یہوواہ دے گواہواں نُوں اپنے ہمایماناں دی بڑی فکر اے۔ (‏1-‏پطرس 2:‏17‏)‏ ساڈے وچوں بوہت سارے کینیا چ رہن والی بھین ٹینس وانگوں سوچدے نیں۔ اوہنے کہیا:‏ ”‏میں جاننا چاہنی آں کہ پوری دُنیا چ میرے بھین بھرا کیہڑے حالاتاں دا سامنا کر رہے نیں۔“‏ ٹینس تے یہوواہ دے کئی ہور گواہ ایس بارے کیویں جان پاند‌ے نیں؟ 2013 توں ساڈی ویب‌سائٹ jw.org دے خبراں والے حصے چ ایس بارے رپورٹاں دِتیاں جا رہیاں نیں۔‏

 خبراں والے حصے چ بائبل دی ریلیز، امدادی کم، تعمیر دے کم تے ہور کئی دُوجیاں چیزاں بارے دَسیا جاند‌ا اے۔ ایہدے چ اوہناں بھین بھراواں بارے وی خبراں دِتیاں جاند‌یاں نیں جیہڑے اپنے ایمان دی وجہ توں قید چ نیں۔ ایہدے علاوہ مُنادی دِیاں خاص مہماُں تے یادگیری عبادت بارے حوصلہ ودھان والے تجربے وی ہوند‌ے نیں۔ ایہناں خبراں بارے کون تحقیق کر‌دا اے تے ایہناں بارے رپورٹاں کیویں تیار کیتیاں جاند‌یاں نیں؟‏

 خبراں والے حصے نُوں معلومات دین والا شعبہ سنبھالدا اے۔ ایہہ شعبہ ساڈے ہیڈ کوارٹر چ وے تے گورننگ باڈی دی منتظمین دی کمیٹی دی ہدیت دے مطابق کم کر‌دا اے۔ ایس شعبے چ 100 توں زیادہ بھین بھرا نیں جنہاں وچوں زیادہ‌تر اپنے گھراں توں کم کر‌دے نیں۔ اوہناں وچوں کجھ بھین بھرا لکھاری نیں، کجھ تحقیق کر‌دے نیں،کجھ تصویراں بناند‌ے نیں تے کجھ ترجمہ کر‌دے نیں۔ کجھ دا کم سرکاری افسراں، پروفیسراں تے میڈیا نُوں معلومات دینا اے۔ ایس شعبے دی مدد لئی پوری دُنیا چ ساڈیاں 80 توں زیادہ برانچاں وچ معلومات دین والے شعبے بنائے گئے نیں۔‏

 کوئی وی خبر تیار کر‌ن لئی ہیڈ کوارٹر چ معلومات دین والا شعبہ، برانچاں چ موجود معلومات دین والے شعبیاں نال مل کے کم کر‌دا اے۔ جدوں بھرا ایہہ فیصلہ کر لیندے نیں کہ فلاں خبر دُوجے بھین بھراواں نُوں دَسی جانی چاہی دی اے تے اوہ ایہدے بارے ہور تحقیق کر‌دے نیں تے صحی صحی معلومات کٹھی کر‌دے نیں۔ ایہدے لئی کدی کدار ہو سکدا اے کہ اوہ ماہرین دے انٹر ویو وی کر‌ن۔ معلومات کٹھی کر‌ن دے بعد خبر بارے رپورٹ تیار کیتی جاند‌ی اے، اوہدے چ ردوبدل کیتا جاند‌ا اے، اوہنوں فیر توں پڑھیا جاند‌ا اے، اوہدے چ تصویراں شامل کیتیاں جاند‌یاں نیں تے فیر منظوری لئی منتظمین دی کمیٹی نُوں بھیج دِتا جاند‌ا اے۔‏

 ساڈے بھین بھرا خبراں والے حصے بارے کیہہ محسوس کر دے نیں؟ فلپائن چ رہن والی اِک بھین جدا ناں شیرل اے، کہندی اے:‏ ”‏مینوں سویرے سویرے یہوواہ دی تنظیم تے یہوواہ دے بندیاں بارے خبراں پڑھنا بوہت اچھا لگدا اے۔“‏

 بوہت سارے لوک محسوس کر دے نیں کہ ساڈی ویب‌سائٹ jw.org تے جیہڑیاں خبراں دِتیاں جاند‌یاں نیں، اوہ اوہناں خبراں توں بوہت فرق ہوند‌یاں نیں جیہڑیاں میڈیا دیندا اے۔ قازقستان چ رہن والی تاتیانہ کہندی اے:‏”‏شکر اے کہ jw.org تے ایہو جہیاں خبراں ہوند‌یاں نیں جنہاں تے میں بھروسا کر سکنی آں۔“‏ میکسیکو چ رہن والی اِک بھین جدا ناں ایلما اے، اوہ کہندی اے:‏ ”‏میڈیا تے بوہت پریشان کر‌ن والیاں خبراں آند‌یاں نیں۔ پر ساڈی ویب‌سائٹ تے خبراں والے حصے چ ایہو جہیاں رپورٹاں ہوند‌یاں نیں جنہاں توں میرا حوصلہ ودھدا اے۔“‏

 ساڈی ویب‌سائٹ تے خبراں والے حصے چ جیہڑیاں رپورٹاں آند‌یاں نیں، اوہناں تے نہ صرف اَسی بھروسا کر سکنے آں سگوں اوہناں توں ساڈا ایمان وی مضبوط ہوند‌ا اے۔ کینیا چ رہن والا اِک بھرا جدا ناں برنارڈ اے، اوہ کہندا اے:‏ ”‏خبراں والے حصے چ آن والیاں خبراں دی وجہ توں مینوں اِنج محسوس ہوند‌ا اے کہ دُنیا بھر دے بھین بھرا میرے خاند‌ان دا حصہ نیں فیر بھانویں اوہ جِتھے مرضی رہندے ہون۔ میں اوہناں دا ناں لے کے اوہناں لئی دُعا کر سکنا واں۔ نالے خاص اوس پریشانی بارے یہوواہ کولوں اِلتجا کر سکنا واں جدے چوں اوہ لنگھ رہے نیں۔“‏ کینیا چ ای رہن والی اِک بھین جدا ناں بائبرون اے، اوہ کہندی اے:‏ ”‏جدوں وی میں کسے زبان چ بائبل دے ریلیز ہون دی خبر سننی آں تے میں بڑے جوش نال بھر جانی آں کیونکہ ایہہ خبر مینوں یاد دَواند‌ی اے کہ یہوواہ کسے دا طرف‌دار نئیں۔“‏

 اذیت برداشت کر‌ن والے بھراواں بارے خبراں سُن کے وی ساڈا حوصلہ ودھدا اے۔ کینیا چ رہن والی بھین جیکلین کہندی اے:‏ ”‏اوہناں نے جیہڑی دلیری وکھائی اے، اوہدے توں میرا ایمان ہور مضبوط ہویا اے۔ میں ہمیشاں ایہہ جانن دی کوشش کر‌نی آں کہ ثابت قدم رہن چ کیس چیز نے اوہناں دی مدد کیتی اے۔ میں ویکھیا اے کہ اوہناں کماں نے ای بھین بھراواں نُوں مضبوط رکھیا اے جیہڑے ساڈی نظر چ بڑے عام جہے کم نیں،جیویں کہ دُعا کر‌نا، بائبل پڑھنا تے گیت گانا۔“‏

 کوسٹاریکا چ رہن والی اِک بھین بیٹرز ایس گل لئی بڑی شکرگزار اے کہ اوہ خبراں والے حصے چ قدرتی آفتاں بارے خبراں پڑھ سکدی اے۔ اوہ کہندی اے:‏ ”‏قدرتی آفتاں دِیاں خبراں توں میں ایس گل تے غور کر پانی آں کہ ساڈی تنظیم کِنّی چھیتی تے کِنّے ودھیا طریقے نال بھین بھراواں دی مدد کر‌دی اے۔ ایہدے توں مینوں پکا یقین ہو جاند‌ا اے کہ ایہہ تنظیم یہوواہ دی تنظیم اے۔ “‏

 ایہہ کِنّی ودھیا گل اے کہ سانوں دُنیا بھر چ رہن والے اپنے بھین بھراواں بارے خبراں پتہ چلدیاں رہندیاں نیں۔ ایہہ کم تواڈے عطیات دے بغیر نئیں ہو سکدا جیہڑے تُسی donate.dan124.com تے دَسے گئے طریقیاں دے ذریعے دیندے او۔ تواڈے کُھلے دل نال دِتے گئے عطیات لئی تواڈا بوہت شکریہ۔‏