Llapantsikmi qellëtaqa wanantsik, familiantsikkuna wanayanqankunata qonapaq (Proverbius 30:8). Rasumpa kaqchöqa, ‘qellëqa yanapakunmi’ (Eclesiastes 7:12). Höraqa qellë asuntupaq parlë manam fäciltsu, tsënö kaptimpis, casädu kawakïnikichö tsë asuntu problëmaman chätsiyäshunëkita ama permititsu (Efesius 4:32). Ishkëkim confianakuyänëki y qellëta imachö gastayänëkipaq kaqta decidiyänëki.

BIBLIA YACHATSIKUNQAN: “¿Meqequicunapis jatun wayita sharcatsita munarqa, manaraq qallarnin, tëcur llapan gastuta tantiyayanqui, ‘Mä, ¿qellenï tinconqacush ushatsinäpaq?’ nirnin” (Lücas 14:28). Alläpam precisan qellënikikunata imanö gastayänëkipaq kaqta decidiyänëki (Amos 3:3). Imata rantita wanayanqëkita y ëkata gastayänëkipaq kaqta decidiyë (Proverbius 31:16). Qellënikikuna kanqanrëkurllaqa ama imëkatapis rantiyëtsu. Kallpachakuyë jaqa mana kayänëkipaq, antis kayäpushunqëkillata gastayë (Proverbius 21:5; 22:7).

ITSA KËNÖ RURANKIMAN:

• Killa ushë qellënikikuna sobraptinqa, majëkiwan imanö gastayänëkipaq kaqta decidiyë

• Kayäpushunqëki qellëpita masta gastarqa, mas wallkallatana gastayänëkipaq churapakäyë. Tantiyarinëkipaq, cällichö mikuyänëkipa rantin, itsa wayikillachö cocinakuyankiman

BIBLIA YACHATSIKUNQAN: Honrädu kë, “manam Diosnintsicpa nopanllachotsu alli ruraq quenintsicta ricatsicushun; sinoqa nunacuna nopanchopis alli ruraq quenintsicta ricatsicushunmi” (2 Corintius 8:21). Ëkata gananqëkita y ëkata gastanqëkita majëkita willë.

Qellë asuntupaq decidirninqa, imëpis majëkiwanraq parlë (Proverbius 13:10). Tsë asuntupita shumaq parlayanqëkiqa yanapayäshunki casädu kawakïnikikunachö yamë pasakuyänëkipaqmi. Gananqëkitaqa familiëkipa qellënintanö rikë (1 Timoteu 5:8, NM).

ITSA KËNÖ RURANKIMAN:

• Mana tapunakushpa ëkata cada ünu gastayänëkipaq kaqta decidiyë

• Ama shuyëtsu qellë pishiptinraq tsë asuntupita parlëta