Pillatapis rejsiyta munaspaqa, sutinta tapurinchej. Ajinallatataj Diosta rejsiyta munaspaqa, sutinta yachananchej tiyan. Diosta sutinta willarinawanchejta nejtinchej, ¿imatá niwasunman?

‘Noqa Jehová Dios kani. Chaymin suteyqa’ (Isaías 42:8).

Diosqa sutinta oqharinanchejta munan. Payllataj Jehová sutita churakorqa. Pay nerqa: “Kay suteyqa wiñaypaj kay sutiwantaj rejsisqa kasaj wiñaypa wiñaynintimpaj”, nispa (Éxodo 3:15). Bibliapeqa Diosta nikun: Tukuy Atiyniyoj, Tata, Señor, Dios ima. Wakin runaspa sutisninkupis rikhurillantaj, Abrahán, Moisés, David, Jesús sutis jina. Jinapis Jehová sutipuni astawan ashkha kutista Bibliapi rikhurerqa. Jehová Diosqa sutinta yachananchejta munan. Biblia nin: ‘Yachachunku qan, Jehová sutiyoj, qanlla Altísimo kasqaykita tukuy kay pacha patapi’, nispa (Salmo 83:18, Quechua de Cuzce).

Jesusqa Diospa sutinta oqharerqa. Payqa yachachisqasninman Diosmanta kay jinata mañakunankuta nerqa: “Sutiyki jatunchasqa kachun”, nispa (Mateo 6:9). Paypis Diosmanta mañakushaspa nerqa: “Tatáy, sutiykita jatunchay”, nispa (Juan 12:28). Jesusqa Diospa sutinta oqharerqapuni, jatuncharqataj. Chayrayku Tatanman nerqa: “Paykunaman sutiykita rejsicherqani, rejsichillasajpunitaj”, nispa (Juan 17:26).

Diospa kamachisnenqa sutinta oqharejpuni kanku. Paykunaqa yacharqanku, jarkʼasqas, salvasqastaj kanankupaj, Diospa sutinta oqharinanku kasqanta. Jehová “Diospa sutenqa uj jarkʼachasqa torre  jina; cheqan runasqa chaypi pakakuspa, waqaychasqa kanku” (Proverbios 18:10). “Pillapis Jehová Diospa sutinta oqharispa mañakojqa, salvasqa kanqa” (Romanos 10:13). Bibliaqa niwanchej, Diospa kamachisnin paypa sutinwan rejsisqa kanankuta. Miqueas 4:5 nin: ‘Waj nacionesqa dioskunankoj sutinkupipis purichunku. Noqanchejrí Señorninchej Jehová Diospa sutinpi purisunchej wiñaypaj’, nispa (Hechos 15:14).

Imayna Dioschus kasqanta. Yachayniyoj runas nisqankuman jina, Jehová suteqa niyta munan: “Pay Munayninta Juntʼachin”. Diosqa Moiseswan rejsichikushaspa, sutinmanta jinata nerqa: “Noqa kani pichus kani chay”, nispa (Éxodo 3:14). Hebreo parlaypi oqharikusqan palabrasqa, ajinata nikullanmantaj: “Noqa kasaj imachus kayta munani chay”. Diospa sutenqa, pay tukuy imata rikhurichisqanta yachachiwanchej. ¿Imatawan yachachiwanchej? Munayninta juntʼananpaj, imatapis chayri pillatapis imallamanpis tukuchiyta atisqanta. Diosman churasqanku sutisqa, maypichus kashasqanta, may jina atiyniyojchus kasqanta rikuchinman. Jinapis Jehová sutilla yachachiwanchej, imaynachus Dios kasqanta, imamanchus tukuyta atisqantapis.

Munakuwasqanchejta. Diospa sutenqa cielopi, jinallataj jallpʼapi tukuy ruwasqasninta munakusqanta rikuchiwanchej. Payqa rejsinanchejta munasqanrayku, sutinta may unayña willawarqanchej. Wakin ninku: “Diostaqa ni jaykʼaj rejsisunmanchu”, nispa. Diosninchejrí niwanchej, payta rejsinanchejta, payman qayllaykunanchejta ima (Salmo 73:28).

Diospa sutinta oqharispa, payta rejsiyta munasqanchejta rikuchinchej. Pipis amigoyki kananta munaspaqa, sutiykimanta parlapasunanta ninki. Sutiykita mana oqhariyta munanmanchu chay, ¿chay runa amigoyki kanmanchu? Mana, ¿icharí? Jehová Diospa sutinta mana oqharejtinchejpis, ajinallataj kanman. Payqa sutinta willawanchej, oqharinanchejtataj munan. Sutinta oqharispaqa, payman qayllaykuyta munasqanchejta rikuchinchej. Jehová Diosqa yachan, pikunachus sutinta jatunchasqankuta (Malaquías 3:16).

Diosta rejsinapajqa, sutinta yachananchejpuni tiyan. Chantapis imayna Dioschus kasqanta yachanallanchejtaj tiyan.