Genesis 29:1-35
29 Chaymantam Jacobqa hinalla rispan chayarurqa intipa qispimunan lawpi llaqtaman.
2 Hinaspam qawarispan rikururqa pozota hinaspa kimsa hawaqpi achka ovejakuna puñuchkaqta, chay pozomantam ovejakunaqa yakuta tomaqku. Chay pozoqa hatun rumiwan tapasqam karqa.
3 Chayman llapa ovejakuna huñunakamuptinñam michiqkunaqa rumita suchuchiqku ovejanku yakuta tomananpaq. Tomarachispankuñataqmi kaqmanta chay pozota rumiwan tapaykuqku.
4 Chaymi Jacobqa michiqkunata tapurqa: “Wawqillaykuna, ¿maymantataq qamkunaqa kankichik?”, nispa. Paykunañataqmi nirqaku: “Haran llaqtamantam”, nispa.+
5 Hinaptinmi Jacobqa tapurqa: “¿Riqsinkichikchu Nacorpa willkan Labanta?”, nispa.+ Paykunañataqmi nirqaku: “Arí, riqsinikum”, nispanku.
6 Jacobñataqmi nirqa: “¿Allinllachu kakullachkan?”, nispa. Paykunañataqmi nirqaku: “Allinllam kachkan, waqaya churin Raquelpas ovejakunata qatimuchkan”, nispa.+
7 Hinaptinmi Jacobqa nirqa: “Chawpi punchawllaraqmi kachkan, manaraqmi ovejakuna huñuna horaraqchu. Yakuta tomarachispayá michimuychikraq”, nispa.
8 Paykunañataqmi nirqaku: “Llapallan michiqkuna ovejankuta huñumunankutaraqmi suyanayku, chayñam rumita pozomanta suchuchispa tomachisaqku”, nispa.
9 Chaynata rimachkaptinkum Raquelqa ovejakunata qatirikuspan chayaramurqa, payqa taytan Labanpa ovejankunatam michiq.
10 Chaymi Jacobqa mamanpa sobrinan Raquelta oveja qatimuchkaqta rikuruspan pozo tapaq rumita tanqaq asuykurqa. Hinaspam Jacobqa tion Labanpa ovejankunaman yakuta tomachirqa.
11 Chaymantam Jacobqa Raquelta rimakuykuspan muchaykurqa, hinaspanmi qaparispa waqarqa.
12 Hinaspam Jacobqa Raquelman willarqa Labanpa panin Rebecapa wawan kasqanta. Chaymi Raquelqa taytanman willaq chaylla rirqa.
13 Labanñataqmi+ panin Rebecapa wawan Jacob chaypi kasqanta yacharuspan kallparqa* paywan tupaykunanpaq. Hinaspanmi abrazaykuspan muchaykurqa, hinaspam wasinman pusarqa. Chaymi Jacobqa tukuy ima pasasqanmanta Labanman willakurqa.
14 Labanñataqmi nirqa: “Chaynaqa ayllum kanchik”, nispa. Hinaptinmi Jacobqa huk killa chaypi qipakurqa.
15 Chaymantam Labanqa Jacobta nirqa: “Aylluyña kaptikipas+ llamkapuwasqaykimantaqa pagapusqaykim. Niway, ¿haykatataq pagapusqayki?”, nispa.+
16 Labanpaqa karqam iskay warmi churinkuna, hukninpa sutinmi karqa Lea, sullka kaqpañataqmi Raquel.+
17 Raquelqa karqa kuyayllapaq sumaq sipasmi, ñawinkunapas kuyayllapaqmi karqa, Leapañataqmi mana.
18 Chaymi Jacobqa Raquelta kuyarusqanrayku Labanta nirqa: “Sullka kaq churiki Raquelraykum qanchis wata llamkapusqayki”, nispa.+
19 Hinaptinmi Labanqa nirqa: “Allinmi, churiyta huk runaman qunaymantaqa qanmanyá qusqayki. Chaynaqa qipakuyá”, nispa.
20 Chaymi Jacobqa Raquelrayku qanchis wata llamkarqa.+ Jacobpaqqa chay watakunaqa iskay-kimsa punchaw hinallam karqa Raquelta kuyasqanrayku.
21 Chaymantam Jacobqa Labanta nirqa: “Ñam llamkarapuykiña, quwayñayá Raquelta warmiy kananpaq, chaynapi paywan puñunaypaq”, nispa.
22 Chaymi Labanqa muyuriqninpi yachaq* runakunata qayachispan achka mikuyta ruwachirqa.
23 Tutaykuqtañataqmi Labanqa Raquelta pusananmantaqa Leata pusarurqa Jacobwan puñunanpaq.
24 Leamanqa Zilpa sutiyuq warmitam quykurqa serviqnin kananpaq.+
25 Hinaptinmi paqarinnintinta Jacobqa Lea kasqanta qawaykuspan Labanta nirqa: “¿Imatam kayta ruwaruwanki? ¿Manachu Raquelrayku llamkapurqaykiqa? ¿Imanasqataq Leata quykuwarqanki?”, nispa.+
26 Labanñataqmi nirqa: “Kaypiqa mayorninta casararachispañam sullkataqa casarachiniku.
27 Kay semanayá Leawan casarakusqallaykita kusirikuy, chaymantañam Raquelwanqa casarachisqayki qanchis watatawanraq llamkapuwanayki kaptinqa”, nispa.+
28 Chaymi Jacobqa “allinmi” niykurqa. Hinaptinmi Leawan casarakusqan semana tukuruptin Labanqa Raquelta quykurqa warmin kananpaq.
29 Hinaspam Labanqa Raquelpa serviqnin kananpaq Bila sutiyuq warmita quykurqa.+
30 Jacobqa Raquelwanpas puñurqam, chaymi Leamantaqa Raquelta astawan kuyarurqa. Hinaspam qanchis watatawanraq Labanpaq llamkapurqa.+
31 Lea chiqnisqa kaptinmi Jehova Diosqa yanapaykurqa wiksayakunanpaq.+ Raquelñataqmi qulluq karqa.+
32 Chaymi Leaqa wiksayakuruspan qari wawata wachakurqa, hinaspam suticharqa Rubenwan*,+ chaynataqa suticharqa: “Kayqa Jehova Dios llakipayariykuwasqanraykum.+ Kunanqa qusayqa kuyawanqañachá”, nispam.
33 Chaymantam kaqmanta wiksayakuruspan qari wawata wachakurqa. Hinaspam nirqa: “Kayqa chiqnisqa kasqayrayku mañakusqayta Jehova Dios uyariykuwasqanmi. Chaymi huk wawatawan quykuwan”, nispa. Chaymi chay wawata suticharqa Simeonwan*.+
34 Chaymantapas huktawan wiksayakuruspanmi qari wawata wachakurqa. Hinaspam nirqa: “Qusayqa ñuqallawanñachá kanqa kimsataña qari churinkunata wachakurusqayrayku”, nispa. Chaymi suticharqa Leviywan*.+
35 Chaymantapas kaqmanta wiksayakuruspanmi qari wawata wachakurqa. Hinaspam nirqa: “Kunanqa Jehova Diostayá yupaychasaq”, nispa. Chaymi suticharqa Judawan*.+ Chaymantaqa manañam wachakurqañachu.
Willakuykuna
^ Utaq: “Raskirqa”.
^ Utaq: “Tiyaq”.
^ “Ruben” ninanqa: “¡Qawaychik wawata!”, ninanmi.
^ “Simeon” ninanqa: “Uyariy”, ninanmi.
^ “Leviy” ninanqa: “Hukllawasqa” utaq “huñulla”, ninanmi.
^ “Juda” ninanqa: “Yupaychay”, ninanmi.
