Biblia animachin shungumanda ñucanchi charishcaunara cungaj. Cuyajpi mana apij runallara yanapanchi, astaun ñucanchiras (Proverbios 11:25; Lucas 6:38). Jesús nica: “Apinamanda yali, cuyana mas valin cushi tucungaj” (Hechos 20:35).

•  ¿Ima huras cuyana ali an?

•  ¿Ima huras cuyana manali an?

•  Cuyanamanda rimaj textoguna

 Shungumanda cuyana yapa ali an. Biblia nin: “Caran duiñu paihua shungu munashcasna cuyachu, mana llaquirisha, mana mandashcasna. Dios cushihua cujta llaquinmi” (2 Corintios 9:7).

 Dios munan paita adurajcuna shungumanda cunuchu (Santiago 1:27). Ministijcunara yanapasha Diosta yanapaushca cuinta an, Dios ñucanchihua dibiyuj cuinta sintirin ñucanchi cuyaj shunguhua shujcunara cujpi (Proverbios 19:17). Chimanda Biblia nin Dios ñucanchira pagangami (Lucas 14:12-14).

 Cai quinsa manali munaihua cuyajpi:

•   Shujcuna ñaupai ali ricuringaj (Mateo 6:2).

•   Cushca randimanda mas apingaj munasha (Lucas 14:12-14).

•   Quishpirinara apingaj munasha (Salmo 49:6, 7).

 Dios chijnishca ruraigunara ruranuchu yanapashcai. Shu ejemplo, manali anga maicandas cullquira cuyana machangaj, drogagunara upingaj tabacura chupangaj (1 Corintios 6:9, 10; 2 Corintios 7:1). Shinallara tarbana ushashas tarbangaj mana munaj runara cullquira cuyana manali an (2 Tesalonicenses 3:10).

 Dios mandashcaunara casungaj arcashcai. Dios cariunara mandan paihua ailluuna ministishcara cungaj (1 Timoteo 5:8). Manali an shujcunara cullquira cungaj paihua aillu randimanda. Shinallara Jesús nica manali an maican runauna paiguna rucuyashca yayauna ministishcara mana cunujpi, maicanguna rimaj anuca, “canda valirinaunara Diosta cushcami,’ nisha” (Marcos 7:9-13).