1 de junio de 1912-manta The Watch Tower (La Torre del Vigía) revistapica: “Tal vez achcacunachari ñahui mana ricuj gentecunata rijsinguichij” nircami. Cai revistapica ñahui mana ricuj gentecunapajca huaquin publicacioncuna gratis tiyashcatapishmi huillarca. Shinallataj cai revistapica: “Ñahui mana ricujcuna dedocunahuan puntitocunapi tanteashpa liyichunmi huaquin publicacioncunata rurashcacuna. Shinallataj ñahui mana ricujcunaca shuj punlla achca bendicioncunata chasquinata yachashpami cushilla sintirincuna” ninmi.

 Chai revista llujshishca punllacunapica inglés shimita parlaj cada llajtacunaca paicunapaj propio braille nishca letracunatami utilizarcacuna. Shina cajpipish testigo de Jehovacunaca publicacioncunata braille letracunahuan rurashpami caticurcacuna. Cunan punllacunapi ñahui mana ricujcunapajca 50 yalli shimicunapimi achca publicacioncunata rurashpa caticunchij. Caita ima shina rurashcata ricushun.

 Puntapica normal letracunamantami braille letracunapi churana can. Michael Millen huauquica Patterson (Nueva York) llajtapi tiyaj Servicios de Procesamiento de Texto nishcapimi trabajan. Paica cashnami nin: “Ñaupaca shujtajcuna rurashca programas informáticos nishcacunatami utilizarcanchij. Pero chai programacunaca tucui shimicunapi braille letracunata rurangapajca mana valircachu. Cunanca Watchtower Translation System programata utilizashpami casi tucui shimicunapi braille letracunata rurai tucunchij. Cai programa shinaca shujtajca mana tiyanchu”.

 Braille letracunahuan rurashca publicacioncunapica dibujocunapi imacunalla ricurishcapishmi quillcashca can. Por ejemplo, Huiñai huiñaita cushilla causai libropi tiyaj punta dibujomanta braille letracunapica cashnami quillcashcacuna: “Shuj runaca shuj ñantami purishpa ricun. Chai ñan ladocunapica alaja sisacuna, lomacunami ricurin”. Jamshed huauquica ñahui mana ricuj siervo ministerial, precursormi can. Paica: “Dibujocuna ima shina cashcata braillepi liyishpaca dimastijmi contentarini” ninmi.

 Ña tucuita braillepi escribishpaca cai archivocunataca imprimij sucursalcunamanmi cachancuna. Caita rurangapajca alli papelcunatami utilizancuna. Chashnami braillepi escribingapaj jutcujpipish, chai papelcunata achcata utilizajpipish mana lliquirinchu. Qꞌuipaca tucui paginacunata ordenpi tandachishpami shuj espiral nishcata churashpa cuaderno shinata rurancuna. Chai huashami congregacioncunaman cachashca publicacioncunahuan igual cachancuna. Mana cashpaca mana ricujcunaman correocunata gratis cachachun saquijpica chaipimi cachancuna. Shinallataj ñahui mana ricuj huauqui panicuna tandanacuicunapi utilizangapaj publicacioncunata utca minishtijpica sucursalcunaca chai ratomi cachancuna.

 Caicunata rurangapajca achca tiempo, cullquimi minishtirin. Por ejemplo, Wallkill (Nueva York) llajtapi saquirij imprentapica ishqui braille Bibliata ruracui tiempollapitajmi 50.000 normal Bibliacunata rurancuna. Inglés shimipi braille Bibliaca 25 partecunatami charin. Ashtahuanpish braille Bibliahuan normal Bibliahuan rurangapaj comparajpica, braille Bibliata rurangapajca ashtahuan cullquimi minishtirin. Shuj braille Bibliata 25 partecunapi rurangapajca cada libropaj tapacunallami 150 dolarcuna valin.

 ¿Braille publicacionta ruraj huauqui panicunaca ima shinataj sintirincuna? Sudáfrica sucursalpi sirvij Nadiaca cashnami nin: “Ñahui mana ricuj turi ñañacunapaj causaica mana jahuallachu can. Chaimanta paicunata ayudangapaj trabajanaca shuj privilegiomi can. Jehová Dios paicunata achcata cꞌuyashcatami crini”.

 Ñahui mana ricuj gentecuna braille escribishcacunata mana liyinata yachashpaca ¿imatataj rurai tucun? Asha huatacunalla huashamanmi Aprenda a leer Braille nishca shuj folleto llujshirca. Cai folletoca normal letracunata, braille letracunatapishmi charin. Cai folletoca mana ricujcunahuan, ricujcunahuan ishquindij utilizachunmi rurashca can. Cai folletohuanca braillepi escribingapaj shuj regla shina, puntitocunata jutcuchingapaj shuj lápiz shinapishmi shamun. Braillepi escribinata yachangapajca cai herramientacunatami utilizana can. Caita cutin cutin ruranami braille letracunata de memoria yachachun, chai letracunata dedocunallahuan liyichunpish ayudanga.

 ¿Braillepi escribishca publicacioncunaca ñahui mana ricuj huauqui panicunataca ima shinataj ayudashca? Haití llajtapi Ernst huauquihuan ima tucushcata ricushun. Paica tandanacuicunamanmi rij carca. Pero braillepi publicacioncuna mana tiyashcamantami tandanacuipi participangapaj comentariocunataca de memoria nij carca. Ernst huauquica: “Cunanca braillepi llujshishca publicacioncunata charishcamantami tandanacuicunapica ima horaspish maquita alzashpa comentai tucunilla. Chashnami tucui huauqui panicunahuan shuj shinalla cashcata sintini. Cunanca tucui congregacioncunapimi chaillatataj yachai tucunchij” ninmi.

 Austria llajtapi causaj Jan shuti huauquica congregacionta pushajmi can. Paica ñahui mana ricujmi can. Paica Huillaj revistata, shinallataj Tandanacushcacunahuan Bibliata yachashun nishca partecunatapishmi pushan. Paica: “Testigo de Jehovacuna braillepi llujshishca publicacioncunaca jahualla, intindirinallami can. Por ejemplo, paginacunaca cada uno numerashcami can. Notacunatapish jahuallami liyi tucunchij. Shinallataj dibujocunapi imacunalla ricurishcatapishmi yachai tucunchij” ninmi.

 Corea del Sur llajtapica Seon-ok precursora panimi causan. Paica ñahui mana ricuj, rinrin mana uyajpishmi can. Ñaupaca tandanacuicunapi shujtajcuna paipaj maquita japishpa, señascunata rurashpa intindichichunmi minishtirca. Cunanca paillataj Bibliamanta llujshishca publicacioncunataca braillepimi liyi tucun. Paica cashnami nin: “Braillepi escribishca shujtaj librocuna, revistacunaca puntitocuna faltashcamanta, huishtu lineacunata charishcamanta, papelcunapish mana alli cashcamantaca chaita liyinaca mana jahuallachu can. Pero testigo de Jehovacuna rurashca publicacioncunaca alli papelta, dedocunahuan sintinalla puntitocunatapishmi charin. Chaimantami chaicunata liyinaca jahualla can. Ñaupaca Bibliamanta llujshishca publicacioncunata estudiangapajca shujtajcunapaj ayudatami minishtircani. Pero cunanca ñucallatajmi estudiai tucuni. Tandanacuicunapaj allichirinata, comentariocunata cunatapishmi achcata munani. Chaimantami braillepi llujshishca tucui publicacioncunata liyini. Chaicunata liyinataca manataj saquishachu”.

 Braillepi escribishca publicacioncuna, normal publicacioncunapishmi caita huillan: “Tucui muyundij Allpapimi Bibliamanta yachachinchij. Cai laya publicacioncunata rurangapajca gentecunami shungumanta cullquita cushpa ayudan. Cai publicaciontaca mana cꞌatungapajchu”. Cancuna donate.dan124.com paginapi ricuchishca shina shungumanta cullquita cushcamantami mana ricuj gentecunapaj, shujtaj gentecunapajpish achca publicacioncunata rurai tucushcanchij. Cancunata shungumantami agradicinchij.