Zarïna jutiyoq warmish Rusia nacionchö Bibliapita yachakurir Jehoväpa testïgun kanampaq bautizakunaq. Tsëshi ishkë warmi wamrankunatapis Bibliapita yachatsita munar nacionninman kutikunaq. Peru qellënin mana kaptinshi teytankuna, turin y cuñädan täräyanqan wayiman täraq ëwakunaq. Tsë wayiqa juk cuartuyoqllash kanaq. Y Zarïnataqa teytankuna niyänaq wamrankunata ni ichikllapis Bibliapita mana parlapänampaqshi, y wamrankunatanash niyänaq mamänin Bibliapita parlapaptin mana wiyayänampaq.

Tsëshi Zarïnaqa wamrankunata ni imanö yachatsita mana puëdir yanapëkunampaq Jehoväman mañakunaq (Proverbius 1:8). Tsëpitanash wamrankunata yachatsinampaq pasiaq pëkunawan yarqoq. Tsëchöshi Jehovä Dios llapan kamanqankunapaq parlapaq. Tsënö parlapaptinshi wamrankunaqa Jehoväpita mas yachakuyta munayänaq.

Tsëpitanash, Zarïnaqa wamrankunata mas yachatsinampaq, ¿Imatataq Biblia yachatsikun? a neq librupa pärrafunkunata y tapukuyninkunata juk papelman qellqëkur, bäñu rurinchö këkaq taqshana mäquinapa jawanman churaq. Tsënash wamrankunaqa yëkurir papelta leyirir respuestankunata qellqayaq.

Tsënöshi Zarïnaqa wamrankunata ishkë capïtuluta yachatsinaq. Tsëpitaqa juk wayitash ëwakuyänaq, y mananash pipis michänaqnatsu wamrankunata yachatsinanta. 2016 octubri killash ishkan wamrankuna bautizakuyänaq. Tsë warmi wamrankunaqa, “¡alläpam kushikuyä mamänïkuna imëkanöpa Jehoväpita yachatsiyämanqampita!” niyanmi.