Juan 20:1-31
20 Semäna qallanan junaqnam,* tempränulla, ampillaraq o tsakëllaraq* këkaptin Marïa Magdalënaqa sepultüraman ëwarqan,+ y sepultürata tsaparaq rumita läduratsishqa kayanqantam rikarqan.+
2 Tsëmi Simon Pëdruman y Jesuspa mas kuyë qateqninman cörripa ëwar+ kënö nirqan: “Señor Jesustam sepultürapita apakuyashqa,+ y manam musyëtsu mëman churayanqan”.
3 Tsënam Pëdruwan Jesuspa juknin qateqninqa sepultüraman ëwayarqan.
4 Ishkanmi juntu cörriyarqan, peru juknin kaqqa Pëdrupitapis mas cörrirmi sepultüraman puntata charqan.
5 Y sepultüraman qawëkurmi, lïnu tëlakuna tsëchö churarëkaqta rikarqan,+ peru manam yëkurqantsu.
6 Qepanta ëwaq Simon Pëdruqa chëkurmi sepultüraman yëkurirqan, y lïnu tëlakunatam tsëchö rikarqan.
7 Jesuspa peqanta o umanta wankuyanqan tëlaqa manam wakin tëlakunawantsu këkarqan, sinöqa juk läduchömi wankurëkarqan.
8 Tsëpitanam puntata chaq qateqnimpis sepultüraman yëkurqan, y rikëkurmi creirqan.
9 Pëkunaqa manam entiendishqaraqtsu kayarqan wanunqampita kawarimunampaq kaqta Diospa Palabranchö ninqanta.+
10 Tsëmi qateqninkunaqa wayinkunata kutikuyarqan.
11 Tsënö kaptimpis, Marïaqa sepultüra lädunchömi waqtachö waqar quedakurqan. Y waqëkarmi sepultüra rurinman qawëkurqan.
12 Jesuspa ayanta churayanqanchömi yuraq röpawan vistishqa ishkaq angelkunata rikëkurqan,+ juktam peqan o uman churaranqanchö, y juktanam chakin churaranqanchö.
13 Pëkunanam, “warmi, ¿imanirtan waqanki?” nir tapuyarqan. Tsënam pëqa, “Señornï Jesustam apakuyashqa, y manam musyätsu mëman churayanqanta” nirqan.
14 Tsëta nirir tumanqanchömi Jesusta shëkaqta* rikëkurqan, peru manam Jesus kanqanta cuentata qokurqantsu.+
15 Tsënam Jesusqa, “warmi, ¿imanirtan waqëkanki? ¿Pitataq ashikanki?” nir tapurqan. Pënam huerta cuidaq kanqanta pensar kënö nirqan: “Teytallë, qam apakushqa karqa mëman churanqëkita willëkallämë, y noqam apakulläshaq”.
16 Tsënam Jesusqa, “¡Marïa!” nirqan. Y Marïaqa tumëkurmi hebreu idiömachö “¡Rabböni!” nirqan, tsëqa “¡Maestru!” ninanmi.
17 Tsënam Jesusqa nirqan: “Ama tsarämënatsu, manaran Teytaman witsäraqtsu. Wawqïkunaman ëwar+ kënö ninki: ‘Teytäman+ y qamkunapa Teytëkikunaman, Diosnïman+ y qamkunapa Diosnikikunamanmi ëwakushaq’”.
18 Tsënam Marïa Magdalënaqa qateqninkunaman ëwar, “¡Señor Jesustam rikarqö!” nir willarqan. Y Jesus ninqantam pëkunata willarqan.+
19 Semäna qallanan junaqmi* Jesuspa qateqninkunaqa judïukunata mantsarnin wayipa punkunkunata alli segurarkur tardi hörana juntarëkäyarqan. Tsënam Jesusqa pëkunapa chowpinkunachö* yurirkur, “yamëlla këkäyë”+ nirqan.
20 Tsënö nirmi ishkan makinta y costillanta rikätsirqan.+ Qateqninkunaqa Señor Jesusta rikëkurmi alläpa kushikuyarqan.+
21 Tsëpitanam Jesusqa yapë kënö nirqan: “Yamëlla këkäyë.+ Teyta mandamanqannöllam,+ noqapis qamkunata mandëkä”.*+
22 Tsënö nirmi pëkunaman pükëkur kënö nirqan: “Santu espïrituta chaskiyë.+
23 Pipa jutsankunatapis* perdonayaptikiqa, perdonashqam kayanqa; peru pitapis mana perdonayaptikiqa, manam perdonashqatsu kayanqa”.
24 Peru döci apostolkunapita Millish nir reqiyanqan Tomasqa,+ manam tsëchötsu këkarqan Jesus pëkunata yuripuptin.
25 Tsëmi Jesuspa wakin qateqninkunaqa, “¡Señor Jesustam rikäyarqö!” niyarqan. Peru pëqa kënömi nirqan: “Makinkunata clävu uchkunqanta mana rikar, clävu uchkunqanman dëdüta mana churar y costillanman makïta mana yakarqa,+ manam imëpis creishaqtsu”.
26 Tsëpita puwaq junaq pasashqanchönam, qateqninkunaqa yapë wayi rurinchö këkäyarqan, y Tomaspis pëkunawanmi këkarqan. Wayipa punkunkuna alli segurashqa këkaptimpis, Jesusqa pëkunaman yurïkurmi, “yamëlla kayë”+ nirqan.
27 Tsëpitanam Tomasta kënö nirqan: “Dëduykita këman churë y makïkunata rikë, y makikita costilläman churë. Amana mana creeqqa kënatsu,* sinöqa creikuyna”.
28 Tsënam Tomasqa nirqan: “¡Señorllä y Diosllä!”.
29 Jesusnam, “¿rikämarku creinki? Kushishqam kayan mana rikëkarpis, creeqkuna” nirqan.
30 Jesusqa mëtsika mas milagrukunatam qateqninkunapa puntanchö rurarqan, y tsëkunaqa manam kë rölluchö qellqarëkantsu.+
31 Peru këkunaqa qellqashqa këkan Diospa Tsurin Jesus, Cristu kanqanta creiyänëkipaq, y pëman creikur imëyaqpis kawëta tariyänëkipaqmi.+
Nötakuna
^ Tsënö nirqa, domingu nir reqinqantsik junaqpaqmi parlëkan, judïukunapaqqa tsë junaqmi semäna qallaq.
^ Kënöpis niyanmi: tutapëllaraq.
^ Kënöpis niyanmi: ichirëkaqta.
^ Kënöpis niyanmi: pullanninkunachö.
^ Tsënö nirqa, domingu nir reqinqantsik junaqpaqmi parlëkan, judïukunapaqqa tsë junaqmi semäna qallaq.
^ Kënöpis niyanmi: mandëkäyaq.
^ Kënöpis niyanmi: pecädunkunatapis.
^ O “dudar kënatsu”.
