Kay hapisqayki revistaqa 1879 watapim chayllaraq lloqsimurqa. Chaymantapacham tiempokunapas mana hina kaqllachu, chaynataqmi pasan kay revistawanpas (qaway hanapi fotokunata). Kay Willakuq sutiyoq revistapi hinaspa qatiqninpi lloqsimuqkunapim qawanki ñawpa kaqkunawan mana chaynalla kasqanta.

Achka nacionpi runakunam Internetllapiña astawan maskanku imapas yachay munasqankuta. Chaypim achka yachachikuykunata mana sasachakuspalla chaylla tarinku. Kunanqa Internetpim kachkan achka librokuna, revistakuna hinaspa periodicokunapas.

Chayna kasqanraykum, qaynakunalla jw.org/quy nisqanta allicharuniku aswan sumaqllaña kananpaq hinaspa mana sasachakuspalla tarinapaq. Chaypim kachkan tawa pachak masnin rimaykunapi qellqakuna. Kay revistapi ñawpaqta lloqsimuq yachachikuykunamantam wakinta Internetllapiña tarinki. a

Wakin yachachikuykuna Internetpi astawan lloqsimunanraykum, kay killamantapacha Willakuq revistaqa lloqsimunqa 16 paginallapiña, manam 32 paginapiñachu. Kay revistaqa 204 rimaykunamanmi tikrakuchkan, aslla paginayoq kasqanraykum huk rimaykunamanpas astawan tikrasqa kanqa.

Munanikum kay yanapakuykunawan hukkunapas yanapachikunankuta chaynapi Diosmanta astawan yachanankupaq. Hinallam kallpanchakusaqku aswan allin yachachikuykunata qellqakunapipas chaynataq Internetpipas horqonaykupaq, chaynapi Bibliata chaninchaqkuna hinaspa yachay munaqkunapas yanapachikunankupaq.

Qellqaqkuna