“Wakinpiqa sipaskunam celularniypa numeronta mañawaspa niwanku: ‘¿Ichapas purikuq richwan hinaspa... reqsinakuchwan?’, nispa. Numeroyta mana qospaymi pasakuni, wakin sipaskunaqa buenamozam kanku. Chaymi piensani: ‘Qoykuptiyqa imananmantaq’ nispa. Chayna piensayqa manam sasachu.” (16 watanpi Carlos.) *

¿Qamtapas Carlosta hinachu pipas sonqoyki suwayta munachkan? Ama hukmanyaychu, chayna sasachakuytaqa atiwaqmi venceyta.

Mozo-sipaspas otaq yuyayniyoqpas huchamanqa urmaykunmankum. Machu runa kaspanñam apostol Pabloqa kaynata qellqarqa: ‘Diospa leyninmantam kusikuni sonqoypi. Ichaqa musyakunitaqmi allin munasqaypa contranpi imapas peleasqanta, chayqa presocharuwaspan huchaman pusawaqniymi’, nispa (Romanos 7:22, 23). Huchallikunanpaq aychan aysaptinpas Pabloqa atiparqam, qampas atiwaqmi venceyta. Sonqoykipa mana allin munasqankunata controlanaykipaq kallpanchakuy (1 Corintios 9:27). Huchaman aysasuqnikiqa tukuy vidaykipim kanqa. Warma kaynikimanta chaykuna atipayta yachaspaqa manam sasachakunkichu yuyayniyoq kaspapas.

Qawasqaykiwan uyarisqaykiqa manam lliwchu yanapasunki. ‘Jovenkunapa munapayasqanqa’ sasa controlaymi kanman (2 Timoteo 2:22). Chaymi warmi-qari kuyanakuymanta televisionpi qawasqaykiqa, takikunapi uyarisqaykiqa otaq librokunapi leesqaykiqa astawanmi tanqasunkiman ima huchamanpas. ¿Imaynata? Ichapas qawawaq huk peliculapi kuyanakuq mozo-sipasta, chaynataq kuyanakusqankurayku kuskaña puñusqankuta, chayqa ichapas piensachisunkiman kuyanakusqankurayku chayna ruwasqankuqa mana hucha kasqanta. Ichaqa Bibliam nin chay ruwayqa mana allin kasqanta (1 Pedro 2:11). Chaymi aychaykipa munapayasqankunata atipanaykipaq kallpanchakunayki.

Reqsikuy imakunam huchaman tanqasusqaykita. Mana huchallikunaykipaq maynataña kallpanchakuspapas sonqoykipa munasqanwanqa atiparachikuwaqmi. Kaypi piensariy: ¿imaynatataq huk kaspita pakiruwaq? ¿Llañu lawninmantachu icha raku lawninmantachu? Llañu lawninmantam, ¿aw? Chaynam vidaykipas, ¿ima tentacionwantaq pakikuruchkaq hina rikuriruwaq? ¿Imaynatam chayta atipawaq? (Bibliam consejan: Santiago 1:14.)

Huchaman mana urmanaykipaq piensay. Tiempowanraq piensay imakunataq huchaman aysasunkiman, hinaspa tanteay imata ruwaspa atipanaykipaq. (Bibliam consejan: Proverbios 22:3.)

Ama qonqaychu allin ruwaq kasqaykita. Bibliam willakun Josey sutiyoq mozowan puñunankupaq huk warmi nisqanmanta. Joseyñataqmi nirqa: “¿Imaynataq kay mana allinta ruraspayqa Diospa contranpi huchallikuyman?”, nispa (Genesis 39:9). Chayna nisqanwanmi Joseyqa qawachirqa allin ruwaq kasqanta, chaymi mana huchallikurqachu. ¿Atiwaqchu qampas pay hina kayta?

Allin amistadkunata maskay. Allin amistadkunaqa yanapasunkim huchaman mana urmanaykipaq, Bibliam nin: “Yachayniyoq runakunawan juntanakuspaykiqa yachayniyoqmi kanki”, nispa (Proverbios 13:20).

Imakunataq huchaman urmachisunkiman.

• Ama sapallaykipiqa kaychu mana qarimasikiwanqa otaq mana warmimasikiwanqa.

• Ama Internetta sapallaykipiqa qawaychu, penqaypaq qalalla kaqkunatam qawayta qallaykuwaq.

• Ama juntakuychu mana allin ruwaqkunawanqa.

¿Imakunaraqtaq yanapasunkiman huchaman mana urmaykunaykipaq? (Bibliam consejan: 2 Timoteo 2:22.)

Diospa yanapayninta mañakuy. Jesusmi qatiqninkunaman nirqa: “Diosta mañakuychik ama tentasqa kanaykichikpaq”, nispa (Mateo 26:41). Jehova Diosqa munanmi kusisqa kawsakunaykita chaymi yanapasunaykipaq listo kachkan. Bibliam nin: “[Diosqa manam] munanqachu mana aguantay atinaykichikkama tentasqa kanaykichiktaqa”, nispa (1 Corintios 10:13).