23 CAJ YACHACUY
Bautizacurga bendecishgami calanqui
Cristiano canapäga bautizacunanchirämi, chaytami Jesús yachachergan (leiriy Mateo 28:19, 20). ‘Bautismo’ nerga, ¿imapätaj parlaycanchi? ¿Imatataj pipis ruranman manaraj bautizacur?
1. ‘Bautismo’ nerga, ¿imapätaj parlaycanchi?
Griego rimaypitami shamun bautizar nishgan palabraga, chayga parlaycan yacucho cuerpunchi “undicänanpaj”. Jesuspis Jordán mayuman yaycurir bautizacurgan, nircur ‘yacupita yargamurgan’ (Mateo 3:13, 16). Canan bautizacuptinchipis chaynolami yacumanraj yaycunchi.
2. Pipis bautizacuptenga, ¿imatanataj juc oraciuncho aunicushga?
Pipis bautizacuptenga, maynami Diosta nishga ‘gamlatami sirvishayqui, gamlapämi cawashaj’ nir. Aumi, chayta auninanpäga Jehovatami lapan shongunwan mañacurish, chaypitaraj bautizacunanpaj. Jina mañacamushganchoga Jehovata wilapan paylata adurananpaj y paypa voluntäninlata rurananpaj. Jesuslata gatinanpäpis aunicunmi, paymi cayno nergan: “Pipis disïpulö cayta munaj cäga, quiquinpa shongun munashanno ama cawachunchu. [...] Nogata mana gatirämaj cäga manami disïpulö canmanchu” (Mateo 16:24). Chauraga pipis bautizacuptinraj y aunicuptinraj Jehovapa amigunman ticran. Nircurga cushi cushilana goyäcun waquin cristiano masincunawanpis.
3. ¿Imacunatataj pipis ruranman bautizacunanpäga?
Pipis bautizacunanpäga Jehová Diospitarämi yachacunan y paymanrämi yäracunan (leiriy Hebreos 11:6). Gampis Jehovataga masraj cuyayculanqui ali yachacushgayquiraycur y ali yäracushgayquiraycur. Chayno captenga masraj munanqui Diospita yachachicuyta y mandätuncunata cäsucuytapis (2 Timoteo 4:2; 1 Juan 5:3). Bibliapis nin: “Chaynami pay munashanno imaypis cawanquipaj”; aumi, quiquiquinami aunicunqui Dioslatana sirvinayquipaj y bautizacunayquipäpis (Colosenses 1:9, 10). a
SHUMAJ YACHACURCUNAPAJ
Mä ricarcushun imatataj yachacunchi Jesús bautizacushganpita y pipis bautizacuyta munarga imacunatataj ruranman.
4. Jesús bautizacushganpitaga ali yachacunapämi caycan
Jesús bautizacushganpita maslata yachacärinayquipaj leipäcuy Mateo 3:13-17. Nircur caycunapita parlapacäriy:
-
¿Itilaraj caycaptinchuraj Jesús bautizacush?
-
¿Umalanmanchuraj yacuta chajchupargan? Chauraga, ¿imanotaj bautizacurgan?
Bautizacurirlanami Jesusga, Dios mandashganno yachachicur galaycurgan. Leipäcuy Lucas 3:21-23 y Juan 6:38 y caypita parlapacäriy:
-
Bautizacurirnaga, ¿imata rurananpätaj Jesusga alapa calpachacurgan?
5. Bautizacunayquipaj yarparga, alitami yarpaycanqui
Bautizacunanpaj pipis yarpaptenga öraga manchacurinmanchi. Pero Jehovata reguinayquipaj masraj calpachacurga, quiquiquimi ‘canansï bautizacuyta munä’ ninquipaj. Waquincunapis chaytami nipäcush, chaypita juc VIDEUTA ricapäcuy.
Leipäcuy Juan 17:3 y Santiago 1:5 y caypita parlapacäriy:
-
¿Imatataj ruranman bautizacuyta munajcuna?
-
Manaraj bautizacurga ‘Gamlapaj cawashaj, gamlatana sirvishaj’ ninchimi.
-
Bautizacurga musyacanmi Jehovalata sirvinapaj juc oraciunta rurashganchi, paylapäna cawanapaj aunicushganchi.
6. Pipis bautizacuptenga familiantanona Jehová chasquin
Bautizacurga, aylupurana hermanunchicunawan cawacunchi. Maypita carpis, ima casta carpis, lapanchina Dioslatana aduranchi y Palabrancho mandacushganta cäsucunchi. Leipäcuy Salmo 25:14 y 1 Pedro 2:17 y caypita parlapacäriy:
-
Cay textucuna nishganno, ¿imatataj tarishun bautizacuptinchega?
WAQUINCUNA NIPÄCUN: “Mastarämi yachacüman bautizacunäpäga”.
-
Chayno niptiquipis, bautizacunayquipaj yarpaycarga, ¿manachuraj calpachacushgayquitaga Dios bendicenga?
ICHIC YACHACUY
Jesusga nergan cristianuman ticranapäga bautizacunanchiraj. Chaypäga Jehovaman yäracushganchega gaga japuy caycanman, cäsucoj runa cashwan y Diostapis aunishwanna paylata sirvinapaj.
Yarpänapaj
-
‘Bautismo’ nerga, ¿imapätaj parlaycanchi, y imanirtaj ali caycan bautizacunapaj yarparga?
-
Pipis bautizacuptenga, ¿imatanataj juc oraciuncho aunicushga?
-
¿Imacunataraj pipis ruranman manaraj bautizacur?
MASLATA YACHACUNAYQUIPAJ
Yachacuy imatataj waquincuna nipäcun bautismupita.
Caycho caycan imataj yanapäshunquiman bautizacunayquipaj.
“Jehovata cuyashpanchega bautismuman chayashunmi” (Wilacamoj, marzo quilla, 2020)
Leiriy imanotaj juc runa ali yarpachacurcur-raj bautizacurgan.
“‘Quiquiquiraj cuentata gocunayqui’ nipäcamaj” (Wilacamoj, 1 febrero quilla, 2013)
Ricäriy bautizacunayquipaj calpachacushgayqui ali cashganta y imanotaj chaypaj alistacunquiman.
a ‘Juc religiunchona bautizacushcä’ pipis niptenga, yapayrächi bautizacunan. Cashgan religiunchoga manami rasunpa cajta yachacushgachu (Ricäriy Hechos 19:1-5 y 13 caj yachacuyta).