Jesús manaraj cai Allpaman shamushpaca Miguel shutitami charirca. Qꞌuipapish jahua pachaman tigrashpaca chai shutillatatajmi charirca. Huaquincunaca Jesustaca San Miguel nishpami rijsincuna. a Bibliapica arcángel Miguelca Moisespaj cuerpomantami Diablohuan pꞌiñanacucurca ninmi. Shinallataj Miguelca shuj angelta ayudashcatami parlan. Paica chai angeltaca Diosmanta huillaicunata profeta Danielman huillachunmi ayudarca (Daniel 10:13, 21; Judas 9). Ángel Miguelca Jehová Dioslla mandana derechota charishcatami difindin. Paica Diospaj contracunahuanmi macanacun. Miguel shutica “¿Yaya Dios shinaca pitaj can?” nisha ninmi (Daniel 12:1; Apocalipsis 12:7).

 ¿Arcángel Miguel Jesús cashcataca ima shinataj yachanchij?

•   Arcangelca Miguelmi can (Judas 9). Arcángel shimica “angelcunata mandaj” nisha ninmi. Cai shimica ishqui versocunallapimi ricurin. Cai versocunapica shujlla angelmantami parlan. Mana tauca angelcunamantachu parlan. Chaimantami shuj arcángel tiyashcata intindinchij. 1 Tesalonicenses 4:16-pica Jesús causarishca qꞌuipa imata rurashcatami parlan. Cai versopica: “Mandaj Jesusllatajmi cazuchij caparishcahuan, angelcunata mandaj caparishcahuan jahua pachamanta uriyamunga” ninmi. Cai versopi nishca shinaca Jesusca angelcunata mandaj Miguelmi can.

•   Miguelca achca angelcunatami mandan. Bibliapica: “Miguelmi, paipaj angelcunandij, dragonhuan macanacucurca” ninmi. Dragonca Diablomi can (Apocalipsis 12:7). Shinallataj jahua pachapi autoridadta charishcamantami “angelcunata mandajcunapuramanta jatun mandaj can” nin (Daniel 10:13, 21; 12:1). Mushuj Testamentota estudiaj David Aune runaca: “Migueltaca jahua pachapi tiyaj angelcunata pushajmi can” ninmi.

   Diosca Jesusmanca angelcunata mandachun autoridadtami curca. Chaimantami Bibliapica: ‘Mandaj Jesús jahua pachamanta poderta charij paipaj angelcunandij Amito ricuri punllamantami lunyacuj ninapi shamunga’ nin (2 Tesalonicenses 1:​7, 8; Mateo 16:27). Ashtahuanpish 1 Pedro 3:​21, 22-pica ‘Jesusca jahua pachamanmi huichiyarca. Chaipica paitami angelcuna, mandajcuna, poderyujcunapish cazuncuna’ ninmi. Cai versocunapi nishca shinaca Diosca ishqui angelcunamanca mandana autoridadtaca mana curcachu. Tucui caita ricushpami Jesús Miguelllataj cashcata intindinchij.

•   Jatun llaqui punllacunapica “Miguel shuti angelmi jataringa” (Daniel 12:1). Daniel libropica ‘jatarina’ nishpaca shuj rey shuj importante trabajota ruragrijtami nicun (Daniel 11:​2-4, 21). Bibliapica Jesustaca “Diospaj Rimai” nishpami shutichin. Paica “Jatun Mandajcunata Jatun Mandaj” cashcamantami mana allicunata tucuchishpa Diospaj pueblota quishpichinga (Apocalipsis 19:11-​16). Caitaca ‘cai pacha callarimanta cunancama jatun llaqui mana tiyashca’ punllacunapimi ruranga (Mateo 24:21, 42).