WASIPI kaq misikunaqa tutapim purinku. Sapranñataqmi allinta yanapan hichpallanpi kaqkunata musyananpaq hinaspa imatapas chaylla hapirunanpaq.

Kaypi piensariy: Misikunapa sapranqa allintapunim yanapan wayrapa kuyusqantapas chaylla musyananpaq. Chayraykum tutapi mana rikuspankupas hichpallanpi kuyuqkunata musyanku. Arí, ¡allintamá sapranqa tutapi yanapan!

Sapranqa yanapantaqmi imapas kuyuq kaqkunapa maypi kasqanta yachananpaq. Chaymantapas yanapantaqmi uchkuchakunata tupuspan mayqanninta lluqsinanpaq. Huk qillqapa nisqanman hinam, misikunapa sapranmantaqa manam allintaraqchu yachanchik, ichaqa ninkum sapranta kaptaruptinchikqa ñawsa hina kasqanmanta. (Encyclopædia Britannica).

Yachaysapa runakunam misikunapa sapran chaylla musyaq kasqanta yachaspanku, robots nisqakunata ruwachkanku chayman hina rikchakuqta. Chay robots nisqakunapa sapran hina kaqkunaqa yanapanqas imatapas chaylla musyananpaq. California universidadpi yachachiq Ali Javey sutiyuq runapa nisqanman hinaqa, misipa sapranqa allintapunis yanapakunman chayna musyakuq imaymana makinakunata ruwanankupaq, hinaspa hukkunapipas yanapachikunankupaq.

¿Ima ninkitaq? ¿Misikunapa sapranqa kikillanmantachu rikurirqa icha unanchasqachu karqa?