“Sapa watam yaqa 3 millon wawachakuna wañunku huk killayoqlla. Mana wañunanpaq yanapayta atiptinkupas millon masnin wawachakunam wañunku nacesqankumanta paqarinllanta.” (Save the Children International.)

Runakunapa saludninmanta preocupakuq institucionmi willakun 2011 kaq watapi Londres llaqtapa 15 distritokunapi wayrata qachachasqankuwan runakuna astawan wañusqankumanta. Diésel nisqanku motortam ruwarqaku petroliowan funcionaqta, chaytaqa ruwarqaku imatapas mana qachachasqanta piensaspankum, ichaqa astawanraqsi (91%) wayrata qachachan chayna motorniyoq carrokunaqa (Public Health England).

2013 kaq watapim Fundación de la Opinión Pública nisqanku institucion Rusia nacionpi cristiano ortodoxo nisqanku runakunata tapurqaku Biblia leesqankumanta, chaymi pachakmanta 52 runakuna mana leesqankumanta nirqaku, chaynataq pachakmanta 28 runakunalla Diosta mañakusqankumanta.

Allpantinpi qollqeta prestaq Bancom willakun tarpunapaq allpakuna pipa kasqanta mana yachasqankuwan wakchayay astawan yapakusqanmanta. Enteron Allpa pachapim kan 200 millon hectarea tarpunapaq allpakuna. Chaymanta 100 millon hectareakunam kan África lawpi, ichaqa 25 millon hectareapi tarpusqallankutam chaypiqa cosechanku.

Achka colegiokunapi hinaspa universidadkunapis estudianankupaq kaqkunata otaq librokunata tablet nisqanku aparatollapiña escuelapi otaq universidadpi servichikunankupaq apanku. Mana llumpay qollqepaq kaptinpas, wakinmi piensanku yachanankupaq chay aparatopi kaqkunaqa mana ancha yanapasqanmanta.