1 Juan 5:1-21
5 Jesus Cristu kanqanta creeqkunaqa Diospa tsurinmi kayan,+ y Teytata kuyaqkunaqa, pëpita yureq kaqtam kuyayan.
2 Teyta Diosta kuyar y mandakunqankunata wiyakurmi, Diospa tsurin kaqkunata kuyanqantsikta musyantsik.+
3 Teyta Diosta kuyarqa, mandakunqankunatam cäsukunantsik.+ Tsënö kaptimpis, mandakunqankunata cäsukuyqa manam alläpa difïciltsu.+
4 Diospa tsurin kaqkunaqa, kë munduchö imëka mana allikunatam venciyan.+ Markäkoq o yärakoq kanqantsikmi, kë munduchö nunakunata vencinapaq yanapamarquntsik.+
5 ¿Pitan kë munduchö imëka mana allikunata vencita puëdin?+ ¿Manaku Jesus Diospa Tsurin kanqanman creeqkuna?+
6 Pëqa, awmi Jesucristuqa, yakuwan y yawarwanmi shamurqan.+ Manam yakullawantsu shamurqan,+ sinöqa yakuwan y yawarwanmi. Y rasumpa kaqta willakoq santu espïritum tsëta musyatsikun.+
7 Kimanmi musyatsikuyan:
8 santu espïritu,+ yaku+ y yawar,+ y kimampis tsëllatam musyatsikuyan.
9 Noqantsikqa nunakuna musyatsikuyanqanta creintsikmi, peru Dios musyatsikunqanqa mas väleqmi. Këmi Teyta Dios musyatsikunqan: Tsurimpaq kikin musyatsikunqan.
10 Teyta Diospa Tsurinman markäkoq o yärakoq nunaqa, pë musyatsinqantam shonqunchö katsin. Diosman mana markäkoq nunaqa, Tsurimpaq musyatsikunqanman mana yärakurmi, Teyta Dios ulikoq o llullakoq kanqanta nikan.+
11 Y këtam musyatsimarquntsik: Teyta Diosqa imëyaqpis kawanapaqmi permitimantsik,+ y tsë kawëqa Tsurinrëkurmi kanqa.+
12 Tsuriwan juknölla kaqqa tsë kawëtam tarinqa, peru Diospa Tsurinwan mana juknölla kaqqa, manam tsë kawëta tarinqatsu.+
13 Këkunataqa qamkunaman qellqamü, qamkuna, Diospa Tsurimpa jutinman markäkoqkuna o yärakoqkuna,+ imëyaqpis kawëta puëdiyanqëkita musyayänëkipaqmi.+
14 Këpitam següru këkantsik:*+ munanqanmannö imatapis mañakushqaqa, pëqa wiyamantsikmi.+
15 Imata mañakushqapis wiyamanqantsikta musyarqa, pëta mañakushqa karmi mañakunqantsikta chaskinapaq kaqta musyantsik.+
16 Pï nunapis cristiänu mayinta* wanuyman o wañuyman mana chätsikoq jutsata* rurëkaqta rikarqa, pëpaq mañakutsun, y Diosmi kawanampaq yanapanqa.*+ Tsëqa wanuyman chätsikoq jutsata mana ruraqkunallapaqmi. Juk jutsam sïqa wanuyman chätsikun,+ tsë jutsarëkurqa manam mañakunampaq nïtsu.
17 Mana allikunata rurëqa jutsam,*+ peru kanmi wanuyman mana chätsikoq jutsa.
18 Musyantsikmi Diospa tsurin kaqkunaqa, jutsata* mana rurayanqanta, sinöqa Diospa tsurinmi* pëta cuidëkan y Diabluqa* manam imanëta puëdintsu.+
19 Musyantsikmi noqantsikqa Teyta Diospa kanqantsikta, peru kë munduchö nunakunaqa Diablupa* poderninchömi këkäyan.+
20 Y musyantsikmi rasumpa kaq Diosta reqinapaq, Diospa Tsurin shamur+ entiendikoq kanapaq* yanapamanqantsikta. Y Tsurin Jesucristurëkurmi rasumpa kaq Dioswan juknölla këkantsik.+ Pëmi rasumpa kaq Dios y përëkurmi imëyaqpis kawëta puëdintsik.+
21 Kuyë wamralläkuna, santukunata adorëpita cuidakuyë.+
Nötakuna
^ O “pëwan mana mantsakushpa parlantsik”.
^ Griëgu idiömachöqa “wawqinta” ninmi.
^ Kënöpis niyanmi: pecäduta.
^ Tsënö nirqa, capazchi jutsata ruranqampita perdonanqampaq parlëkan.
^ Kënöpis niyanmi: pecädum.
^ Kënöpis niyanmi: pecäduta.
^ Griëgu idiömachöqa “Mana Allita Ruraqqa” ninmi.
^ Tsënö nirqa, Jesucristupaqmi parlëkan.
^ Griëgu idiömachöqa “Mana Allita Ruraqpa” ninmi.
^ Griëgu idiömachöqa “cuentata qokuyta yachanapaq; pensëta yachanapaq” ninmi.
