LECCIÓN 8
Diosca ¿imamantataj mana alli ruraicuna llaquicunapish tiyachun saquishca?
1. Mana alli ruraicunaca ¿ima shinataj tiyai callarirca?
Diosca achca huatacunatami gobiernocuna mandachun saquishca. Paicunaca llaquicunata mana tucuchishcachu
Diablo llullajpimi cai Allpapica mana alli ruraicuna tiyai callarirca. Callaripica Diabloca shuj alli angelmi carca. Paica llullashpami mana allita rurai callarirca (Juan 8:44). Diabloca paitapish Diosta shina adorachunmi munarca. Llullashpami Diosta cazunapaj rantica paitaraj cazuchun nishpa punta huarmi Evata pandachirca. Adanpish paipaj huarmita catishpami Diosta mana cazurca. Chaimantami llaquicunapish huañuipish tiyan. Génesis 3:1-6, 19-ta rezapai.
Evata pandachishpami Diabloca Diosta mana cazui callarirca. Diosca mana tucuita mandanachu can nishpami Diabloca yuyarca. Achca gentecunapish Diosta mana cazushcamantami Diablopaj lado tucushca. Chaimantami Diabloca “cai pachata mandaj” tucushca. Juan 14:30; 1 Juan 5:19-ta rezapai.
2. Dios rurashcacunaca ¿manachu alli carca?
Dios rurashcacunaca tucuimi alli can. Angelcunapish punta gentecunapish tucuipimi Diosta cazui tucurca (Deuteronomio 32:4, 5). Diosca ñucanchijllataj allita o mana allita agllachunmi saquirca. Shinapish cꞌuyaimanta paita cazunata agllachunmi Diosca munan. Santiago 1:13-15; 1 Juan 5:3-ta rezapai.
3. Diosca ¿imamantataj llaquicuna tiyachun saquishca?
Ni shuj gobiernollapish gentecunata mana ayudai tucushcata ricuchingapajmi, Diosca paita mana cazushpa llaquilla causachun saquishca. (Eclesiastés 7:29; 8:9). Gobiernocunaca ñami 6.000 huatacunata mandacushca. Shinapish mana alli ruraicunata, llaquicunata, huañuita, jatun macanacuicunata, ungüicunatapish mana tucuchishcacunachu. Jeremías 10:23; Romanos 9:17-ta rezapai.
Dios ñucanchijta mandachun saquishpaca achca bendicioncunatami charishun (Isaías 48:17, 18). Diosca ñallami tucui mandajcunata tucuchinga. Cai Allpapica Diosta cazujcunallami causanga (Isaías 11:9). Daniel 2:44-ta rezapai.
Cai videota ricui: ¿Diosca imamantataj llaquicuna tiyachun saquin?
4. Jehová pacienciata charishcamantaca ¿imatataj ricuchi tucunchij?
Diabloca nircami, gentecunaca imatapish Diosmanta chasquina raicullami paita servin nishpa. Shinapish, Dios pacienciata charishcamantami Diablo llullacushcata ricuchi tucunchij. Shinallataj gobiernocunata ayudanapaj randica, Diospaj Mandanata ayudacushcatami ricuchi tucunchij. Job 1:8-12; Proverbios 27:11-ta rezapai.
5. Dios mandachun munashcataca ¿ima shinataj ricuchinchij?
Alli ruraicunahuanmi Dios ñucanchijta mandachun munashcata ricuchinchij
Ñucanchijta Dios mandachun munashpaca, Biblia yachachishcata cazushpami paita adorana canchij (Juan 4:23). Shinallataj politicapi, jatun macanacuicunapi mana chagrurishpami Jesús shina Diablopaj munaita mana rurana canchij. Juan 17:14-ta rezapai.
Diabloca mana alli ruraicunata, juchacunata rurachunmi achca gentecunata pandachicun. Mana allita saquijpica amigocunapish, familiacunapish ñucanchijmanta asingacunami o pꞌiñaringacunami (1 Pedro 4:3, 4). Diabloca nishcami llaquicuna ricurijpica Diostaca ni pi mana cazungachu nishpa. Llaquicuna ricurijpi Diosta cꞌuyajcunapaj ayudata mashcashpa, Dios mandashcacunata cazushpami Diablo llullacushcata ricuchishun. 1 Corintios 6:9, 10; 15:33-ta rezapai.
Diosca gentecunata cꞌuyashcamantami llaquicunata, mana alli ruraicunatapish tucuchinga. Diosta cazujcunallami huiñai huiñaita cai Allpapi causanga. Juan 3:16-ta rezapai.
