Pa ri julio 2022, xbʼan kʼi kamisanik pa kʼi tinamit re ri uwach Ulew:

•   «Ri ukamikal ri político che sibʼalaj etaʼmatal uwach pa Japón [ri ex primer ministro Shinzo Abe] kʼo xubʼan pa kikʼaslemal ri winaq re ri utinamit y re nikʼaj chi tinamit pa ronojel ri uwach Ulew. Rumal che pa Japón qas ta kʼo kamisanik y rumal che kojom jujun taq taqanik rumal ri qʼatbʼal tzij chrij ri ukojik qʼaqʼ» (10 re julio 2022, The Japan Times).

•   «Sibʼalaj xsach kikʼuʼx ri winaq pa Dinamarca are chiʼ jun achi xeʼukamisaj oxibʼ winaq rukʼ qʼaqʼ pa ri centro comercial re Copenhague» (4 re julio 2022, Reuters).

•   «Sudáfrica: 15 winaq xekamik rumal che jujun achijabʼ xkesaj qʼaqʼ pa jun cantina pa ri municipio rech Soweto» (10 re julio 2022, The Guardian).

•   «Pa jun nimaqʼij che tajin kbʼan pa ri 4 re julio pa Estados Unidos xekamisax más che 220 winaq rukʼ qʼaqʼ» (5 re julio 2022, CBS News).

 ¿La kopan na jun qʼij che kʼo ta chi kamisanik? ¿Jas kubʼij ri Biblia?

 Ri Biblia kubʼij che oj kʼo pa «ri kʼisbʼal taq qʼijol», jun tiempo che ri e winaq sibʼalaj e kʼan, kechʼayanik y kekamisanik (2 Timoteo 3:1, 3). Ri kamisanik sibʼalaj kuya xibʼin ibʼ chke ri winaq (Lucas 21:11). Are kʼu, ri Biblia kubʼij che kopan na ri qʼij che ksach uwach ri kamisanik y ri winaq kejeqiʼ na «pa jun kʼolbʼal aj jamaril, pa taq ja ri ko e jeqelik, pa taq kʼolbʼal ri man kʼo ta wi elem chʼuʼj» (Isaías 32:18). ¿Jas kbʼan che usachik uwach ri kamisanik?

 Ri Dios kusachisaj na kiwach ri itzel taq winaq y ri kamisabʼal.

•   «Ri e itzel taq winaq ri man e jik taj kebʼoq na bʼik, naj kʼu keʼekʼaq wi na che ri uwach ulew» (Proverbios 2:22).

•   «[Ri Dios] ukʼisom kitzaʼm ri chʼoʼj kʼa pa ri kʼisbʼal ujutzʼ ri uwach ulew; e uqʼajisam taq ri kʼaqbʼal chʼabʼ, e umuchum taq ri tzʼimaj chʼichʼ, ¡e uporom taq ri karwaj re chʼoʼj!» (Salmo 46:9).

 Ri Dios kusach na uwach ronojel ri kbʼanowik che kʼo kamisanik, rumal che keʼutijoj ri winaq rech kekʼojiʼ pa jamaril.

•   «Pa ronojel ri tastalikalaj nujuyubʼ man kʼo ta jun ri kubʼan ta jun kʼax, je kʼut jachaʼ ri jaʼ kunojisaj ri plo, je kubʼan na ri etaʼmanik ri kuya ri Ajawaxel kunojisaj na ronojel ri uwach ulew» (Isaías 11:9).

•   Xuqujeʼ chanim, ri Dios tajin keʼutijoj ri winaq re ronojel uwach Ulew rech kechʼojin ta chik, kekamisan ta chik y kkikoj ta chi qʼaqʼ, tajin «kekibʼan [...] bʼanbʼal tajibʼal chke taq ri kichʼichʼ re chʼoʼj, [...] ri e kitzʼimaj chʼichʼ kekibʼan taq jos chke» (Miqueas 4:3).

 Rech kawetaʼmaj más chrij ri kubʼij ri Biblia chrij ri kʼakʼ uwach Ulew jawiʼ kriqitaj ta chi wi xibʼin ibʼ, chasikʼij uwach ri kʼutunem «¿Es posible librarse del miedo?».

 Rech kawetaʼmaj chrij ri kubʼan na ri Dios che usachik uwach ri kamisanik, chasikʼij uwach ri kʼutunem «¡Por fin paz en la Tierra!».