Jehoväpa testïgunkunaqa 200 markakunapita y nacionkunapitapis maschömi yachatsikuyan y yanapakuyan. Peru tsëkunapita 35-llachömi gastunkunapaq qellëta tinkutsiyan. Tsëqa, ¿imanötan kayan wakin markakunachö y nacionkunachöqa?

 Entëru Patsachö Diospa sirweqninkuna rurayanqantam, Testïgukunata Pushaqkunaqa patsätsipakuyan. Y tsëpaqmi churakunqantsik qellëta alli utilizäyan. Wanayanqampitapis mas qellë yëkunqan Betel wayipitaqa, pishipakuyanqan Betelmanmi sobranqan qellëta apatsiyan. Unë witsan Diospa sirweqninkuna rurayanqannöllam kanampis rurayan. Pëkunaqa llapankunapaq ‘igual kayäpunampaqmi’, qellëyoq kaqkunaqa sobraq qellëninkunata waktsa kaqkunapaq apatsiyaq (2 Corintius 8:14).

 Tsë apatsiyanqan sobraq qellëtaqa, ¿imanötan wawqi panikuna chaskikuyan? Tsëta musyanapaqqa, Tanzaniachö ima pasanqanta rikärishun. Tsëchöqa, cäsi pullan nunakunam 5 sölisllawan cada junaq kawakuyan. Tanzaniapa juk markanchömi, Diospita yachakuyänan wayita altsayarqan. Tsë altsayanqampitam, wawqi panikuna kënö niyarqan: “Juntakäyänä wayita altsayämunqampitaqa mas atska nunakunam reunionkunaman shayämun. Tsëmi Teyta Jehoväta y wawqi panikunata alläpa agradecikuyä. Kananqa juk shumaq wayichömi, Jehovä Diospita yachakuyä”.

 Sri Lanka nacionchöqa, Coronavïrus qeshyarëkurmi wawqi panikunapaqqa mikuyta tariyänanllapaqpis fäciltsu kashqa. Tsëtam cuentakun pani Imära Fernandu y wamran Enosh. Pëkunaqa yanapayanqampitam kushikur qellqayarqan: “Alläpam agradecikuyä turi nanakuna mana allikunapa pasëkäyaptï yanapayämanqampita. Y kushishqam këkäyä Jehovä Diospa markanchö këkäyanqäpita. Teyta Jehovämanmi imëpis mañakuyä, llapan turi nanakunata kë ushanan junaqkunachö yanapanampaq”.

 Mëchö tärarpis, llapantsikmi yanapakuytaqa munantsik. Rikärishun Enosh imata ruranqanta. Pëqa waktsa familiakunata yanapakunampaqmi, qellëninta juk cajïtaman churakurqan. Tsënöllam Mëxicuchö täraq pani Guadalüpe Alvarezpis rurarqan, pëqa täran qellëta mana alläpa ganayanqan markachömi. Tsënö kaptimpis, llapan puëdinqanmannömi yanapakunampaq kallpachakun y kënömi nin: “Jehovä Diostam alläpa agradecikü kuyakoq y alli kanqampita. Churakunqä mana atska kaptimpis, mana allipa pasëkaq turi nanakunatam yanapan”.

 Betel wayikunachö yanapakoqkunaqa, wakin Betel wayikunata yanapayanqampitam kushishqa kayan. Tsëtam Brasil Betel wayichö yanapakoq wawqi Anthony Carvälu nin: “Mëtsika watakunapam, wakin Betel wayikunachö yanapakoqkunaqa qellëta apatsimur yanapayämashqa. Tsërëkurmi Diospita yachatsikunqantsikqa më tsë markakunaman chashqa. Kananqa noqakunapis wakin Betel wayikunata yanapëta puëdiyämi. Wawqi panikunaqa alläpam kushikuyan, qellëninkunawan Diospa Gobiernumpita willakuyänampaq yanapakur. Tsënömi rikätsikuyan Jesuspa qateqnin kayanqanta”.

 Jehoväpa testïgunkunaqa, mana allikunapa pasëkaq wawqi panikunata yanapëta puëdintsikmi. Tsëtaqa rurantsik, juntakänantsik wayichö këkaq cajïtaman “Obra mundial” neqman o Internetchö donate.dan124.com neqman qellënintsikta churarmi. Y manam juk markachö këkaq Betel wayimanraqtsu apatsinantsik.