doa woaren vom Doot oppstonen, woaren oba nich daut doonen, waut Jehova haben well. Dee sent dan oppjestonen “toom jerecht woaren” (läs Johanes 5:28-29, PB; Jesaja 26:10; 65:20).
Wan de Jerechtsdach ieescht woat äwa sennen, waut dusent Joa dieet, dan woat Jehova de Menschen aul haben volkomen jemoakt, soo aus hee sikj daut von Aunfank aun väajenomen haud (1. Korinta 15:24-28). Waut daut nich woat fa eene scheene Tiet sennen, fa aul dee, waut jehuarsom sent! Gaunz tolatst woat Gott Soton dän beesen Fient ut dän Aufgrunt rutloten, wua dee dan aul woat dusent Joa bennen jewast sennen. Dan woat de Soton noch eemol proowen, de Menschen von Jehova auftobrinjen. Oba dee, waut sikj jäajen dän Soton stalen woaren, dee woaren kjennen fa emma oppe Ieed läwen (läs Jesaja 25:8; Openboarunk 20:7-9).
4. Waut von Jerechtsdach woat fa de Menschen noch toom gooden sennen?
De Schreft rät von eenen Jerechtsdach, waut met de vondoagsche Welt woat een Enj moaken. Dis Jerechtsdach, woat soo onverhofs komen, aus en Noah siene Tiet de Äwaschwamunk kjeem, waut aul de schlajchte Menschen en jane Tiet äwatsied brocht. Wie kjennen ons sea freien, daut de “gottloose” Menschen boolt woat venicht woaren un wie woaren kjennen en eene niee Welt läwen, “wua aules woat jerajcht sennen” (läs 2. Petrus 3:5-7, 13; PB).
