“Qollqella kuyayqa tukuy mana allin ruraykunapa mamanmi.” (1 Timoteo 6:10)

¿IMATAM RUNAKUNA NINKU?

Qollqewanmi mana allin ruwaykunaqa rikurin.

¿IMATAM BIBLIA NIN?

Manam qollqechu runakunataqa sasachan, aswanqa ‘qollqe kuyasqankum’. Qollqesapa rey Salomonmi qollqella kuyaq runakunata imakunapi sasachakusqankumanta nirqa. Llumpayta preocupakusqankumanta: “Achka kapuqninkunaraykum mana puñunchu apu runaqa” (Eclesiastes 5:12). Manam imawanpas contentakunchu qollqe sonqo runaqa: “Qollqe kuyaq runaqa maynaña qollqewanpas manam contentakunmanchu. Achka imayoqpas kayta munaqqa manam contentakunmanchu” (Eclesiastes 5:10). Mana allin ruwaymanpas wichiykunmanmi: “Chaylla apuyaruyta munaqmi ichaqa chaylla huchaman wichiykunqa” (Proverbios 28:20, Chuya Qellqa revisión 2012, CQ12).

‘Qollqeqa waqaychakunmi.’ (Eclesiastes 7:12, CQ12)

¿IMATAM RUNAKUNA NINKU?

Hawkalla hinaspa kusisqa kawsakunapaqmi qollqeqa.

¿IMATAM BIBLIA NIN?

Qollqeqa engañakuqllañam (Marcos 4:19). Qollqeqa runakuna hawka hinaspa kusisqa kawsakuy atisqankutam piensachinman, ichaqa manamá chaynachu. Chayna kaspanpas “qollqeqa” wakin sasachakuykunata allichanapaqmi yanapawanchik (Eclesiastes 10:19). Qollqewanqa rantichwanmi mikuyta hinaspa hampitapas (2 Tesalonicenses 3:12).

Allintaqmi familiata mantienenapaqpas. Bibliam nin: “Pipas ayllunkunata mana mantieneyta munaspanqa, tukuymanta llalliqtaqa wasinpi yachaqkunata mana mantienespanqa qepanchakurunñam iñisqantapas, payqa Diosman mana iñiq runakunamantapas peorraqmi rikurirun”, nispa (1 Timoteo 5:8).

‘Gastanapaqqa puntatam tanteana.’ (Lucas 14:28)

¿IMATAM BIBLIA NIN?

Qollqetaqa servichikunanchik Diospa agradonpaqmi (Lucas 16:9). Allinta tanteaspa hinaspa mana pitapas engañaspa (Hebreos 13:18). Qollqenchikpa haypawasqanchikman hinallam kawsananchik, chaymi Biblia niwanchik: “Amayá apuyaytaqa kuyaychikchu ichaqa kapusuqnikichikwanyá contentakuychik”, nispa (Hebreos 13:5).

Bibliaqa manam ninchu qollqeta mana prestakunapaqqa, ichaqa ninmi: “Prestaq runañataqmi munaychakun prestakuqninpi”, nispa (Proverbios 22:7). Mana necesitasqanchik kaqkunapiqa manam gastanachu, Bibliam nin: “Mana tanteaq runapa chaylla rurasqanqa wakchayachinqam”, nispa (Proverbios 21:5). Qollqetaqa kapuwasqanchikman hinam sapaqchana otaq huñuna imapas necesitasqanchikpaq (1 Corintios 16:2).

Bibliaqa niwanchiktaqmi qokuykuq kanapaqpas (Lucas 6:38). Diospa agradonpaq kayta munaspaqa qokuykuqmi kananchik, sonqomanta qoqkunatam Diosqa kuyan (2 Corintios 9:7). Chaynaqa, ‘allin ruwaytawan kapuqninchikwan yanapanakuytaqa amayá qonqasunchu, chay ruwasqanchikwanmi kañasqa ofrendawan hina Diosta agradasunchik’ (Hebreos 13:16).