2020 دی کنونشن بوہت یادگار سی کیونکہ ایہہ اوہ پہلی کنونشن سی جنہوں ریکارڈ کر کے انٹرنیٹ دے ذریعے وکھان دا بندوبست کیتا گیا سی۔ پر ملاوی تے موزمبیق چ ساڈے بھین بھراواں نے انٹرنیٹ دے بغیر ایس کنونشن نوں ویکھیا۔ پر ایہہ کِنج ہویا؟‏

 گورننگ باڈی دی منتظمین دی کمیٹی تے تلیمی کمیٹی نے ملاوی تے موزمبیق چ ٹی وی تے ریڈیو تے کنونشن چلان دی منظوری دِتی۔ایہناں مُلکاں چ ٹی وی تے ریڈیو تے کنونشن چلان دی ضرورت کیوں پئی؟ ملاوی چ انٹرنیٹ بوہت مہنگا اے۔ ایس لئی صرف کجھ بھین بھرا ای ایہدا خرچہ چُک سکدے سن۔ ملاوی برانچ دی کمیٹی دے بھرا ولیم چُمبی نے دَسیا:‏”‏اَسی صرف ٹی وی تے ریڈیو دے ذریعے ای بھین بھراواں تک روحانی کھانا پونچا سکنے ساں۔“‏ اوسے برانچ دی کمیٹی دے اِک ہور بھرا لوقا سبیکو نے کہیا:‏ ”‏جے ٹی وی تے ریڈیو تے کنونشن نہ چلائی جاند‌ی تے صرف کجھ بھین بھرا ای ایہنوں ویکھ پاند‌ے۔“‏ ایسے طرحاں موزمبیق چ وی زیادہ‌تر بھین بھراواں لئی انٹرنیٹ دے علاوہ کمپیوٹر ورگیاں مشیناں دا خرچہ چُکنا وی مشکل سی۔‏

 کورونا دی وبا دی وجہ توں بھراواں نے پہلے توں ای ٹی وی تے ریڈیو دے کجھ چینلاں تے ساڈیاں عبادتاں وکھان دا اِنتظام کیتا ہویا سی۔‏ a کنونشن دا پروگرام چلان لئی وی بھراواں نے اوہناں چینلاں توں درخاست کیتی۔‏

 ملاوی چ ساڈے بھراواں نوں ایس مشکل دا سامنا ہویا کہ چینل والے صرف اِک گھنٹے لئی کوئی پروگرام چلاند‌ے سن کیونکہ اوہ سوچدے سن کہ جے کوئی پروگرام لما ہوئے گا تے لوکاں دی اوہدے چ دلچسپی ختم ہو جائے گی۔ پر بھراواں نے اوہناں نُوں دَسیا کہ ایہدے توں لوکاں نُوں بوہت فائدہ ہوئے گا۔ اوہناں نے ایہہ وی دَسیا کہ اَسی تے لاک ڈاؤن چ وی لوکاں نُوں بائبل توں تسلی دے رہے آں تے ایہو جہیاں گلاں دَس رہے آں جنہاں توں اوہ اپنے آپ نُوں تے اپنی خاند‌انی زند‌گی نُوں بہتر بنا سکدے نیں۔ ایہہ سُن کے چینلاں والے کنونشن دا پروگرام چلان لئی راضی ہو گئے۔‏

 ملاوی چ کنونشن دا پروگرام اِک ٹی وی دے چینل تے اِک ریڈیو دے چینل تے چلایا گیا۔ دونویں چینل پورے ملک چ چلدے سن۔ ایس لئی ایہناں تے چلائے جان والے کنونشن دے پروگرام نُوں لکھاں لوک سُن سکدے سن۔ موزمبیق چ کنونشن دا پروگرام اِک ٹی وی دے چینل تے 85 ریڈیو دے چینلاں تے چلایا گیا۔‏

 ایہناں دونواں مُلکاں چ کنونشن دے پروگرام نُوں ٹی وی تے چلان لئی 28 ہزار 227 ڈالر b تے ریڈیو تے چلان لئی 20 ہزار ڈالر خرچ ہوئے۔ ریڈیو دے چینلاں دا خرچہ فرق فرق سی جیویں کہ اِک چھوٹے چینل دا خرچہ 15 ڈالر تے اِک وڈے چینل دا خرچہ جیہڑا پورے ملک تک پہنچے، 2777 ڈالر سی۔

 بھراواں نے بڑی محنت کیتی تاکہ اوہ عطیات دا چنگی طرحاں استمال کر سکن۔ مثال لئی، ملاوی چ ساڈے بھرا چینل والیاں نال گل بات کر کے گھٹ توں گھٹ قیمت تے پروگرام نُوں چلان چ کامیاب ہو گئے۔ اِک چینل توں تے اوہناں نُوں 30 فیصد دی رعایت مِلی۔ ایس وجہ توں 1711 ڈالر دی بچت ہوئی۔موزمبیق چ تے کجھ چینل ایس لئی رعایت دین لئی تیار ہو گئے کیونکہ اوہناں نُوں پتہ سی کہ اَسی ایماند‌ار آں تے وقت تے پیسے ادا کر‌نے آں۔‏

 بھین بھرا ایس گل توں بڑے خوش سن کہ اوہ کنونشن دے پروگرام نُوں ریڈیو تے سُن سکے یاں ٹی وی تے ویکھ سکے۔ بھائی پیٹرک جیہڑے ملاوی دی اِک کلیسیا چ بزرگ نیں، کہندے نیں:‏ ”‏ایس وبا دے دوران گورننگ باڈی دے بھراواں نے ساڈے لئی جو کجھ کیتا اے، اوہدے لئی اَسی اوہناں دے بڑے شکرگزار آں۔“‏ ملاوی توں اِک ہور بھرا جدا ناں آئزک اے، کہندا اے:‏ ”‏ساڈے کول کمپیوٹر یاں ایہو جہی کوئی ہور مشین نئیں اے۔ ایس لئی اَسی یہوواہ دی تنظیم دے بڑے شکرگزار آں کہ اوہنے کنونشن دے پروگرام نُوں ریڈیو تے چلان دا بندوبست کیتا۔ ایس وجہ توں میرا پورا خاند‌ان کنونشن دے پروگرام نُوں سُن سکیا۔ ایہدے توں پتہ چلدا اے کہ یہوواہ اپنے بندیاں نُوں کِنّاں پیار کر‌دا اے۔“‏

 موزمبیق چ اِک مبشر نے زند‌گی چ پہلی واری جیس کنونشن نُوں ویکھیا، اوہ 2020 دی کنونشن سی۔ اوہنے کہیا:‏ ”‏کنونشن دے پروگرام نُوں ٹی وی تے ویکھن دا جیہڑا اِنتظام کیتا گیا اے، اوہدے توں میں جان گیا واں کہ یہوواہ خدا کجھ وی کر سکدا اے۔ سانوں روحانی کھانا دین تے ساڈے ایمان نُوں مضبوط کر‌ن توں ایہہ وبا وی اوہنوں نئیں روک سکی۔ میں ویکھ لیا اے کہ یہوواہ دے بندے اِک دُوجے نال کِنّاں پیار کر‌دے نیں تے مینوں یقین ہو گیا اے کہ ایہی سچا مذہب اے۔“‏

 وائسن ناں دے اِک بزرگ نے کہیا:‏ ”‏ایس وبا دے دوران وفادار غلام نے جیس طرحاں ساڈا خیال رکھیا اے، اوہدے لئی میں بڑا شکرگزار آں۔ کنونشن دے پروگرام نُوں ٹی وی تے ریڈیو تے چلان دی وجہ توں غریب بھین بھرا وی ایہنوں ویکھ تے سُن سکے نیں۔“‏

 منتظمین دی کمیٹی تے تلیمی کمیٹی نے 2021 دی کنونشن نُوں وی کجھ علاقیاں چ ٹی وی تے ریڈیو تے چلان دی منظوری دِتی اے۔ پر ایہدا خرچہ کیویں پورا ہوند‌ا اے؟ تواڈے عطیات توں، جیہڑے تُسی donate.dan124.com تے دَسے گئے فرق فرق طریقیاں دے ذریعے دیندے او۔ اَسی تواڈے کُھلے دل نال دِتے گئے عطیات لئی بڑے شکرگزار آں۔‏