¿Imapaqtan kawantsik?
Bibliachö yachatsikunqan
Tsëmanqa tukuynöpam nunakuna pensayan. Wakinqa, “¿imapaqtan kë munduchö kawantsik?” o “¿imapaqtan kamashqa karquntsik?” nirmi pensayan. Bibliachömi willamantsik, nunakunaqa Teyta Dioswan amïgu kanapaq kawanqantsikta. Tsëta maslla entiendirinapaq, Bibliachö wakin ninqampita yachakurishun.
Teyta Diosmi kamamashqantsik. Bibliachömi kënö willakun: “Pëmi [Diosmi] kamamarquntsik” (Salmus 100:3; Apocalipsis 4:11).
Teyta Diosqa manam nunakunata ni imëka kaqkunatapis envänutsu kamashqa (Isaïas 45:18).
Teyta Diosqa pëta wanaqta y imapaq kawanqantsikta musyëta munaqtam kamamarquntsik (Mateu 5:3). Pëqa munanmi musyëta munanqantsikta musyanantsikta (Salmus 145:16).
Diosta wananqantsikta musyanqantsiktaqa rikätsikuntsik, pëta reqinapaq y amïgun kanapaq kallpachakurmi, y tsëtaqa llapantsikmi logrëta puëdintsik. Palabran Bibliachömi kënö nimantsik: “Teyta Diosman witiyë, y pëqa qamkunamanmi witimunqa” (Santiägu 4:8; 2:23).
Teyta Dioswan amïgu kanapaqqa, kamamarnintsik munanqantam cumplinantsik. Bibliachömi imapaq kamamanqantsikta kënö cläru nimantsik: “Teyta Diostam respetanëki y mandakunqankunatam cäsukunëki. Nunaqa tsëpaqmi kawan” (Eclesiastes 12:13).
Shamoq tiempuchö llapan sufritsimanqantsikta Teyta Dios ushakätsiptinqa, mana dejëpa sirweq amïgunkunam mana wanushpa kawakuyanqa. Tsënömi Teyta Dios nunakunapaq munanqanqa, pasëpa cumplikanqa (Salmus 37:10, 11).