یوحنا دی اِنجیل 4:1-54
4 جدوں یسوع* نُوں پتہ لگیا کہ فریسیاں نے سُنیا اے کہ اوہ یوحنا نالوں بوہتے شاگرد بنا رہیا اے تے اوہناں نُوں بپتسمہ دے رہیا اے
2 (اصل چ یسوع آپ بپتسمہ نئیں دیندا سی سگوں اوہدے شاگرد دیندے سن)
3 تے اوہ یہودیہ توں دُبارہ گلیل چلا گیا۔
4 پر اوہنوں سامریہ چوں لنگھ کے جانا پیا۔
5 سفر کردے کردے اوہ سامریہ دے شہر سُوخار چ آیا۔ ایہہ شہر اوس کھیت دے لاگے سی جیہڑا یعقوب نے اپنے پُتر یوسف نُوں دِتا سی۔
6 اوتھے یعقوب دا کُھوہ وی سی۔ یسوع سفر دا تھکیا ہویا اوس کُھوہ* تے آ کے بہہ گیا۔ اوس ویلے دوپہر دے کوئی 12 وجے ہوئے سن۔*
7 اوہدوں اِک سامری عورت کُھوہ تے پانی بھرن لئی آئی۔ یسوع نے اوہنوں کہیا: ”ذرا مینوں پانی تے پیا۔“
8 (اوس ویلے اوہدے شاگرد شہروں کھانا خریدن گئے ہوئے سن۔)
9 عورت نے اوہنوں کہیا: ”تُسی اِک یہودی ہو کے میرے کولوں پانی کیوں منگ رہے او، مَیں تے اِک سامری عورت آں؟“ (اصل چ یہودی سامریاں نال کوئی میل جول نئیں رکھدے سن۔)
10 یسوع نے اوہنوں کہیا: ”جے تینوں خدا دی نعمت دا پتہ ہوندا تے ایہہ وی پتہ ہوندا کہ کون تیرے کولوں پانی منگ رہیا اے تے تُوں اوہدے کولوں منگدی تے اوہ تینوں زندگی دا پانی دیندا۔“
11 عورت نے اوہنوں کہیا: ”ایہہ کُھوہ تے بڑا ڈُونگا اے تے تواڈے کول پانی کڈھن لئی بالٹی وی نئیں اے۔ فیر تواڈے کول زندگی دا پانی کتھوں آیا؟
12 کیہہ تُسی ساڈے پیو دادے یعقوب توں وی وڈے او جنہے سانوں ایہہ کُھوہ دِتا سی تے ایسے کُھوہ توں اوہنے، اوہدے پُتراں تے اوہدے ڈنگراں نے پانی پیتا سی؟“
13 یسوع نے اوہنوں جواب دِتا: ”جیہڑا بندہ ایہہ پانی پیندا اے، اوہنوں دُبارہ پیاس لگے گی۔
14 پر جیہڑا بندہ اوہ پانی پیوے گا جیہڑا مَیں اوہنوں دَواں گا، اوہنوں کدی پیاس نئیں لگے گی سگوں میرا دِتا ہویا پانی اوہدے اندر اِک چشمہ بن جائے گا جدے توں ہمیشاں دی زندگی دا پانی نکلدا رہوے گا۔“
15 عورت نے اوہنوں کہیا: ”ایہہ پانی مینوں وی دے دَوو تاکہ نہ مینوں پیاس لگے تے نہ ای مینوں پانی بھرن لئی وار وار ایتھے آنا پووے۔“
16 یسوع نے اوہنوں کہیا: ”جا، اپنے شوہر نُوں بلا لیا۔“
17 عورت نے جواب دِتا: ”میرا کوئی شوہر نئیں اے۔“ یسوع نے کہیا: ”تُوں بالکل صحی کہیا۔ تیرا کوئی شوہر نئیں اے
18 کیونکہ تُوں پنج ویاہ کر چُکی ایں تے جیہڑے بندے نال تُوں ہُن رہ رہی ایں، اوہ تیرا شوہر نئیں اے۔ تُوں واقعی سچ بولیا اے۔“
19 عورت نے کہیا: ”مینوں لگدا اے کہ تُسی اِک نبی او۔
20 ساڈے پیو دادے ایس پہاڑ تے عبادت کردے سن۔ پر تُسی* کہندے او کہ لوکاں نُوں یروشلیم جا کے عبادت کرنی چاہی دی اے۔“
21 یسوع نے اوہنوں کہیا: ”بیبی، میری گل دا یقین کر۔ اوہ ویلا آ رہیا اے جدوں تُسی نہ تے ایس پہاڑ اُتے تے نہ ای یروشلیم چ اسمانی باپ دی عبادت کرو گے۔
22 تُسی علم دے بغیر عبادت کردے او۔ پر اَسی علم دے نال عبادت کرنے آں کیونکہ نجات دا علم پہلاں یہودیاں نُوں دِتا گیا اے۔
23 پر اوہ ویلا آ رہیا اے سگوں آ گیا اے جدوں باپ دے سچے خادم روح* تے سچائی نال اوہدی عبادت کرن گے۔ اصل چ باپ ایہو جہے لوکاں نُوں ای لبھ رہیا اے جیہڑے اِنج اوہدی عبادت کرن۔
24 خدا روح اے تے اوہدی عبادت کرن والیاں لئی ضروری اے کہ اوہ روح* تے سچائی نال عبادت کرن۔“
25 عورت نے اوہنوں کہیا: ”مینوں پتہ اے کہ مسیح آن والا اے۔ جدوں اوہ آئے گا تے سانوں ساریاں گلاں صاف صاف دَسے گا۔“
26 یسوع نے اوہنوں کہیا: ”مَیں اوہی آں۔“
27 اوسے ویلے شاگرد آ گئے تے ایہہ ویکھ کے بڑے حیران ہوئے کہ اوہ اِک عورت نال گل کر رہیا اے۔ پر کسے نے اوہنوں ایہہ نہ پچھیا کہ ”تُوں کیہہ کر رہیا ایں؟“ یاں ”تُوں اوس عورت نال گل کیوں کر رہیا ایں؟“
28 عورت اپنا گھڑا اوتھے ای چھڈ کے شہر چ چلی گئی تے لوکاں نُوں کہیا:
29 ”میرے نال آؤ تے اوس آدمی نُوں ملو جنہے مینوں اوہ سب کجھ دَسیا جو مَیں کیتا۔ کِتے اوہ مسیح تے نئیں؟“
30 ایہہ سُن کے لوک شہروں نکل کے یسوع کول آن لگ پئے۔
31 ایس دوران شاگرد یسوع نُوں کہندے رہے: ”اُستاد،* روٹی کھا لے۔“
32 پر اوہنے اوہناں نُوں کہیا: ”میرے کول ایہو جیہا کھانا اے جدے بارے تُسی نئیں جان دے۔“
33 ایہہ سُن کے شاگرد اِک دُوجے نُوں کہن لگ پئے: ”کیہہ کوئی ہور وی ایہدے لئی کھانا لے کے آیا اے؟“
34 یسوع نے اوہناں نُوں کہیا: ”میرا کھانا ایہہ وے کہ مَیں اپنے بھیجن والے دی مرضی تے چلاں تے اوہدا کم پورا کراں۔
35 کیہہ تُسی ایہہ نئیں کہندے کہ فصل دی واڈھی چ حالے چار مہینے باقی نیں؟ پر ویکھو! مَیں توانوں کہنا واں کہ اپنیاں اَکھاں چُک کے کھیتاں تے غور کرو کہ فصل واڈھی لئی تیار اے۔
36 واڈھی کرن والے نُوں اپنی مزدوری مِل رہی اے تے اوہ پھل یعنی اوہناں لوکاں نُوں جمع کر رہیا اے جیہڑے ہمیشاں دی زندگی پان گے تاکہ بیہہ بون والا تے واڈھی کرن والا مِل کے خوشی منان۔
37 اِنج ایہہ کہاوت سچی ثابت ہوندی اے: اِک بیہہ بوندا اے تے دُوجا واڈھی کردا اے۔
38 مَیں توانوں اوہ فصل وڈھن لئی بھیجیا اے جدے لئی تُسی محنت نئیں کیتی۔ محنت تے دُوجیاں نے کیتی پر پھل توانوں ملیا اے۔“
39 اوس شہر دے بوہت سارے سامری لوک عورت دی ایہہ گل سُن کے یسوع تے ایمان لے آئے کہ ”اوہنے مینوں اوہ سب کجھ دَسیا جو مَیں کیتا۔“
40 ایس لئی سامری اوہدے کول آئے تے اوہنوں کہیا کہ اوہ اوہناں نال کجھ دن ٹھہرے۔ ایس لئی یسوع دو دن اوتھے رہیا۔
41 یسوع دی تلیم سُن کے ہور وی بوہت سارے لوک اوہدے تے ایمان لیائے
42 تے اوہناں نے عورت نُوں کہیا: ”اَسی صرف تیریاں گلاں دی وجہ توں ایمان نئیں لیائے سگوں اَسی آپ سُن لیا اے تے جان گئے آں کہ ایہی آدمی دُنیا دا نجاتدہندہ اے۔“
43 فیر دو دن بعد یسوع اوتھوں گلیل چلا گیا۔
44 اوہنے کہیا سی کہ نبی نُوں اپنے علاقے چ عزت نئیں مِلدی۔
45 جدوں اوہ گلیل پونچیا تے اوتھوں دے لوکاں نے بڑی خوشی نال اوہدا استقبال کیتا کیونکہ اوہناں نے اوہ سارے معجزے ویکھے سن جیہڑے اوہنے یروشلیم چ عید دے موقعے تے کیتے سن کیونکہ اوہ وی اوتھے عید منان لئی گئے ہوئے سن۔
46 فیر اوہ گلیل دے پِنڈ قانا چ آیا جِتھے اوہنے پانی نُوں مے بنایا سی۔ اوتھے اِک شاہی افسر سی جدا پُتر کفرنحوم چ بیمار سی۔
47 جدوں اوس بندے نُوں پتہ چلیا کہ یسوع یہودیہ توں گلیل آ گیا اے تے اوہ اوہدے کول جا کے اوہدے ترلے پان لگ پیا کہ اوہ اوہدے پُتر نُوں ٹھیک کر دَوے جیہڑا مرن والا سی۔
48 پر یسوع نے اوہنوں کہیا: ”تُسی لوک نشانیاں تے معجزے ویکھے بغیر کدی وی ایمان نئیں لیاؤ گے۔“
49 شاہی افسر نے کہیا: ”مالک، میرے گھر آؤ۔ میرا پُتر مرن والا اے۔“
50 پر یسوع نے اوہنوں کہیا: ”جا، تیرا پُتر ٹھیک ہو گیا اے۔“ اوہ آدمی یسوع دی گل تے یقین کر کے اوتھوں چلا گیا۔
51 اوہ حالے راہ وچ ای سی کہ اوہدے غلاماں نے آ کے اوہنوں دَسیا کہ اوہدا پُتر بچ گیا اے۔
52 ایس لئی اوہنے اوہناں نُوں پچھیا: ”اوہ کیہڑے ویلے ٹھیک ہویا سی؟“ اوہناں نے کہیا: ”کل دوپہر کوئی اِک وجے* اوہدا بخار اُتر گیا سی۔“
53 ایہہ سُن کے اوہ سمجھ گیا کہ ایہہ اوہی ویلا سی جدوں یسوع نے کہیا سی: ”تیرا پُتر ٹھیک ہو گیا اے۔“ ایس لئی اوہ تے اوہدے سارے گھر والے ایمان لے آئے۔
54 ایہہ دُوجا معجزہ سی جیہڑا یسوع نے یہودیہ توں گلیل آ کے کیتا سی۔
فٹ نوٹ
^ یاں، ”مالک۔“
^ یاں، ”چشمے۔“
^ یونانی چ: ”چھیواں گھنٹہ۔“
^ یعنی یہودی۔
^ یعنی پاک روح۔
^ یعنی پاک روح۔
^ یونانی چ: ”ربّی۔“
^ یونانی چ: ”ستواں گھنٹہ۔“
