3 Juan 1:1-14
1 Noqa anciano* qhelqamushayki qanman munasqa Gayo, qantaqa cheqamanta munakuyki.
2 Munasqa amigóy, Diosmanta mañapuyki sanolla kakunaykipaj, tukuy imapitaj allillan risunanpaj, imaynatachus kunanpis allillan rishasunki ajinata.
3 Maytapuni kusikorqani hermanosninchej jamuspa, qanpi cheqa kaj kasqanta willawajtinku, kusikunitaj cheqa kajllapipuni purishasqaykimanta.+
4 Mana imapis astawan kusichiwanchu,* wawasniy cheqa kajpi purishasqankuta uyarisqaymanta nisqaqa.+
5 Munasqa amigóy, allinta ruwanki hermanosta yanapaspa, paykunata mana rejsispapis.+
6 Paykunaqa munakuyniykimanta congregacionman* willarqanku. Ama jina kaspa, ripushajtinkoqa ñanpaj necesitasqankuta jaywariy, Diosta kusichinanpaj jina.+
7 Paykunaqa Diospa sutinrayku willaj jamorqanku, mana creejkunamanta ni imata qochikuspa.+
8 Chayrayku noqanchejqa chay jina hermanosta wajyarikunanchejpuni tiyan,+ ajinamanta yanapakusun cheqa kajmanta willakunanpaj.+
9 Congregacionmanqa cartata qhelqamorqaniña, Diotrefestajrí hermanos ukhupi ñaupajpipuni kayta munan,+ nitaj ima nisqaykutapis valechinchu.+
10 Chayrayku jamuspaqa sutʼiman orqhosaj paypa ruwasqasninta, noqaykupaj sajrata parlashasqantapis.+ Manataj chayllatachu ruwashan, hermanostapis mana respetowan wajyarikuyta munanchu.+ Wajyarikuyta munajkunatapis jarkʼan, congregacionmantapis qharqoyta munan.
11 Munasqa amigóy, ama sajrata ruwajkuna jinaqa ruwaychu, astawanqa allin kajta ruwajkuna jina ruway.+ Pichus allin kajta ruwajqa Diosmantamin.+ Pichus sajra kajta ruwajqa mana Diosta rejsinchu.*+
12 Demetrio cheqa kajman jina kausakusqanqa sutʼi rikukun, tukuy hermanospis paymanta allinta parlanku. Noqaykupis paymanta allinta parlallaykutaj, yachanki jinataj parlasqaykoqa cheqapuni.
13 Ashkharaj tiyan qhelqamusunaypaj, manataj munanichu cartallapi churamuyta.
14 Chayrayku pisimantawan qanwan tinkukuyta munashani, uyapura parlarikunanchejpaj.
Sonqo tiyaykusqalla kakushay.
Amigosninchej napaykamusunku. Qanpis amigosninchejta sapa ujninkuta napaykapuway.*
Sutʼinchaykunasnin
^ Chayri “kuraj runa”.
^ Ichá nillanmantaj “Mana imapis astawan agradecesqa kanaypaj aysawanchu”.
^ Glosariopi congregación nisqata leeriy.
^ Chayri “mana Diosta rikunchu”.
^ Chayri “Amigosninchejta sutisninkumanta napaykapuway”.
