یہوواہ دے گواہواں دے طور تے اَسی نہ صرف اپنے گھراں چ پیار محبت نال رہنے آں سگوں لوکاں دی وی اِنج کرن چ مدد کرنے آں۔ اَسی مننے آں کہ خاندان دا اِنتظام خدا نے ای شروع کیتا اے۔ (‏پیدائش 2:‏21-‏24؛‏ اِفسیوں 3:‏14، 15‏)‏ بائبل چ خدا نے ایہو جہے اصول دِتے نیں جنہاں تے عمل کر کے دُنیا بھر چ لوک خوش‌گوار گھریلو زندگی گزار رہے نیں۔‏

 اَسی بائبل چ دِتے مشوریاں مطابق چلن دی پوری کوشش کرنے آں کیونکہ ایہناں دی وجہ توں اَسی چنگے خاوند، چنگی بیویاں تے چنگے ماں پیو بن سکنے آں۔ (‏امثال 31:‏10-‏31؛‏ اِفسیوں 5:‏22-‏6‏:‏4‏؛‏ 1-‏تیمتھیس 5:‏8‏)‏ بائبل چ دِتے گئے اصولاں تے عمل کر کے اوہ لوک وی اپنے اپنے گھراں چ پیار محبت نال رہ سکدے نیں جنہاں دے عقیدے اِک دُوجے نالوں فرق نیں۔ (‏1-‏پطرس 3:‏1، 2‏)‏ غور کرو کہ اوہناں لوکاں نے کیہہ کہیا جیہڑے آپ تے یہوواہ دے گواہ نئیں پر اوہناں دے جیون ساتھی یہوواہ دے گواہ بن گئے نیں:‏

•   ”‏شادی دے پہلے چھے سالاں چ تے ساڈے آپس چ بڑے جھگڑے ہوئے۔ پر جدوں میری بیوی ایوٹ یہوواہ دی گواہ بنی تے اوہ بوہت ای پیار تے صبر کرن والی بن گئی۔ ایہناں تبدیلیاں دی وجہ توں ساڈی شادی ٹوٹن توں بچ گئی۔“‏–‏کلاویر، برازیل۔‏

•   ”‏جدوں میرے خاوند چانسا نے یہوواہ دے گواہواں نال بائبل کورس کرنا شروع کیتا تے میں اوہدی بڑی مخالفت کیتی کیونکہ مینوں لگدا سی کہ یہوواہ دے گواہ خانداناں چ پُھٹ پاندے نیں۔ پر ایہدے بعد میں ویکھیا کہ بائبل دی وجہ توں ساڈا شادی دا بندھن ہور مضبوط ہو گیا اے۔“‏–‏ایگنس، زمبیا۔‏

 مُنادی چ اَسی لوکاں نُوں دَسنے آں کہ بائبل چ لکھے اصول کیویں اوہناں دی مدد کر سکدے نیں تاکہ اوہ ‏.‏.‏.‏

•   اِک چنگا جیون ساتھی چُن سکن

•   شادی دا پہلا سال کامیابی نال پورا کر سکن

•   سُسرالیاں نال صلح تے پیار نال رہ سکن

•   پیسے دھیلے دے معاملے چ سمجھ‌داری نال کم لے سکن

•   اِک دُوجے نال لڑن جھگڑن توں بچ سکن

•   اِک دُوجے نُوں معاف کر سکن

•   بچیاں دی تربیت چنگی طرحاں کر سکن

 ایہہ سچ اے کہ کدی کدار اِنج ہوندا اے۔ مثال لئی 1998 چ سوفریس ناں دی کمپنی نے اوہناں جوڑیاں بارے اِک رپورٹ لکھی جنہاں چ اِک جیون ساتھی یہوواہ دا گواہ بن گیا سی۔ ایس رپورٹ چ دَسیا گیا کہ 20 جوڑیاں وچوں صرف 1 جوڑے نُوں مسئلیاں دا سامنا ہویا۔‏

 یسوع مسیح نے پہلے توں ای دَس دِتا سی کہ اوہدے پیروکاراں دے گھر والے اوہناں دی مخالفت کرن گے۔ (‏متی 10:‏32-‏36‏)‏ اِک تریخ‌دان وِل ڈیورانٹ دے مطابق رومی حکومت دے دوران ”‏مسیحیاں تے ایہہ اِلزام لایا جاندا سی کہ اوہ گھراں چ پُھٹ پاندے نیں۔“‏  aتے اَج وی یہوواہ دے گواہواں تے ایہی اِلزام لایا جاندا اے۔ فیر کیہہ ایہدا مطلب ایہہ وے کہ جیہڑا جیون ساتھی یہوواہ دا گواہ بن دا اے اوہ گھر خراب کردا اے؟‏

 جدوں انسانی حقوق دی یورپی عدالت چ یہوواہ دے گواہواں تے ایہہ اِلزام لایا گیا کہ اوہ گھر برباد کردے نیں تے عدالت نے یہوواہ دے گواہواں دے حق چ فیصلہ سناندے ہوئیاں کہیا کہ اکثر گھراں چ مسئلے اوہناں لوکاں دی وجہ توں پیدا ہوندے نیں جیہڑے یہوواہ دے گواہ نئیں ہوندے۔ ”‏اوہ ایس گل نُوں نئیں من دے کہ اوہناں دے گھر دا جی اپنی مرضی نال اپنا مذہب چُن سکدا اے۔“‏ ایہدے علاوہ عدالت نے کہیا کہ ”‏ایس مسئلے دا سامنا صرف یہوواہ دے گواہواں نُوں ای نئیں اے سگوں اوہناں ساریاں خانداناں نُوں وی اے جنہاں چ گھر دے جیاں دا مذہب اِک دُوجے توں فرق ہوندا اے۔“‏ b ایہنے مذہبی تعصب دے باوجود یہوواہ دے گواہ بائبل دی ایس گل تے عمل کرن دی پوری کوشش کردے نیں کہ ”‏ بُرائی دے بدلے بُرائی نہ کرو تے جتھوں تک ممکن ہووے، اپنے وَلّوں ساریاں نال امن نال رہوو۔“‏–‏–‏رومیوں 12:‏17، 18‏۔‏

 یہوواہ دے گواہ بائبل دی ایس نصیحت تے عمل کردے نیں کہ ”‏صرف مالک دے منن والیاں“‏ چ یعنی اپنے ہم‌ایمان نال ای ویاہ کرو۔ (‏1-‏کُرنتھیوں 7:‏39‏)‏ ایہہ نصیحت بوہت ودھیا تے فائدے مند اے۔ مثال لئی 2010 چ اِک مشہور رسالے چ دَسیا گیا سی کہ ”‏جیہڑے میاں بیوی اِک ای مذہب نال تعلق رکھدے نیں، اِکو جہے عقیدے من دے نیں تے مِل کے عبادت کردے نیں، اوہناں دی گھریلو زندگی زیادہ خوش‌گوار ہوندی اے۔“‏ c

 یہوواہ دے گواہ اپنے ممبراں نُوں ایہہ گل کدی وی نئیں سکھاندے کہ جے اوہناں دا ساتھی گواہ نئیں اے تے اوہ اوہنوں چھڈ دین۔ سگوں اوہ بائبل دے ایس حکم تے عمل کردے نیں:‏ جے اِک بھرا دی بیوی اوہدی ہم‌ایمان نئیں اے پر اوہدے نال رہنا چاہندی اے تے اوہ بھرا اوہنوں نہ چھڈے۔ ایسے طرحاں، جے اِک بھین دا شوہر اوہدا ہم‌ایمان نئیں اے پر اوہدے نال رہنا چاہندا اے تے اوہ بھین اوہنوں نہ چھڈے۔—‏1-‏کُرنتھیوں 7:‏ 13،12‏۔‏