Kima watayoq këkaptïmi papänï, tiü y awilü gobiernukunaman mana qaqäyanqampita esclävutanö trabajatseq apayarqan. Papänïllam kawëkar quedarqan. 1947 wata, Ishkë kaq Jatun Guërra ushariptinmi, waqtan malograshqa kutimurqan. Saludninchö mana alli këkarpis, markäkïnintaqa (yärakuynintaqa) allim defendirqan.

Isqun watayoq këkaptïmi, Moldaviapita mëtsikaq Testïgukunata y familiätapis Siberiaman apayämarqan. 1949 wata 6 de julium animalkuna apayänan trenchö 6.400 kilömetrusta mana pärëpa ëwayarqä. Lebyazhemanmi 12 junaqta chäriyarqä. Trenkuna chäyänan sitiuchömi tsë markapita autoridäkuna shuyäyämarqan. Ichik grüpukunaman rakirayämarmi më tsë sitiukunaman mandayämarqan. Grüpükunataqa takshalla tsunyaq escuëlamanmi mandayämarqan. Kallpannaq y llakishqam këkäyarqä. Ishkë kaq Jatun Guërrachö Testïgukuna qellqayanqan juk canticutam edäna pani shimin rurinllachö cantar qallëkurqan, y tsëchö këkaqkunam pëwan juntu cantar qallëkuyarqä:

“¡Mëtsikaq cristiäkunatam këpita juk markakunaman apakuyashqa!

Norti läduman y Inti yarqamunan lädumanmi apakuyashqa.

Diospa kaqta rurayanqanrëkurmi imëka sufrimientukunata y wanutsikoq pruëbakunata pasar alli tsarakuyänan karqan.”

Tiempuwanqa, wayïkunapita 13 kilömetruschö këkaq sitiumanmi domingukuna reunionkunaman ëwayaq kayä. Tamya tiempuqa manaraq waräptinmi yarquyaq kayä y tseqlläkunayaqmi rashtapis nänikunachö kaq, tsëmi alläpa alalëkoq. Chärirmi, juk taksha cuartuchö 50 nunakunapitapis mas kichki yëkuyaq kayä, y juk o ishkë canticutam cantayaq kayä; tsëpitanam Diosman mañakurir Bibliata juk o ishkë hörakuna yachakuyaq kayä. Tsëpitam, jina mas canticuta cantarnin yachakur sïguiyaq kayä. ¡Alläpam tsë witsankunaqa markäkïnïkuna sinchiyarqan!

1960 watapaqqa, markankunapita juk markaman apashqa Testïgukunaqa manam alläpa michashqanatsu kayarqä y, waktsa karnimpis Moldaviataqa ëwëta puëdirqämi. Tsëchömi Nïna shipashta reqirqä, teytankuna y awilunkunapis Testïgun kayaq. Ichik tiempullata casakurirmi pëwan Siberiata kutirqä, tsëchömi wamräkuna yuriyarqan, 1964 watachö Dina y 1966 watachö Viktor. Ishkë wata pasariptinmi Ucraniata ëwakuyarqä. Dzhankoy markachömi juk taksha wayillachö täräyaq kayä, tsëqa këkan  Yalta markapita 160 kilömetruschömi, peninsula de Crimea nishqanchö.

Union Soviëtica nacionchönöllam Crimëachöpis Testïgukunapa rurëninkuna michashqa këkarqan. Peru manam alläpa michashqanatsu këkäyarqä ni manam qatikachäyämaqpistsu, tsëmi wakin Testïgukunaqa alkäbunatsu këkäyarqan. Porqui pëkunaqa pensayaq, Siberiachö alläpa sufrishqa karnin, imëkayoq kayänampaq trabajayanqanqa allilla kanqanta.

1991 wata 27 de marzu killam unë Union Soviëtica nishqampa autoridäninkuna patsakashqa religiontanö reconociyämarqan. Jinan höram ishkë junaq asamblëakunata tsë nacionpa qanchis markankunachö rurayänampaq alistapakur qallëkuyarqan. Noqakunaqa Odesa (Ucrania) markamanmi ëwayänä karqan, asamblëaqa qallanan karqan 24 de agostum. Asamblëa qallanampaq juk killa pishikaptinmi charqä jatun estadiuta limpiapakur y alistapakur yanapakunäpaq.

Llapan junaqkunam trabajayaq kayä y höraqa grädakunachömi punuyaq kayä. Warmikunanam estadiupa jiruroqninchö jardinkunata limpiayarqan. Basürataqa 70 mil kïlustanömi jorqayarqä. Posädapita encargakoqkunam, tsë markachö posädata ashiyarqan 15.000 asamblëaman shamoqkunapaq. Peru illaqpitam mana alli noticiata chaskiriyarqä.

Pitsqa junaqkuna asamblëa qallanampaq pishikaptinmi, 19 de agostu Union Soviëtica nishqampa Mijail Gorbachov presidentinta Yalta markachö tsariyarqan wayinchö carcelarätsiyänampaq, y asamblëäkunata rurayänäpaqmi manana munayarqannatsu. Shayämoqpaq kaqkunam Asamblëata Patsätseqkunaman qayakayämurqan trenchö y cärruchö rantiyanqan pasajinkunawan imata rurayänampaq kaqta. Diosman mana jaqita mañakurirmi, patsätseqkunaqa niyarqan: “¡Imanö kaptimpis, shayämïlla!”.

Alistapakur y Diosman mañakurqa sïguiyarqanllam. Posadakoqkunata chaskiyänampaq encargädukunam Union Soviëticapa llapan markankunapita shamoqkunata chaskir posädankunaman apayarqan. Cada junaqmi Asamblëata Patsätseqkunaqa tsë markachö autoridäkunaman ëwayaq, mana alli noticiakunallatam chaskiyaq.

Juëvis 22 de agostum, asamblëa qallanampaq ishkë junaq pishikaptin, Asamblëata Patsätseqkunaqa alli noticiata willarayämarqan: ¡Asamblëäkunapaqmi permïsuta qorayämarqan! Säbadu qoya qallanan kaq canticuta cantëkarmi shonqökuna alläpa kushikurqan. Tsë junaq kaq asamblëa ushariptinmi unë kaq amïgökunawan hasta ampinqanyaq quedakuyarqä. Markäkïninkunachö alli tsarakushqa cristiänukunawanmi këkäyarqä.

Tsë asamblëapitaqa 22 watanam pasarishqa, y Jehoväpa testïgunkuna miranqantsiktam rikäyarqö: Ucraniapa markankunachöqa Diospita Yachatsikuyänan Wayikunatam rurayashqa, 1991 watachöqa 25 mil publicadorkunam kayarqan, kananqa 150 mil publicadorkunapitapis masmi kayan.

Dzhankoy markachömi familiäwan tsë taksha wayillachö tärar sïguikäyä, kananqa 40 mil nunakunanam (runakumanan) tsëchö kayan. Siberiapita 1968 wata chäyämunqä witsankunaqa, juk ishkë Testïgu familiakunallam kayaq, peru kananqa joqta congregacionkunanam kan.

Jina familiäpis mirashqam. Kananqa: noqakuna, wamräkuna, willkäkuna y willkäkunapa wamrankunapis llapäkuna juntum Diosta sirwiyä.