Atska nacionkunachömi autoridäkuna mandakuyashqa ni mëchöpis reunionkunata mana rurayänampaq y pï mëpis karu karulla puriyänampaq. Tsëta cäsukurmi Jehoväpa testïgunkunaqa Internetllapana reunionta rurëkäyä Zoom niyanqan progrämata utilizarnin.

 Tsërëkurmi Jehoväpa testïgunkunata dirigeqkunaqa patsätsiyashqa, yanapakur churayanqan qellëwan pagakur Zoom niyanqan progrämata më tsëchö Testïgukuna utilizäyänampaq. Wakin sitiukunachö Jehoväpa testïgunkunaqa manam Zoomta utilizäyänampaq 15 o 20 dölarta pagakuyta puëdiyarqantsu, tsëmi grätis kaqllata utilicëkäyarqan, peru wallkaqllatam conectakëta puëdiyaq y manam segürutsu kaq. Tsëmi kananqa tsë qellëwan pagakurnin mas atskaqna reunionkunata shumaq wiyakuyta puëdiyan. Kananyaqqa 170 nacionkunachö 65.000 congregacionkunapitapis masnam tsë qellëwan pagakurnin reunionkunata shumaq rurëkäyan.

 Manädu marka (Indonesia) Kairagi congregacionchömi reunionkunata rurayänampaq grätislla kaq Zoom progrämata utilicëkäyarqan, peru kananqa pagana kaqtanam utilicëkäyan. Wawqi Hadi Santösum kënö nin: “Kananqa manam atska kutiraqtsu reunionkunaman conectakuyänä, tsëmi kananqa internet manejëta mana alläpa yachaqkunapis reunionkunata shumaq wiyakuykäyan”.

 Guayaquil marka (Ecuador) Guayacanes Oeste congregacionchö wawqi panikunata rikaq wawqi Lester Jijonmi kënö nin: “Kë marka congregacionkunachöqa manam alläpaqa qellëta tariyätsu. Manachi Zoom niyanqan progrämapita pagakuyta puëdiyämantsu karqan. Peru tsë progrämata utilizäyänäpaq pagakayämunqanmi yanapayämashqa llapäkuna conectakuyänäpaq. Y jukkunatapis kushishqam reunionkunaman invitayä mëtsikaqna conectakuyta puëdir”.

 Lusaka marka (Zambia) Norte Ngwerere congregacionpita wawqi Johnson Mwanzanam kënö nin: “Atska kutichömi wawqi panikuna kënö niyämashqa: ‘Zoom progrämata utilizänapaq pagakayämunqanqa manam reunionta ruranapaq y wawqi panikunawan shumaq rikänakunallapaqtsu yanapamantsik, sinöqa Jehovä alläpa kuyamanqantsikta cuentata qokunapaqmi masqa yanapamantsik’”.

 Desgraciakuna pasakunqanchö yanapakuyänäpaq kaq qellëwanmi Zoom progrämapita pagakuykäyä. Tsë qellëtaqa më tsëchö yanapakuyänäpaqmi churayämun. Wakinqa donate.dan124.com päginaman yëkurmi qellëninkunata churayämun. Alläpam agradecikuyaq më tsëchö yanapakuyänäpaq qellënikikunata churayämunqëkipita (2 Corintius 8:14).