1 Corintius 6:1-20
6 Mëqëkipis creikoq mayikikunawan problëmachö karqa,+ ¿imanirtan Diospa limpiu sirweqninkunaman ëwayänëkipa rantin cortikunaman apanakur mana allita ruraq nunakunaman chätsinakuyanki?
2 ¿O manaku musyayanki Diospa limpiu sirweqninkunaqa llapan nunakunata juzgayänampaq kaqta?+ Y qamkuna llapan nunakunata juzgayänëki këkaptinqa, ¿manaku puëdiyanki ichik problëmakunata juzguëta?
3 ¿Manaku musyayanki angelkunata juzganapaq kaqta?+ Tsëqa, ¿imanir-raq kë vïdachö problëmakunata juzguëta puëdishwantsu?
4 Tsëqa kë vïdachö ima problëmatapis juzgayänëki kaptinqa,+ ¿imanirtan congregacionchö kaqkuna mana allipa rikäyanqan nunakunata juezpaq akrayanki?
5 Tsëtaqa niyaq qamkuna penqakuyänëkipaqmi. ¿Manaku qamkunachöqa juk yachaq nunallapis kan, kikikikunapura problëma kaptin tsëta juzganampaq?
6 Qamkunachöqa, juk creikoqmi creikoq mayinta cortiman chätsin, ¡mana creikoq nunakunapa puntanman!
7 Jukniki juknikikuna pleytuchö kayanqëkiqa penqapashqa këmanmi chätsiyarqunki. ¿Manaku mas alli kanman mana allita rurayäshunëkita dejayanqëki?+ ¿Manaku mas alli kanman engañayäshunëkita dejayanqëki?
8 Tsëpa rantinqa, qamkunam mana allikunata rurayanki y jukkunata engañayanki, ¡creikoq mayikikuna këkäyaptin!
9 ¿Manaku musyayanki mana allita ruraqkunaqa Diospa Gobiernunta mana chaskiyänampaq kaqta?*+ Ama engañayäshunëkita dejayëtsu.* Oqllanakur melanëpaqkunata ruraqkuna,*+ santukunata adoraqkuna,+ mana majanwan oqllanakoqkuna,+ ollqu mayinkuna oqllayänanta permiteqkuna,+ ollqu mayinkunata oqllaqkuna,*+
10 suwakoqkuna, imatapis ërayëpa munaqkuna,+ machakoqkuna,+ insultakoqkuna y pitapis engañar suwapaqkunaqa manam Diospa Gobiernunta chaskiyanqatsu.+
11 Tsënö kaptimpis, wakinnikikunaqa tsënömi kayarqëki. Peru Señor Jesucristupa jutinchö y Diosnintsikpa santu espïritunwanmi limpiuyätsishqa kayarqunki,+ Diospaq rakishqa kayarqunki y allita ruraqnö rikashqa kayarqunki.+
12 Noqapaqqa llapampis allillam, peru manam llapantsu allipaq.+ Noqapaqqa llapampis allillam, peru manam dejashaqtsu imapis controlamänanta.*
13 Mikuyqa pachapaqmi, y pachaqa mikuypaqmi, peru Teyta Diosqa ishkantam ushakätsinqa.+ Cuerpupis manam oqllanakur melanëpaqkunata ruranapaqtsu,* sinöqa Señorpaqmi,+ y Señornam cuerpupaq.
14 Peru Teyta Diosqa Señorta kawaritsirqanmi+ y tsënöllam noqantsiktapis wanushqa këkanqantsikpita poderninwan+ kawaritsimäshun.+
15 ¿Manaku musyayanki cuerpuykikunaqa Cristupa cuerpunchö kaqkuna kanqanta?+ Tsëqa, ¿Cristupa cuerpunchö kaqkunata jipirtsuraq, qellëpaqrëkur jukwan jukwan kakoq* warmipa cuerpuntawan juntäman? ¡Manam tsënötsu!
16 ¿Manaku musyayanki pï nunapis qellëpaqrëkur jukwan jukwan kakoq* warmiwan oqllanakurqa, pëwan juk cuerpulla tikranqanta? Awmi, Teyta Diosqa kënömi nin: “Ishkanmi jukllëllana kayanqa”.+
17 Peru pï nunapis Señorwan juntakaqqa, Señor pensanqannömi pensan.*+
18 ¡Oqllanakur melanëpaqkunata rurëpita* qeshpir ëwakuyë!+ Juk nuna ima jutsatapis* ruranqanqa manam cuerpunchötsu këkan, peru imëka melanëpaq rurëkunata rurar kakoqqa, kikimpa cuerpumpa contranmi jutsata rurëkan.+
19 ¿Manaku musyayanki cuerpuykikunaqa, qamkunachö këkaq Diospita chaskiyanqëki santu espïritupa templun kanqanta?+ Tsëpitapis masqa, qamkunaqa manam kikikikunapanatsu kayanki,+
20 qamkunaqa chaniyoqchömi rantishqa kayarqunki.+ Tsëqa cuerpuykikunawan+ Teyta Diosta alabayë.+
Nötakuna
^ Griëgu idiömachöqa “heredayänampaq kaqta” ninmi.
^ O “ollqu mayinkunawan oqllanakoq ollqukuna”. Griëgu idiömachöqa “ollquwan oqllanakoq ollqukuna” ninmi.
^ Rikäri “Bibliachö palabrakunata entiendinapaq” neqta.
^ O “kikikikuna engañakuyëtsu”.
^ O “dominamänanta”.
^ Griëgu idiömachö: pornëia. Rikäri “Bibliachö palabrakunata entiendinapaq” neqta.
^ Kënöpis niyanmi: oqllanakoq.
^ Kënöpis niyanmi: oqllanakoq.
^ O “Señorwanmi juk espïritulla kayan”.
^ Griëgu idiömachö: pornëia. Rikäri “Bibliachö palabrakunata entiendinapaq” neqta.
^ Kënöpis niyanmi: pecädutapis.