TAPANMANTA | ¿TUKUY IMAPI ALLINTA PURIY YANAPAWANCHEJCHU?
Tukuy imapi allinta purej runas, ¿niñachu tiyan?
Hitoshiqa Japón suyupi llankʼarqa cajeromanta, maypichus wajkunaman llankʼayta qoj kanku chaypi. Uj kuti patronninwan uj recibota qhawarishajtinku, patronnenqa falsificananta nerqa. Jinapis Hitoshiqa mana chayta munarqachu. Chayrayku patronnenqa nerqa llankʼayninmanta wijchʼupunanta, chay nisqantataj juntʼarqa.
Killasninmantaj Hitoshiqa manaña llankʼayta maskʼayta munarqachu. Uj kutitaj llankʼayta qoyta munaj runawan parlarishaspa, chay runaman nerqa mana llullakuspa llankʼayta munasqanta. Chay runataj nerqa: “Yuyasqaykeqa uj jina”, nispa. Familianwan amigosninwanqa cheqan kajllatapuni ruwananpaj kallpacharerqanku, paytaj iskayrayasharqaña cheqan kajman jina ruway allillan kasqanmanta. Hitoshi nillarqataj: “Cheqanta parlaspa, ¿allillantachu ruwashani?”, nispa.
Hitoshi imaspichus rikukusqanqa reparachiwanchej mana tukuychu maychus kajta ruwayta munasqankuta. Wakenqa llullakuy allillan kasqanta yuyanku, astawanraj vendespa, rantispataj llankʼajkunaqa. Sudáfrica suyupi tiyakoj warmi nerqa: “Llankʼayniypeqa tukuy llullakunku. Cheqan kajta ruwayqa mana atinapaj jinallachu”, nispa.
Tukuynejpi llulla runas tiyan. Doctor Robert Feldman nisqanman jina runasqa khuskan kuraj chunka minutosta parlashaspa uj kutita llullakunku. Chaytataj nerqa Universidad de Massachusetts nisqapi yachakusqanman jina. Doctor Robert nin: “Chayqa mayta tʼukuchiwarqayku. Mana yuyarqaykuchu llullakuspapuni runas kausasqankuta”, nispa. Runasqa ni pi llullakunawanchejta munanchejchu, jinapis llulla runasqa kallanpuni.
¿Imaraykutaj runas llullakunku, suwakunku, waj sajra imastataj ruwanku? ¿Chaykunata ruway yanapawanchejchu? ¿Imatá ruwasunman mana uj onqoy jina chimpaykunawanchejpaj?
