Leeqkuna Tapukuyanqan

¿Imataq Jehoväpa Testïgonkuna Yachatsikuyänan Wayi?

▪ Tsëqa Diosta adorayänampaq Jehoväpa testïgonkuna ëllukäyänan o gorikäyänan wayipa shutinmi. Hinantin Patsachömi kan y tsëchömi llapan semänakuna pachak pitsqa waranqapitapis más congregacionkuna ëllukäyan.

¿Imanötaq rurimpa? Bibliapita yachatsikayämunqanta hamëkur wiyakunapaqmi täkunakuna kan. Wakin wayimanqa pachakkunanömi nunakuna yëkuyan y hasta kima pachak nunakuna yëkuyänampaq wayikunapis kanmi, y puntapita yachatsikayämunampaqmi huk hatun patak kan. Wakin Yachatsikuyänan Wayichöqa huk o más taksha sälakunam kan, hina publicacionkunata qokuyänan sitio y tukïläya librokunata wanaqkunapaq bibliotëcapis kanmi.

Yachatsikuyänan Wayikunachöqa, manam wakin iglesiakunachönötsu kan altarkuna, santokuna, cruzkuna, o imapis tsënökuna. ¿Imanir? Tsëkunata katsirqa Biblia “imatapis Diostano adorayanqan caqcunata ama adorayëtsu” ninqantachi wiyakïkäyanmantsu (1 Corintios 10:14; Juan 4:24). Hinamampis, Yachatsikuyänan Wayikunaqa manam wakin religionkunapa mëtsikasaq y imëka adornokunawan rurashqa iglesiankunanötsu. Wayi imanö kanqampitapis masqa, Bibliapita yachatsikuyanqanmi precisan.

¿Imanirtaq tsënö shutin? Tsë wayikunachöqa yachatsikuyan Bibliapita y Jesuspis yachatsikunqan Diospa ‘mandaquinin’ precisaq yachatsikïpitam (Lucas 4:43). Tsëmi tsë wayikunapa shutinqa, “Jehoväpa Testïgonkuna Yachatsikuyänan Wayi”. Tsëchöqa Diosta imanö servina kanqanta y ‘alli willaquicunata’ llapan nunakunaman chätsiyänampaqmi yachatsikuyan (Mateo 24:14). Tsëmi fiestakuna ni ima negociopis tsëchöqa kantsu. Hinamampis shonqunkunapita ëkallatapis qoyanqan qellëwanmi tsë wayikunataqa rurayan y altsapäyampis. Y manam ni imanöpa qellëta mañakuyantsu, antis munaq kaq ëkallawampis yanapakuyänampaqmi taksha cäjakuna kan.

Mëchö karpis, tsë wayikunachöqa Diosta imanö servina kanqanta y ‘alli willaquicuna’ llapan nunakunaman chänampaqmi yachatsikuyan. Tsëpis, Yachatsikuyänan Wayi imanö kanan y ima tamaño kananqa, më sitiochö kanqampita, ima materialkuna kanqampita y patsan Testïgokunapa qellënin tinkunqampitam. Wakintam rurayan ladrïllowan, wakintanam tikawan, wakintam rumiwan, wakintanam qeruwan, y wakintanam bambú nishqanta hawirir päjawam qatariyan.

Alläpa kushishqam Jehoväpa Testïgonkuna Yachatsikuyänan Wayiman llapan shamoqkunata chaskiyä (Hebreus 10:25). Y llapan semänakunam Bibliapita yachatsikayämun pï më nunakunata yanapanampaq. Tsëmi, ¿imanirtaq täranqëkipa Testïgokuna Yachatsikuyänan Wayiman ëwar yachatsikuyanqanta wiyakurinkitsu?

[32 kaq päginachö fotu]

Malaui (África)

[32 kaq päginachö fötukuna]

Inglaterra