Estelle * kin kalapw kohla sarawi iangahki nah seri ko. E nda: “I ndaiong sounpadahk en ahi sarawio me I men sukuhlki duwen Paipel.” Ahpw sounpadahko sohte nda me e pahn kasukuhlih. Kedekedeo, Estelle sohla iang sarawi. E doula nda: “Kaun kan en sarawio ntingdo rehi oh nda me ma I sohte kak iang sarawi, a I en kadaralahte mwohni. I kin medewe, ‘Re sohte nsenohki ma I iang sarawi; re mente ale nei mwohni.’”

Angelina me kin poadidi ong eh pelien lamalamo nda: “Nan ei sarawio, re kin weuwaseli delen meirongo pak siluh erein sarawi wiewiawi, oh se anahne kihong mwohni loale ahnsou ko koaros. Re kin pekipeki mwohni ahnsou koaros. I kin medewe, ‘Koht sohte kin ketin ieiang aramas pwukat.’”

Pelien lamalam kan ni omw wasa kin doadoahngki soangen wiepe kan pwehn idingkihong aramas akan ren kihong irail mwohni? Met pahrekiong dahme Paipel padahngki?

Sises, me ketin tapiada mwomwohdisohn Kristian, mahsanih: “Nin duwen amwail aleier nin sohte pweipwei, kumwail pil kihwei nin sohte pweipwei.” (Madiu 10:8) Sohte uwen mwohni ehu me kak pwainda padahk kesempwal kan en Paipel oh e anahne kohwong koaros me men sukuhlki.

Ia duwen tepin Kristian ko ar kin apwalihala anahn en mwohni nan arail mwomwohdiso?

Emenemen irail kin kihda eh sawas nin “duwen me e koasoanedier nan kapehde, kaidehk ni mehnseiren de ni mwomwen idihd; pwe Koht kin ketin poakohng me kin perenki kihwei mehkot.” (2 Korint 9:7) Wahnpoaron Pohl koasoia: “Se kin doadoahk nin rahn oh nipwong pwe se en dehr kedirapwahkin kumwail mehkot ni at padahkihong kumwail Rongamwahwo.” (1 Deselonika 2:9) Pohl kin doadoahk nin duwen sounwia ihmw likou pwehn sewese ih nan eh doadoahk en kalohk.—Wiewia 18:2, 3.

Sounkadehdehn Siohwa kan kin kalapw tuhpene nan arail Wasahn Kaudok kan me sohte diren kapwat de sohte nohn laud. Ia duwen arail pwainla pweinen dipwisou de soahng kan me re kin doadoahngki? Re sohte kin weuwaseli delen meirong, re sohte pil kin kadarpeseng kisinlikou en pekipek mwohni. Ahpw koaros me kin kalahnganki arail ale kasukuhl en Paipel kak kihdi arail sawas en mwohni nan koakon en sawas me mi nan Wasahn Kaudok.

Uhdahn mie pweinen wiawihdahn oh pekederpeseng en kisin pwuhk wet. Ahpw ke sohte pahn kilang pakair de kilel kan me kohda pwehn peki mwohni. Dahme kesempwal iei me padahk mehlel en Paipel anahne kohpeseng.

Ia omw madamadau: Mwomwen arail doadoahngki mwohni kin pahrekiong mahsen en Sises oh mehn kahlemeng en tepin Kristian ko?