ماحول تے موسم دی تبدیلی بارے اقوامِ‌متحدہ دی رپورٹ 4 اپریل 2022 نُوں آئی جدے چ اقوامِ‌متحدہ دے سیکرٹری جنرل اینٹونیو گوٹیرس نے ایہہ دَسیا:‏ ”‏انسان ایہو جہے کم کر رہے نیں جدی وجہ توں زمین تیزی نال تباہی وَل ودھ رہی اے۔ بوہت چھیتی وڈے وڈے شہر پانی چ ڈُب جان گے۔ گرمی دِیاں اِنج دِیاں لہراں آن گیاں جیہڑیاں پہلاں کدی وی نئیں آئیاں۔ وڈے وڈے طوفان آن گے۔ لوکاں نُوں پانی نئیں لبھے گا۔ پودیاں تے جانوراں دِیاں لکھاں قسماں دا ناں نشان ای مٹ جائے گا۔ ایہہ کوئی کہانی نئیں اے تے نہ ای میں ودھا چڑھا کے دَس رہیا واں۔ سگوں میں اوہی دَس رہیا واں جو سائنس کہہ رہی اے۔“‏

 15 جون 2022 دی اخبار ‏”‏دی نیویارک ٹائمز“‏ چ خبر چھپی سی کہ ”‏سائنس‌دان دَس رہے نیں کہ ماحول تے موسم چ ہون والی تبدیلی دی وجہ توں آن والے سالاں چ امریکہ دے تقریباً سارے دے سارے 423 پارک تباہ ہون دے خطرے چ نیں کیونکہ ودھدی ہوئی گرمی ایہناں تے بھیڑا اثر پا رہی اے۔ اَگ لگن، سیلاب آن، پہاڑاں اُتے تے سمندراں چ جمی برف پگھلن، سمندراں چ پانی ودھن تے گرمی دِیاں لہراں دے خطرے بارے سُن کے اِنج لگدا اے جیویں اَسی بائبل دِیاں گلاں سُن رہے آں۔“‏

 کیہہ کدی زمین دا ماحول تے موسم بہتر ہو سکے گا؟ جے ہاں تے کون ایہنوں ٹھیک کرے گا؟ غور کرو کہ بائبل ایہدے بارے کیہہ دَسدی اے۔‏

 بائبل چ دَسیا گیا اے کہ خدا زمین نُوں تباہ کرن والیاں نُوں تباہ کرے گا۔‏ (‏مکاشفہ 11:‏18‏)‏ ایس ایت توں سانوں تِن گلاں پتہ چلدیاں نیں:‏

1.  1.‏ انسان زمین نُوں نقصان پونچاندے نیں۔‏

2.  2.‏ اِک ویلا آئے گا جدوں زمین نُوں نقصان نئیں پونچایا جائے گا۔‏

3.  3.‏ انسان نئیں سگوں خدا زمین دے ماحول نُوں ٹھیک کرے گا۔‏

 بائبل چ دَسیا گیا اے کہ زمین ہمیشاں قائم رہندی اے۔ (‏واعظ 1:‏4‏)‏ ایہدا مطلب اے کہ ایہہ ہمیشاں آباد رہوے گی۔‏

•   صادق زمین دے وارث ہون گے تے ایہدے تے ہمیشاں وسدے رہن گے۔—‏زبور 37:‏29‏۔‏

 زمین دا ماحول تے موسم پہلے وانگوں فیر توں بالکل صحی ہو جائے گا۔‏

•   سُکی زمین خوشی نال جھوم اُٹھے گی تے بنجر زمین خوشیاں منائے گی۔ اوہ نرگس دے باغ وانگوں کِھڑ اُٹھے گی۔—‏یسعیاہ 35:‏1‏۔‏